Канон феодору тирону текст

Детально: канон феодору тирону текст - со всех открытых источников и разных уголков мира на сайте 1000-molitv.ru для наших уважаемых читателей.

Оглавление [Показать]

Пе́снь 1.

Ирмо́с: Во́ду проше́д, я́ко су́шу, и еги́петскаго зла́ избежа́в, изра́ильтянин вопия́ше: Изба́вителю и Бо́гу на́шему пои́м.

Боже́ственным по́двигом, му́чениче Христо́в, подви́гся и тече́ние сконча́в, ве́ру соблю́л еси́ Боже́ственную, пра́вды обре́л еси́ вене́ц.

Преесте́ственну сла́ву от Христа́ прии́м, страстоте́рпче, зе́млю всю́ обхо́диши, избавля́я вся́, ве́рою с благогове́нием к тебе́ притека́ющия.

Небе́сный, сла́вне, лико́вник, со безпло́тными сы́й, на земли́ призыва́ющия тя́ от бе́д и напа́стей избавля́й.

Богоро́дичен: Прему́дрость и Сло́во О́тчее несказа́нно ро́ждшая, души́ моея́ лю́тую исцели́ я́зву и се́рдца боле́знь укроти́.

Пе́снь 3.

Ирмо́с: Ты́ еси́ утвержде́ние притека́ющих к Тебе́, Го́споди, Ты́ еси́ Све́т омраче́нных, и пое́т Тя́ ду́х мо́й.

О́гнь муче́ний тя́ не устраши́, те́мже о́гнь напа́стей к тебе́ прибега́ющим утиша́еши, Фео́доре.

Изба́ви моли́твами твои́ми одержа́щия мя́ печа́ли, му́чениче Христо́в, все́ углажда́я жите́йское стропо́тство.

Все́ се́рдце мое́ и помышле́ние простира́ю к тебе́ и ду́шу, твоея́, страстоте́рпче, по́мощи тре́буя.

Богоро́дичен: Уста́ви непостоя́нное помышле́ний мои́х смуще́ние, Ма́ти Бо́жия, е́же к Сы́ну Твоему́ направля́ющи движе́ние.

Седа́лен, гла́с 4.

Му́ченическими добро́тами укра́шен, Царю́ Небе́сному, му́чениче, ра́дуяся, венцено́сец предстои́ши, Фео́доре: на кре́ст бо воздви́жен бы́л еси́ Его́ ра́ди и гвозде́й пригвожде́ние, и воло́вых жи́л, и ногте́й, и очны́х зе́ниц изверте́ние претерпе́л еси́ тве́рдо. Те́мже тя́ ве́рою почита́ем, превели́кий.

Сла́ва, и ны́не, богоро́дичен: И́же на престо́ле херуви́мстем седя́й и в не́дрех О́тчих водворя́яся, я́ко на престо́ле святе́м седи́т Свое́м, Влады́чице, в не́дрех Твои́х: вопло́щся бо Бо́г вои́стинну, воцари́ся над все́ми язы́ки, и разу́мно ны́не пои́м Ему́. Его́же умоли́ спасти́ся рабо́м Твои́м.

Крестобогоро́дичен: И́же от Безнача́льнаго Отца́ рожде́ннаго напосле́док Тя́ пло́тию ро́ждшая, на Кресте́ ви́сяща, зря́щи, Христе́, — увы́ Мне́, любе́знейший Иису́се, — вопия́ше, — ка́ко сла́вимый я́ко Бо́г от а́нгел, от беззако́нных ны́не челове́к, Сы́не, хотя́, распина́ешися? Пою́ Тя́, Долготерпели́ве.

Пе́снь 4.

Ирмо́с: Услы́шах, Го́споди, смотре́ния Твоего́ та́инство, разуме́х дела́ Твоя́ и просла́вих Твое́ Божество́.

Прави́теля тя́ предлага́ю, Бо́жий уго́дниче, ты́ мя́ упра́ви ве́трилом Ду́ха и Боже́ственными ве́тры, пресла́вне.

От вся́каго, мо́лимся, изба́ви преще́ния, всеблаже́нне Фео́доре, тя́ ве́рою блажа́щия и Боже́ственную па́мять твою́ почита́ющия.

Ни живо́т, ни сме́рть, ни настоя́щая, ни гряду́щая, ни о́гнь, ни ра́ны, от Христа́, богому́дре, отлучи́ша тебе́.

Богоро́дичен: Под ле́том бы́вша, от Отца́ безле́тно возсия́вшаго, Богома́ти на́м родила́ еси́, Его́же моли́ спасти́ пою́щия Тя́.

Пе́снь 5.

Ирмо́с: У́тренююще, вопие́м Ти́: Го́споди, спаси́ ны́, Ты́ бо еси́ Бо́г на́ш, ра́зве Тебе́, ино́го не ве́мы.

Му́чеников бы́в удобре́ние, му́чениче Христо́в, ве́рных по́мощь бу́ди и стена́ неруши́ма.

Едине́ния насла́ждься лу́чшаго, я́же па́че ума́ благи́х, Фео́доре, тя́ чту́щия спаси́.

Побежда́емь любо́вию Зижди́теля, жите́йская оттря́сл еси́ пристра́стия и Бо́гу благоугоди́л еси́.

Богоро́дичен: Его́же родила́ еси́, Де́во Всенепоро́чная, Бо́га Сло́ва, приле́жно моли́ о на́с, пою́щих Тя́.

Пе́снь 6.

Ирмо́с: Очи́сти мя́, Спа́се, мно́га бо беззако́ния моя́, и из глубины́ зо́л возведи́, молю́ся, к Тебе́ бо возопи́х, и услы́ши мя́, Бо́же спасе́ния моего́.

