Кондак богородице предстательство христиан

01 В праздники Богородичные (тропари, кондаки, молитва и величания)

Тропарь, глас 4:

К Богоро́дице приле́жно ны́не притеце́м,/ гре́шнии и смире́ннии, и припаде́м,/ в покая́нии зову́ще из глубины́ души́:/ Влады́чице, помози́, на ны милосе́рдовавши,/ потщи́ся, погиба́ем от мно́жества прегреше́ний,/ не отврати́ Твоя́ рабы́ тщи,// Тя бо и Еди́ну наде́жду и́мамы.

Р

Молитва иконе Пресвятой Богородицы Экономисса

Июль 17th 2014 –

Тропарь, глас 4
Предстательство страшное и непостыдное, / не презри, Благая, молитв наших, Всепетая Богородице, / Милостивая верных Домостроительнице, / утверди православных жительство, / спаси страну нашу и всех православно живущих в ней защити, / зане родила еси Бога, // Едина Благословенная.

Кондак, глас 6
Предстательство христиан непостыдное, / ходатайство ко Творцу непреложное, / не презри грешных молений гласы, / но предвари, яко Благая, на помощь нас, верно зовущих Ти; / ускори на молитву и потщися на умоление, // предстательствующи присно, Богородице, чтущих Тя.

Величание Величаем Тя, Пресвятая Дево, и чтим образ Твой святый, имже болезни наша врачуеши и души наша к Богу возводиши.

Молитва

О Пречистая Владычице Богородице, Всечестнейшая наша Мати Игумение всех православных святых обителей иноческаго жития, во Святей Горе Афонстей и по всей вселенней сущих! Приими смиренная моления наша и принеси я ко всещедрому Богу нашему, да спасет души наша Своею благодатию. Воззри на ны милосердным Твоим оком и соверши Сама о Господе наше спасение, понеже без милости Спаса нашего и Твоего святаго о нас ходатайства не возможем окаяннии совершити своего спасения, яко окаляхом житие наше в суетах мирских, ибо время приближися жатвы Христовы и день Страшнаго Суда приспе. Мы же, окаяннии, погибаем в бездне греховней нерадения ради нашего, по реченному от святых отцев, первоначальников ангельскаго во плоти жития, яко последнии монаси нерадением жития своего уподобятся мирским человеком, еже и сбысться днесь, ибо последнее иночество наше плавает житием своим в мори житейском, посреде великия бури и непогоды, ибо наша святыя обители во прасе пребывают, грехов бо ради наших всеправедный Судия Господь наш Иисус Христос тако благоволи, мы же, недостойнии, не имамы, где главы подклонити.

О сладчайшая наша Мати Игумение! Собери ны, разсеянное стадо Христово, воедино и спаси православное монашество последняго века сего, и всех православных христиан сподоби райския жизни со ангелы и всеми святыми во Царствии Христа Бога нашего, Емуже честь и слава, со Безначальным Его Отцем и со Пресвятым, Благим и Животворящим Его Духом во веки веков. Аминь.

Метки: Богородица

Главная –> Молитвы –> Тропари Пресвятой Богородице

Тропарь Пресвятой Богородице.

Тропарь, глас 4:
К Богородице прилежно ныне притецем, грешнии и смиреннии, и припадем, в покаянии зовуще из глубины души: Владычице, помози, на ны милосердовавши: потщися, погибаем от множества прегрешений, не отврати Твоя рабы тщи, Тя бо и едину надежду имамы.

Кондак, глас 6:
Предстательство христиан непостыдное ходатайство ко Творцу непреложное, не презри грешных молений гласы, но предвари, яко Благая, на помощь нас, верно зовущих Ти: ускори на молитву, и потщися на умоление. предстательствующи присно, Богородице, чтущих Тя.

Ин кондак, глас 8:
Взбранной Воеводе победительная, яко избавльшеся от злых, благодарственная восписуем Ти раби Твои, Богородице, но яко имущая державу непобедимую, от всяких нас бед свободи, да зовем Ти: радуйся, Невесто Неневестная. Преславная Приснодево, Мати Христа Бога принеси нашу молитву Сыну Твоему и Богу нашему, да спасет Тобою души наша. Все упование мое на Тя возлагаю, Мати Божия, сохрани мя под кровом Твоим. Богородице Дево, не презри мене грешнаго, требующа Твоея помощи и Твоего заступления, на Тя бо упова душа моя, и помилуй мя.