Побо́рник сы́й благоче́стия тепле́йший и пре́лести обличи́тель и́дольския бы́в, де́монов мечта́ния и страсте́й о́бразы души́ моея́ потреби́.

Утвержде́ние ми́ бу́ди и стена́, му́чениче, непобеди́ма, не́мощь и гни́лость ума́ моего́ утвержда́я, Фео́доре, твои́ми предста́тельствы и сохраня́я невре́дно.

Во́инства тлетво́рнаго и тле́ннаго отре́клся еси́, во́инство же жи́зни, всеблаже́нне Фео́доре, до конца́ возлюби́л еси́, в не́мже победоно́сец показа́лся еси́, досточу́дне.

Богоро́дичен: Возсия́ от Сио́на Вы́шняго благоле́пие прия́тием пло́ти по соедине́нию неизглаго́ланному, из Тебе́, Неискусобра́чная, оде́явся, и ми́р просвети́.

Конда́к, гла́с 8:

Ве́ру Христо́ву, я́ко щи́т, вну́трь прии́м в се́рдце твое́м, проти́вныя си́лы попра́л еси́, многострада́льче, и венце́м небе́сным венча́лся еси́ ве́чно, Фео́доре, я́ко непобеди́мый.

И́кос:

На престо́ле све́та Носи́маго, благода́рственно ве́рою воспева́ем Тя́, я́ко дарова́ние боже́ственное дарова́л еси́ — до́бляго во страда́нии Фео́дора, в житии́ треблаже́ннаго, я́ко побо́рника су́щаго и́стины, благочести́вым по́мыслом Тя́ жела́юща, Христе́, кре́пка победи́теля на льсти́ваго, я́ко непобеди́мый.

Пе́снь 7.

Ирмо́с: От Иуде́и доше́дше, о́троцы, в Вавило́не иногда́, ве́рою Тро́ическою пла́мень пе́щный попра́ша, пою́ще: отце́в Бо́же, благослове́н еси́.

Тя́, живота́ моего́ предста́теля, и засту́пника и́мам спасе́ния моего́, и храни́теля, богому́дре, утвержде́ние даю́ща ве́рою зову́щим: оте́ц на́ших Бо́же, благослове́н еси́.

Я́ко красно́ заколе́ние са́м себе́ Го́сподеви и свяще́ннейшее приве́л еси́, всеблаже́нне, и огне́м муче́ний всесоже́глся еси́, сла́вне, вопия́: оте́ц на́ших Бо́же, благослове́н еси́.

Живо́тнаго вдохнове́ния насыща́яся, блаже́нне, Боже́ственнаго Ду́ха, ду́хи отгоня́еши, неду́ги исцеля́еши и зове́ши, ра́дуяся: оте́ц на́ших Бо́же, благослове́н еси́.

Богоро́дичен: Из утро́бы Твоея́ про́йде, вопло́щься, вся́ческих, Де́во, Госпо́дь. Те́м Тя́, Богоро́дицу, му́дрствующе правосла́вно, Сы́ну Твоему́ взыва́ем: оте́ц на́ших Бо́же, благослове́н еси́.

Пе́снь 8.

Ирмо́с: Седмери́цею пе́щь халде́йский мучи́тель богочести́вым неи́стовно разжже́, си́лою же лу́чшею спасе́ны сия́ ви́дев, Творцу́ и Изба́вителю вопия́ше: о́троцы, благослови́те, свяще́нницы, воспо́йте, лю́дие, превозноси́те во вся́ ве́ки.

Вся́ческими, прехва́льне, треволне́нии окружа́еми и напа́стьми жите́йскими содержи́ми, предста́теля скоре́йша, и помо́щника, и спобо́рника, вси́ ве́рнии, тя́ моли́твенника Влады́це приво́дим, вопию́ще: не преста́й моли́ти о воспева́ющих всечестну́ю твою́ па́мять.

Грехо́вными вери́гами свя́зан, пребога́те, и прегреше́ний мои́х плени́цами око́ван, прибега́ю к покро́ву твоему́, венцено́сче, разреше́ния прося́, но я́ко чу́дно ко Влады́це все́х, богому́дре, дерзнове́ние име́я, моли́ спасти́ся Христа́ пою́щим во ве́ки вся́.

Му́ченическими светлостьми́ просвеще́н, всехва́льне, а́нгельским счи́слился еси́ чино́м, с ни́миже ра́дуяся и слику́я, му́чениче, при́сно, чудотво́рными исцеле́нии уясня́еши любо́вию тя́ чту́щия и ве́рно пою́щия: лю́дие, превозноси́те Христа́ во ве́ки вся́.

Богоро́дичен: Пло́тию приобщи́ся к челове́ком, я́ко Благоутро́бен, Соде́тель и Творе́ц тва́ри, из Тебе́, Неискусобра́чная Богороди́тельнице, сию́ прие́м: те́мже Богоро́дицу, ве́рнии, Тя́ и́стинно сла́вим, вопию́ще и ве́рно пою́ще: лю́дие, превозноси́те Христа́ во ве́ки вся́.

Пе́снь 9.

Ирмо́с: Тя́, Неискусобра́чную Ма́терь Бо́га Вы́шняго, Тя́, па́че ума́ ро́ждшую сло́вом вои́стинну Бо́га, вы́шшую пречи́стых си́л, немо́лчными славословле́нии велича́ем.

Бо́дра тя́ храни́теля, великому́чениче, стяжа́вше, враго́в злоу́мие удо́бь отгоня́ща и Це́рквам подаю́ща ми́р, страстоте́рпче, непреста́нно ублажа́ем.

Кре́пость тебе́ на де́моны дарова́ Влады́ка, стра́сти же души́ и телесе́ исцеля́ти, блаже́нне, всеблагочести́вейшим дерзнове́нием, моля́ся Спа́су, те́мже тя́ вси́ ублажа́ем.

Зарю́ Трисо́лнечную и еди́нственную созерца́яй, Еди́но в Тре́х Божество́, и нача́ло пренача́льное, и исто́чник бла́гости, страстоте́рпче, тя́ пою́щия сохраня́й.

Богоро́дичен: Изми́ мя́, Всенепоро́чная, мы́сленнаго плене́ния, избавле́ние воздаю́щи, Влады́чице, Сы́на Твоего́ распя́тие, е́же за все́х бы́вшее, избавле́ние, и ми́р, и спасе́ние пою́щим Тя́.

Свети́лен.

Искуси́вся, я́коже зла́то, огне́м и му́ками, досто́ин яви́лся еси́ да́р Бо́га Вы́шняго, Фео́доре страстоте́рпче, о на́с ны́не моли́ся.

Сла́ва, и ны́не, богоро́дичен: Держа́вным Твои́м покро́вом от враго́в наве́та на́с, Чи́стая, Твоя́ рабы́, сохрани́ вся́ невреди́мы, Тя́ бо стяжа́хом, еди́ну прибе́жище в ну́ждах.

Русская вера, 2017

Святой великомученик Феодор Тирон был родом из Малой Азии и служил воином. Около 306 года он, после жестоких истязаний, подвергся сожжению на костре за исповедание веры во Христа. Церковь Христова издревле признает за святым мучеником Феодором Тироном благодатный дар оказывать помощь в обретении украденных вещей. Память св. великомученику Феодору Тирону — 17 февраля (2 марта по новому стилю) и в первую субботу Великого поста.
 

——————————————————————

Общее начало и конец всем канонам →
Порядок чтения по уставу
——————————————————————
 

Тропарь, глас 2-й

Велия веры исправления, во источнице пламенне, яко на воде покойне, святыи мученик Феодор радовашеся. Огнем бо сожегся, яко хлеб сладок Троице принесеся. Того молитвами Христе Боже помилуй нас. (Дважды).

Слава, и ныне. Богородичен. Вся паче смысла, вся преславная Твоя Богородице таиньства. Чистотою запечатленна, и девьством хранима. Мати разумеся неложна, Бога рождьши истиннаго. Того моли спастися душам нашим.
 

КАНОН, глас 8-й
 

Песнь 1. Ирмос

Воду прошёд яко по суху, из египетска зла избежав, израильтянин вопияше, Избавителю Богу нашему поем.

Запев. Святыи великомучениче Феодоре, моли Бога о нас (поклон). Божественым подвигом мучениче Христов подвигся, и течение скончав. Веру соблюд божественую, правде обрел еси венец.

Запев. Паче естествену славу от Христа прием страстотерпче, землю всю обходиши. Избавляя вся, иже верою и благоговением к тебе притекающыя.

Слава. Небесныи славне ликовник, со бесплотными сыи, иже на земли призывающыя тя, от бед и напастей избавляя.

И ныне. Богородичен. Яже премудрость Слово Отчее несказанно рождьши, души моея лютую исцели язву. И сердечную болезнь укроти.

Катавасия. Избави от бед рабы своя, святыи великомучениче Феодоре, яко вси по Бозе к тебе прибегаем, ты бо молиши о нас Христа Бога нашего (поклон). Господи помилуй (трижды с поклонами).
 

Песнь 3. Ирмос

Ты еси утвержение, притекающим Ти Господи. Ты же свет омраченым, и поет Тя дух мой.

Запев. Огнь мучении тя не устраши. Тем же огнь напастей, иже к тебе прибегающим, утишаеши Феодоре.

Запев. Избави молитвами си, одержащия мя печали, мучениче Христов, все углаждая, житейское стропотьство.

Слава. Все сердце мое и помышление простираю к тебе и душу, твою страстотерпче помощь требуя.

И ныне. Богородичен. Устави непостоянное помышлении моих смущение, Мати Божия, еже к Сыну Твоему, направляющи движение. Катавасия.

Седален, глас 4-й. Мученическими добротами украшен, Цареви Небесному мучениче радуяся, венценосец предстоиши Феодоре. На крест бо воздвижен бысть Его ради, и гвоздьми пригвожден. И волуями жилами, и ноготьми, и очным зеницам извертеном, претерпел еси твердо. Тем же тя верою почитаем превеликии.

Слава, и ныне. Богородичен. Иже на престоле херувимсте седяи, и в недрех Отчих водворяяся, яко на престоле седит святем Своем, Владычице на лону Твоею плотию. Бог бо воистину воцарися над всеми языки, и разумно ныне поем Ему, Его же моли спасти рабы Твоя.
 

Песнь 4. Ирмос

Услышах Господи смотрения Твоего таиньство, разумех дела Твоя, и прославих Твое Божество.

Запев. Кормчию тя предлагаю, Божии угодниче. Ты мя окорми, ветрилом духовным, и божествеными ветры преславне.

Запев. От всякого молимся избави прещения, всеблаженне Феодоре, иже тя верою блажащыя, и божественую память твою почитающыя.

Слава. Ни живот ни смерть, ни настоящая ни грядущая, ни огнь ни раны, от Христа богомудре не отлучиша тебе.