Припевы:
Спаси от бед рабы Твоя, Богородице, яко вси по Бозе к Тебе прибегаем, яко нерушимей стене и предстательству. Призри благосердием, Всепетая Богородице, на мое лютое телесе озлобление, и исцели души моея болезнь.

Величание:
Величаем Тя, Пресвятая Дево, Богоизбранная Отроковице, и чтим образ Твой святый, имже точиши исцеления всем с верою притекающим.

Тропари.

Тропарь Пресвятой Богородице перед Ея иконой, именуемой «Ахтырская»

Тропарь, глас 4:
Преблагословенная Дево, Богородительнице Чистая, у Креста Сына Твоего и Бога нашего предстоящи, скорбь велию претерпела еси и благодать от Него прияла еси сущия в скорбех утешати. Темже на пречистый образ Твой благоговейно взирающе и изображенную Тя на нем пред Крестом Спаса нашего видяще, умиленно к Тебе вопием: Заступнице усердная, благая и милостивая! Ускори избавити ны от всякия скорби, нужды и болезни и спаси души наша, да Тя со благодарением славим во веки.

Тропарь Пресвятой Богородице перед Ея иконой, именуемой «Балыкинской»

Тропарь, глас 4:
Заступнице земли Российския от нашествия Свейскаго и непрестанная за нас Молитвеннице, мир земли и душам нашим у Господа испроси, да святится в нас Имя Божие во веки.

Тропарь Пресвятой Богородице перед Ея иконой, именуемой «Благодатное небо»

Тропарь, глас 6:
Что Тя наречем, о Благодатная Небо — яко возсияла еси Солнце Правды; рай? — яко прозябла еси Цвет нетления; Деву? — яко пребыла еси нетленна; Чистую Матерь? — яко имела еси на святых Твоих объятиях Сына, всех Бога. Того моли спастися душам нашим.

Тропарь Пресвятой Богородице перед Ея иконой, именуемой «Боголюбская (Боголюбивая)»

Тропарь, глас 1:
Боголюбивая Царице, неискусомужная Дево Богородице Марие! Моли за ны Тебе Возлюбившаго и рождашагося от Тебе Сына Твоего Христа Бога нашего, подати нам оставление прегрешений, и мирови мир, земли плодов изобилие, пастырем святыню и всему человечу роду спасение. Грады наша и страны Российския от нахождения иноплеменных заступи и от междуусобныя брани сохрани. О Мати Боголюбивая Дево! О Царице Всепетая! Ризою Твоею покрый нас от всякаго зла, от видимых и невидимых враг защити, и спаси души наша.

Величание:
Величаем Тя, Пресвятая Дево, и чтим образ Твой святый, егоже благоверный князь Андрей даде нам на враги в победу и всем верным во спасение.

Тропарь Пресвятой Богородице перед Ея иконой, именуемой «Взыскание погибших»

Тропарь, глас 4:
Взыщи нас погибающих, Пресвятая Дево, не по грехом бо нашим наказуеши нас, но по человеколюбию милуеши: избави нас от ада, болезни и нужды, и спаси нас.

Тропарь, глас 7:
Радуйся, Благодатная Богородице Дево, во объятиях Своих Предвечнаго Младенца и Бога носившая. Проси Его дати миру умирение и душам нашим спасение. Сын бо Тебе, Богомати, вещает, яко вся прошения Твоя во благое исполнит. Сего ради и мы припадающе, молим Тя и надеющиися на Тя, да не погибнем, имя Твое именуем: Ты бо еси, Владычице, Взыскание погибших.

Тропарь Пресвятой Богородице перед Ея иконой, именуемой Владимирской

Тропарь, глас 4:
Днесь светло красуется славнейший град Москва, яко зарю солнечную восприимши, Владычице, чудотворную Твою икону, к ней же ныне мы притекающе и молящеся, Тебе взываем сице: о, пречудная Владычице Богородице, молися из Тебе воплощенному Христу Богу нашему, да избавит град сей и вся грады и страны христианския невредимы от всех навет вражиих, и спасет души наши, яко Милосерд.

Кондак, глас 8:
Взбранной Воеводе победительная, яко избавльшеся от злых пришествием Твоего честнаго образа, Владычице Богородице светло сотворяем празднество сретения Твоего и обычно зовем Ти: радуйся, Невесто Неневестная.