И ныне. Богородичен. Под летом бывша, иже от Отца безлетно восиявша, Богомати нам родила еси. Его же моли, спасти поющыя Тя. Катавасия.
 

Песнь 5. Ирмос

Утренююще вопием Ти Господи, спаси ны. Ты бо еси Бог наш, разве бо Тебе иного не знаем.

Запев. Мучеником быв удобрение, мучениче Христов верным помощь буди, и стена нерушима.

Запев. Единения наслаждься лучшаго, иже паче ума благих Феодоре, тя чтущыя спасай.

Слава. Побеждаемь любовию Зиждителя, законных оттрясе пристрастие, и Богови угодил еси.

И ныне. Богородичен. Его же родила еси Дево всенепорочная, Бога Слова, прилежно моли о нас поющих Тя. Катавасия.
 

Песнь 6. Ирмос

Очисти мя Спасе, многа бо беззакония моя, и из глубины зол возведи мя молюся. К Тебе бо возвах и услыша мя, Боже спасения моего.

Запев. Поборник сыи благочестия тепл, и прелести обличитель идольстей быв. Бесом мечтания, и страстем образы души моея потреби.

Запев. Утвержение ми буди, и стена мучениче непобедима, немощь и гнилость ума моего утверди Феодоре, твоим предстательством, и сохрани неврежденно.

Слава. Воинства тлетворнаго, и тленнаго отречеся. Воинство же жизни преблаженне Феодоре, до конца возлюбил еси. В нем же победоносец явися преславне.

И ныне. Богородичен. Восия от Сиона вьшняго благолепие. Одеяние плотьское по соединению не изглаголанному, ис Тебе неискусобрачная преодеянна. И мира просвети. Катавасия.

Слава, и ныне. Кондак, глас 8-й. Веру Христову яко щит, внутрь прием в сердцы си, сопротивныя силы попрал еси многострадальне. И венцем с небесе венчася вечным, яко непобедим.

Икос. Иже на престоле светоносимыи, благодарьственно верою поем тя, яко дарование божествено даровал еси, добляго во страдании Феодора, иже в житии треблаженнаго, и яко поборника суща истине. Благочестивым помыслом, Тя желающе Христе. Крепка победителя на льстиваго, яко победитель.
 

Песнь 7. Ирмос

Иже от Июдеи, дошедше отроцы в Вавилон древле, верою утвержении, пламень пещныи попраша глаголюще, отец наших Боже благословен еси.

Запев. Тя животу моему предстателя, и заступника имам спасению моему, и хранителя богомудре, утвержение дающа верою зовущим, отец наших Боже благословен еси.

Запев. Яко красно заколение, сам себе Господеви, и священно привел еси преблаженне, и огнем мучении, всесожеглся еси славне, вопия, отец наших Боже благословен еси.

Слава. Животнаго духновения, насыщаяся блаженне божественнаго Духа, духи отгоняеши, недуги исцеляеши. И зовеши радуяся, отец наших Боже благословен еси.

И ныне. Богородичен. Из утробы Твоея пройде, воплощься всяческих Дево Господь. Тем Тя Богородицу мудрствующе православно, Сыну Твоему взываем, отец наших Боже благословен еси. Катавасия.
 

Песнь 8. Ирмос

Седмь седмицею пещь халдейскии мучитель, благочестивым люте разжже. Силою же лучшею спасеных видев, Творцу Избавителю вопияаше, дети благословите, священнии воспойте людие, и превозносите Его во веки.

Запев. Всяческими прехвалне треволнении окружаеми, и напастными прилоги низлагаеми, предстателя скора, и помощника и поборьника, вси вернии тя молитвеника Владыце, приводим вопиюще, дети благословите, священнии пойте людие, и превозносите Его во веки.

Запев. Греховными веригами связаныи пребогате, и согрешении моих пленицами окован, прибегаю к покрову твоему венченосче, разрешение прося. Но яко чюдно ко Владыце всех богомудре, дерзновение имея, моли спастися, Христа поющим во веки вся.

Слава. Мученическими светлостьми прехвалне, ангельским причтеся чином. С ними же радуися и ликуя мучениче присно, чюдотворными исцелении уяшняеши, любовию чтущыя, и верно поющыя. Людие превозносите Господа во веки вся.

И ныне. Богородичен. Плотию приближися к человеком, яко милосерд, содетель и Творец твари, ис Тебе неискусобрачная Богородителнице, сию прием. Тем же Богородицу, вернии Тя воистину славим вопиюще, и верно поюще, людие превозносите Христа во веки вся. Катавасия.
 

Песнь 9. Ирмос

Тя браконеискусимую Матерь Бога вышняго, Тя иже паче ума рождьшую Слово сущаго Бога, и вышшю пречистых сил, немолчными славословении величаем.

Запев с поклоном. Бодрена тя хранителя, великомучениче стяжав, врагов злое умышление удобь отъемлюща. И церквам подающа смирение страстотерпче, непрестанно ублажаем.

Запев. Крепость тебе на бесы дарова Владыка. Страсти же души и телесе исцеляеши блаженне, всеблагочестным дерзновением, моляся Спасу. Тем же тя вси ублажаем.

Слава. Лучю трисолнечную, и едино зря в трех Божество, и начало преначално благодательное, и источник благости страстотерпче, иже тя поющыя сохраняй.

И ныне. Богородичен. Избави мя Пренепорочная мысленаго пленения, избавление воздающи Владычице, Сына Твоего распятие, еже за всех бывшее избавление, и смирение и спасение поющим Тя. Катавасия.

Отпуст: Господи Исусе Христе, Сыне Божии, молитв ради пречистыя Твоея Матере, и святаго великомученика Феодора Тирона, и всех ради святых, помилуй и спаси нас, яко Благ и Человеколюбец. Аминь. Господи помилуй (трижды). Исходные поклоны.

Обзор книги

Начало канона

Молитвами святых отец наших, Господи Иисусе Христе Боже наш, помилуй нас. Аминь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. (Трижды.)

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, (трижды). Сла́ва, и ны́не:

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди поми́луй, (12 раз). Сла́ва, и ны́не:

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом Давиду, егда́ гоняше его Авессалом, сын его, 142

1Го́споди, услы́ши моли́тву мою́, внуши́ моле́ние мое́ во и́стине Твое́й, услы́ши мя в пра́вде Твое́й 2и не вни́ди в суд с рабо́м Твои́м, я́ко не оправди́тся пред Тобо́ю всяк живы́й. 3Яко погна́ враг ду́шу мою, смири́л есть в зе́млю живо́т мой, посади́л мя есть в те́мных, я́ко ме́ртвыя ве́ка. 4И уны́ во мне дух мой, во мне смяте́ся се́рдце мое́. 5Помяну́х дни дре́вния, поучи́хся во всех де́лех Твои́х, в творе́ниих руку́ Твое́ю поуча́хся. 6Возде́х к Тебе́ ру́це мои́, душа́ моя́, я́ко земля́ безво́дная Тебе́. 7Ско́ро услы́ши мя, Го́споди, исчезе́ дух мой, не отврати́ лица́ Твоего́ от мене́, и уподо́блюся низходя́щым в ров. 8Слы́шану сотвори́ мне зау́тра ми́лость Твою, я́ко на Тя упова́х. Скажи́ мне, Го́споди, путь во́ньже пойду́, я́ко к Тебе́ взях ду́шу мою́. 9Изми́ мя от враг мои́х, Го́споди, к Тебе́ прибего́х. 10Научи́ мя твори́ти во́лю Твою́, я́ко Ты еси́ Бог мой. Дух Твой Благи́й наста́вит мя на зе́млю пра́ву. 11И́мене Твоего́ ра́ди, Го́споди, живи́ши мя, пра́вдою Твое́ю изведе́ши от пе́чали ду́шу мою́. 12И ми́лостию Твое́ю потреби́ши враги́ моя́ и погуби́ши вся стужа́ющыя души́ мое́й, я́ко аз раб Твой есмь.

Сла́­ва Отцу́ и Сы́­ну и Свя­то́­му Ду́ху, и ны́­не и при́с­но и во ве́­ки ве­ко́в. Ами́нь.

Алли­лу́иа, алли­лу́иа, алли­лу́иа, сла́­ва Те­бе́, Бо́­же. (три́жды)

И абие тропарь, глас 2:

Ве́лия ве́ры исправле́ния, / во исто́чнице пла́мене, я́ко на воде́ упокое́ния, / святы́й му́ченик Фео́дор ра́довашеся: / огне́м бо всесожже́гся, / я́ко хлеб сла́дкий Тро́ице принесе́ся. / Того́ моли́твами, Христе́ Бо́же, / спаси́ ду́ши на́ша.

Слава. И ныне, Богородичен:

Вся па́че смы́сла, / вся пресла́вная Твоя́, Богоро́дице, та́инства, / чистоте́ запеча́танной, и де́вству храни́му, / Ма́ти позна́лася еси́ нело́жна / Бо́га ро́ждши и́стиннаго. / Того́ моли́ спасти́ся душа́м на́шим.

Канон, глас 8. Творение Иоанна Дамаскина, егоже краестрочие: Бо́жиих тя пою́ даро́в тезоимени́те.

Песнь 1.

Ирмос: Во́ду проше́д я́ко су́шу, / и еги́петскаго зла избежа́в, / изра́ильтянин вопия́ше: / Изба́вителю и Бо́гу на́шему пои́м.

Святый великомучениче Феодоре, моли Бога о нас!

Бо́жия тя рачи́теля, Фео́доре, ве́дый / и любо́вию неизбе́жною твое́ю запе́нся, / ду́шу же и те́ло, и словеса́ похва́л возлага́ю.

Писа́шеся повеле́ние богоме́рзкое, / же́ртву и́долом, а не Живо́му Бо́гу приноси́ти, / но приведе́н был еси́, не пожря́й страстоте́рпче, / Бо́гу же имы́й приведе́н бы́ти.

Слава: Раче́нием Боже́ственным пригвожде́н, Бо́га Вы́шняго / Сы́ну Единоро́дному, Фео́доре му́чениче вво́инился еси́, / и по́честей не погреши́л еси́.

И ныне, Богородичен: Чи́ни Тя а́нгелов и челове́ков Безневе́стная Ма́ти / восхваля́ют непреста́нно: / Соде́теля бо сих, я́ко Младе́нца / во объя́тиих Твои́х носи́ла еси́.

Песнь 3.

Ирмос: Ты еси́ утвержде́ние притека́ющих к Тебе́, Го́споди, / Ты еси́ свет омраче́нных, / и пое́т Тя дух мой.

Пе́ние из усте́н мои́х, / и из боле́зненныя души́ мольбу́ приношу́, / ю́же уще́дри, страстоте́рпче Фео́доре.

Плоть покори́л еси́ Самоде́ржцу, сла́вне му́чениче, уму́, / и обои́ми угожда́еши Созда́вшему.

Слава: Стал еси́ на суди́щи мучи́тельском, / Христа́ Царя́ богосло́вя, / жре́ти бо скве́рным отре́клся еси́, Фео́доре.

И ныне, Богородичен: Тя вси стяжа́хом прибе́жище и сте́ну при́сно христиа́не; / Тя славосло́вим немо́лчно, Безневе́стная.

Песнь 4.

Ирмос: Услы́шах, Го́споди, / смотре́ния Твоего́ та́инство, / разуме́х дела́ Твоя́ / и просла́вих Твое́ Божество́.

Та́ин Боже́ственных вкуси́в, в ра́зуме, му́чениче Фео́доре, / непосты́дную про́поведь Бо́жия рожде́ния испове́дал еси́.

Стра́стное божество́ непщева́ху, страсте́м служа́щии, / и́хже ду́хом изобличи́л еси́, / страда́льче Фео́доре, просвеща́емь.

Слава: Изба́вителя моли́твою, тебе́ воспева́ющим, блаже́нне Фео́доре, / от разли́чных обстоя́ний и страсте́й бы́ти мо́лим.

И ныне, Богородичен: Клас возрасти́вшая животворя́щий, неора́нная ни́во, / подаю́щий ми́рови жизнь, Богоро́дице, / спаси́ пою́щия Тя.

Песнь 5.

Ирмос: У́тренююще вопие́м Ти, / Го́споди, спаси́ ны, / Ты бо еси́ Бог наш, / ра́зве Тебе́ ино́го не ве́мы.

Люби́те возлюби́вшаго Го́спода, / возглаша́л еси́ страда́льче Фео́доре, / стра́ждущим с тобо́ю му́чеником.

Я́ко ре́вностию страстоте́рпче разжиза́яся се́рдцем, / боги́ню лжеимени́тую с тре́бищем попали́л еси́.

Слава: Си́лою непобеди́мою, Фео́доре страстоте́рпче, / ва́рварскую де́рзость, / и моя́ стра́сти погуби́.

И ныне, Богородичен: Де́ву по рождестве́ пое́м Тя, Богоро́дице, / Ты бо Бо́га Сло́ва пло́тию ми́рови родила́ еси́.

Песнь 6.

Ирмос: Очи́сти мя, Спа́се, / мно́га бо беззако́ния моя́, / и из глубины́ зол возведи́, молю́ся, / к Тебе́ бо возопи́х, / и услы́ши мя, / Бо́же спасе́ния моего́.

Коль сла́бое, коль немощно́е, бого́в су́етных шата́ние! / На отмще́ние свое́, челове́ком моля́шеся в стоя́нии побежда́емое, / нело́жных му́чеников пропове́дающих и́стину.

Слава: Укрепи́вся си́лою Бо́жиею, му́чеников сла́во Фео́доре, / му́ки злочести́вых, младе́нец стреля́ния зрел еси́ блаже́нне, / ве́чнующее бу́дущих предзря́.

И ныне, Богородичен: Да изба́вимся от лю́тых прегреше́ний / моли́твами Твои́ми, Богороди́тельнице Чи́стая, / и да улучи́м Всечи́стая Боже́ственнаго осия́ния, / из Тебе́ неизрече́нно воплоти́вшагося Сы́на Бо́жия.

Кондак, глас 8:

Ве́ру Христо́ву я́ко щит внутрь прии́м в се́рдцы твое́м, / проти́вныя си́лы попра́л еси́, многострада́льче, / и венце́м небе́сным венча́лся еси́ ве́чно, Фео́доре, я́ко непобеди́мый.

Песнь 7.

Ирмос: От Иуде́и доше́дше, о́троцы / в Вавило́не иногда́ / ве́рою Тро́ическою пла́мень пе́щный попра́ша, пою́ще: / отце́в Бо́же, благослове́н еси́.

Ура́нен был еси́ те́лом, / за ура́неннаго Сло́ва пло́тию нас ра́ди, / и Сему́ благода́рственно веселя́ся возопи́л еси́, страстоте́рпче Фео́доре: / оте́ц на́ших Бо́же благослове́н еси́.

Я́ко во гро́бе положи́ся, и во́лею запечатле́ся Изба́вителю всех, в темни́це запечатле́нной / всели́лся еси́ вопия́, страстоте́рпче Фео́доре: / оте́ц на́ших Бо́же благослове́н еси́.

Умерщвле́н быв, и стра́сти плотски́я произволе́нием оттря́с, / не сне́дию, страстоте́рпче, но любо́вию Боже́ственною пита́яся пел еси́: / оте́ц на́ших Бо́же благослове́н еси́.

Слава: В темни́це страстоте́рпче, я́коже в пещи́ ю́ноши иногда́, / Еди́н нетле́нныя Тро́ицы тебе́ укрепля́ет, ви́ден быв, вопию́ща: / оте́ц на́ших Бо́же благослове́н еси́.

И ныне, Богородичен: На́ше спасе́ние, я́коже восхоте́л еси́, Спа́се, устро́ити, / во утро́бу Де́вы всели́лся еси́, / Ю́же ми́ру предста́тельницу показа́л еси́, / оте́ц на́ших Бо́же благослове́н еси́.

Песнь 8.

Ирмос: Седмери́цею пещь халде́йский мучи́тель / Богочести́вым неи́стовно ражже́, / си́лою же лу́чшею спасе́ны сия́ ви́дев, / Творцу́ и Изба́вителю вопия́ше: / о́троцы, благослови́те, / свяще́нницы, воспо́йте, / лю́дие, превозноси́те во вся ве́ки.

Ослепле́н умо́м, беззако́нных нача́льник, / богочести́ву тебе́ нечести́вно претя́ше: / что всу́е на челове́ка ну́ждею уме́рша, безу́мне, возложи́л еси́ наде́жду? / Но ты возопи́л еси́: / о́троцы, благослови́те, свяще́нницы, воспо́йте, / лю́дие, превозноси́те во вся ве́ки.

Я́ко смы́сленный и прему́дрый строи́тель благода́ти, / да́нною тебе́ от Бо́га благода́тию, / возопи́л еси́, Фео́доре, повелева́ющему нечести́вно: / сей студ мне и пою́щим бу́ди. / О́троцы благослови́те, свяще́нницы, воспо́йте, / лю́дие, превозноси́те во вся ве́ки.

Слава: Ю́ношески подвиза́лся еси́, де́рзостно изобличи́л еси́: / что безу́мствуеши, – мучи́телю взыва́л еси́, / – повелева́я тва́рем служи́ти ло́жно, оста́вльшим Созда́вшаго? / Но аз воспева́ю: о́троцы, благослови́те, свяще́нницы, воспо́йте, / лю́дие, превозноси́те во вся ве́ки.

И ныне, Богородичен: Плотски́ми изображе́ньми, и разли́чными гана́нии, / и знамена́тельными и образи́тельными изрече́ньми, / Твое́ предвеща́ху богоглаго́ливии Рождество́, / преесте́ственное и чу́дное, Де́во, / те́мже Тя веселя́щеся благоче́стно восхва́ляем, / Христа́ превознося́ще во вся ве́ки.

Песнь 9.

Ирмос: Тя Неискусобра́чную Ма́терь Бо́га Вы́шняго, / Тя па́че ума́ ро́ждшую сло́вом вои́стинну Бо́га, / вы́шшую пречи́стых сил, / немо́лчными славословле́нии велича́ем.

Вещество́ муче́ния твоего́ Бо́жие, Фео́доре, жела́ние. / Те́мже ти и вещество́ бысть веще́ственному те́ло огню́: / и́мже к Боже́ственному ра́дуяся огню́ изше́л еси́, / страстоте́рпче уго́дниче Бо́жий Фео́доре.

Му́чениче всече́стне, попали́в, не попали́лся еси́: / ты бо пре́лесть попали́л еси́, / Бо́гу же предстои́ши живы́й, / и в Нем му́ченически веселя́ся, / страстоте́рпче и уго́дниче Фео́доре.

Слава: Еди́наго Тя зна́ем Христа́, еди́наго от Тро́ицы, / во двою́ соверше́нну естеству́, / лю́ди Твоя́ спаси́ сия́, / я́же стяжа́л еси́ честно́ю Твое́ю кро́вию, / Фео́дора страстоте́рпца моли́твами.

И ныне, Богородичен: Тя неви́димаго Бо́га носи́вшую объя́тии, / на небесе́х воспева́емаго от всея́ си́лы: / и Тобо́ю нам да́руемое вы́ну спасе́ние / во обстоя́нии велича́ем.

Окончание канона

И творим три поклоны великия, с молитвою святаго Ефрема, и прочих 12:

Го́споди и Влады́ко живота́ моего́, дух пра́здности, уны́ния, любонача́лия, и праздносло́вия не даждь ми. (Поклон.)

Дух же целому́дрия, смиренному́дрия, терпе́ния, и любве́, да́руй ми рабу́ Твоему́. (Поклон.)

Ей, Го́споди Царю́, да́руй ми зре́ти моя́ прегреше́ния, и не осужда́ти бра́та моего́, я́ко благослове́н еси́ во ве́ки веко́в, ами́нь. (Поклон.)

Таже малых 12, глаголюще на кийждо поклон: Бо́же, очи́сти мя гре́шнаго.

И паки последи молитву всю:

Го́споди и Влады́ко живота́ моего́, дух пра́здности, уны́ния, любонача́лия, и праздносло́вия не даждь ми. Дух же целому́дрия, смиренному́дрия, терпе́ния, и любве́, да́руй ми рабу́ Твоему́. Ей, Го́споди Царю́, да́руй ми зре́ти моя́ прегреше́ния, и не осужда́ти бра́та моего́, я́ко благослове́н еси́ во ве́ки веко́в, ами́нь. (И поклон един великий.)

Достойно есть яко воистинну блажити Тя, Богородицу, Присноблаженную и Пренепорочную и Матерь Бога нашего. Честне́йшую Херуви́м / и сла́внейшую без сравне́ния Серафи́м, / без истле́ния Бо́га Сло́ва ро́ждшую, / су́щую Богоро́дицу, Тя велича́ем.

Го́споди поми́луй, (трижды.) Сла́ва, и ны́не:

Господи Иисусе Христе, Сыне Божий, молитв ради Пречистыя Твоея Матере, преподобных и богоносных отец наших, святаго великомученика Феодора Тирона и всех святых помилуй нас. Аминь.

Глас 8. Творение Иоанна Дамаскина, егоже краестрочие: Божиих тя пою даров тезоимените.

Песнь 1

Ирмос: Воду прошед:

Божия тя рачителя Феодоре ведый и любовию неизбежною твоею запенся, душу же и тело, и словеса похвал возлагаю.

Писашеся повеление богомерзкое, жертву идолом, а не Живому Богу приносити: но приведен был еси, не пожряй страстотерпче, Богу же имый приведен быти.

Слава: Рачением Божественным пригвожден, Бога Вышняго Сыну Единородному, Феодоре мучениче ввоинился еси, и почестей не погрешил еси.

Богородичен: Чини Тя ангелов и человеков Безневестная Мати восхваляют непрестанно: Содетеля бо сих, яко Младенца во объятиих Твоих носила еси.

Песнь 3

Ирмос: Ты еси утверждение:

Пение из устен моих, и из болезненныя души мольбу приношу, юже ущедри страстотерпче Феодоре.

Плоть покорил еси Самодержцу, славне мучениче, уму, и обоими угождаеши Создавшему.

Слава: Стал еси на судищи мучительском, Христа Царя богословя: жрети бо скверным отреклся еси Феодоре.

Богородичен: Тя вси стяжахом прибежище и стену присно христиане: Тя славословим немолчно Безневестная.

Песнь 4

Ирмос: Услышах Господи:

Таин Божественных вкусив, в разуме мучениче Феодоре, непостыдную проповедь Божия рождения исповедал еси.

Страстное божество непщеваху, страстем служащии, ихже духом изобличил еси, страдальче Феодоре просвещаемь.

Слава: Избавителя молитвою, тебе воспевающим блаженне Феодоре, от различных обстояний и страстей быти молим.

Богородичен: Клас возрастившая животворящий, неоранная ниво, подающий мирови жизнь, Богородице, спаси поющия Тя.

Песнь 5

Ирмос: Утренююще:

Любите возлюбившаго Господа, возглашал еси страдальче Феодоре, страждущим с тобою мучеником.

Яко ревностию страстотерпче разжизаяся сердцем, богиню лжеименитую с требищем попалил еси.

Слава: Силою непобедимою Феодоре страстотерпче, варварскую дерзость, и моя страсти погуби.

Богородичен: Деву по рождестве поем Тя Богородице: Ты бо Бога Слова плотию мирови родила еси.

Песнь 6

Ирмос: Очисти мя Спасе:

Коль слабое, коль немощное, богов суетных шатание! На отмщение свое, человеком моляшеся в стоянии побеждаемое, неложных мучеников проповедающих истину.

Слава: Укрепився силою Божиею, мучеников славо Феодоре, муки злочестивых, младенец стреляния зрел еси блаженне, вечнующее будущих предзря.

Богородичен: Да избавимся от лютых прегрешений молитвами Твоими Богородительнице Чистая, и да улучим Всечистая Божественнаго осияния, из Тебе неизреченно воплотившагося Сына Божия.

Кондак, глас 8:

Веру Христову яко щит внутрь приим в сердцы твоем, противныя силы попрал еси многострадальче, и венцем небесным венчался еси вечно Феодоре, яко непобедимый.

Песнь 7

Ирмос: От Иудеи дошедше:

Уранен был еси телом, за ураненнаго Слова плотию нас ради, и Сему благодарственно веселяся возопил еси, страстотерпче Феодоре: отец наших Боже благословен еси.

Яко во гробе положися, и волею запечатлеся Избавителю всех, в темнице запечатленной вселился еси, вопия страстотерпче Феодоре: отец наших Боже благословен еси.

Умерщвлен быв, и страсти плотския произволением оттряс, не снедию страстотерпче, но любовию Божественною питаяся пел еси: отец наших Боже благословен еси.

Слава: В темнице страстотерпче, якоже в пещи юноши иногда, Един нетленныя Троицы тебе укрепляет, виден быв, вопиюща: отец наших Боже благословен еси.

Богородичен: Наше спасение, якоже восхотел еси Спасе устроити, во утробу Девы вселился еси, Юже миру предстательницу показал еси: отец наших Боже благословен еси.

Песнь 8

Ирмос: Седмерицею пещь:

Ослеплен умом, беззаконных начальник, богочестиву тебе нечестивно претяше: что всуе на человека нуждею умерша, безумне, возложил еси надежду? Но ты возопил еси: отроцы благословите, священницы воспойте, людие превозносите во вся веки.

Яко смысленный и премудрый строитель благодати, данною тебе от Бога благодатию, возопил еси Феодоре, повелевающему нечестивно: сей студ мне и поющим буди: отроцы благословите, священницы воспойте, людие превозносите во вся веки.

Слава: Юношески подвизался еси, дерзостно изобличил еси: что безумствуеши, мучителю взывал еси, повелевая тварем служити ложно, оставльшим Создавшаго? Но аз воспеваю: отроцы благословите, священницы воспойте, людие превозносите во вся веки.

Богородичен: Плотскими изображеньми, и различными ганании, и знаменательными и образительными изреченьми, Твое предвещаху богоглаголивии Рождество, преестественное и чудное Дево: темже Тя веселящеся благочестно восхваляем, Христа превозносяще во вся веки.

Песнь 9

Ирмос:Тя Неискусобрачную:

Вещество мучения твоего, Божие Феодоре желание. Темже ти и вещество бысть вещественному тело огню: имже к Божественному радуяся огню изшел еси, страстотерпче угодниче Божий Феодоре.

Мучениче всечестне, попалив, не попалился еси: ты бо прелесть попалил еси, Богу же предстоиши живый, и в Нем мученически веселяся страстотерпче, и угодниче Феодоре.

Слава: Единаго Тя знаем Христа, единаго от Троицы, во двою совершенну естеству, люди Твоя спаси сия, яже стяжал еси честною Твоею кровию, Феодора страстотерпца молитвами.

Богородичен: Тя невидимаго Бога носившую объятии, на небесех воспеваемаго от всея силы: и Тобою нам даруемое выну спасение во обстоянии величаем.

Ирмос: Тя Неискусобрачную Матерь Бога Вышняго: Тя паче ума рождшую словом воистинну Бога, вышшую пречистых сил, немолчными славословлении величаем.

Оценка 4 проголосовавших: 4
ПОДЕЛИТЬСЯ

ОСТАВЬТЕ ОТВЕТ

Please enter your comment!
Please enter your name here