Тропарь Пресвятой Богородице перед Ея иконой, именуемой «Всеблаженная»

Тропарь, глас 4:
Торжество днесь празднуем светлое, се бо предлежит, о Всеблаженная, икона Твоя Всечестная, к ней же любовию сердца вси приходяще, Владычице, поклоняемся и тепло Тебе вопием: избави нас от бед и обстояний.

Тропарь Пресвятой Богородице перед Ея иконой, именуемой «Всех скорбящих Радость»

Стихира, глас 2:
Всех скорбящих радосте, и обидимых заступнице, и алчущих питательнице, странных утешение, обуреваемых пристанище, больных посещение, немощных покрове и заступнице, жезле старости, Мати Бога Вышняго Тя еси, Пречистая: потщися, молимся, спастися рабом Твоим.

Кондак, глас 6:
Не имамы иныя помощи, не имамы иныя надежды, разве Тебе, Пречистая Дево. Ты нам помози, на Тебе надеемся, и Тобою хвалимся. Твои бо есмы рабы, да не постыдимся.

Тропарь Пресвятой Богородице перед Ея иконой, именуемой «Всецарица»

Тропарь, глас 4:
Образом радостотворным честныя Всецарицы, желанием теплым взыскающих благодати Твоея, спаси, Владычице; избави от обстояний к Тебе прибегающих, от всякия напасти огради стадо Твое, к заступлению Твоему взывающее присно.

Тропарь Пресвятой Богородице перед Ея иконой, именуемой «Гребневская»

Тропарь, глас 8:
Днесь, яко солнце пресветло, просия в Российстей стране, в конце ея полуденнем, всечестная икона Твоя, Владычице, юже благоверный великий князь Димитрий в град Москву принесе. Светло празднуем, благовернии людие, честнаго образа пришествие, молящеся прилежно: Владычице Богородице, молися Сыну Твоему, Христу Богу нашему, избавити град Москву, страну нашу и вся православныя христианы от варварскаго пленения, и междоусобныя брани, и всех навет вражиих, Тебе бо Едину Заступницу имамы.

Тропарь к пресвятой Богородице перед Ея иконой, именуемой «Грузинская»

Тропарь, глас 4:
От святая иконы Твоея, о Владычице Богородице, спасение и цельбы подаются обильно всем с верою и любовию приходящым. Еюже и мою немощь посети, и душу мою помилуй, Благая, и тело мое изцели благодатию Твоею, Пречистая. Аминь.

Ин тропарь, глас 4:
Днесь светло красуется Раифская пустынь, яко зарю солнечную, от востока возсиявшую, восприимше, Владычице, чудотворную Твою икону: еюже разгоняеши мглу искушений и бед от вопиющих верно: избави обитель нашу и вся страны христианския от всех навет вражиих и спаси души наша, яко милосердная Заступница рода христианскаго. Аминь.

Кондак, глас 7:
Тебе, избранной от всех родов, Божией Матери благодарственная пения приносим, пришествием честные Твоея иконе раби Твои, Богородице, озаряеми, но яко имущая державу непобедимую, от всяких нас бед свободи да зовем Ти: Радуйся, Невесто Неневестная.

Тропарь Пресвятой Богородице перед Ея иконой, именуемой «Державная»

Тропарь, глас 8:
Ангелов лицы благоговейно Тебе служат и вся Небесныя силы немолчными гласы Тя ублажают, Богородице Дево; усердно молим Тя, Владычице, да пребудет Божественная благодать на честней иконе Твоей «Державней», и светозарный луч славы чудес Твоих да нисходит от Нея на всех с верою Тебе молящихся и вопиющих Богу. Аллилуиа.

Тропарь, глас 4:
Града Сионска взыскующе, под Твой покров, Дева Чистая, днесь притекаем, и никтоже возможет на ны, яко несть град силен, аще не Сущаго Бога, и несть ина крепость, аще не милость Владычицы Девы.

Величание:
Величаем Тя, Пресвятая Дево, Богоизбранная Отроковице, и чтим Державный образ святыни Твоея, имже подаеши велию милость всем, с верою к нему притекающим.

Тропарь Пресвятой Богородице перед Ея иконой, именуемой «Достойно есть» («Милующая»)

Тропарь, глас 4:
Притецем, вернии, со дерзновением к Милующей Царице Богородице и умиленно воззовем к Ней: низпосли на ны милости Твоя богатыя: град сей избави от всякаго обстояния, мир даруй мирови и спасение душам нашим.

Тропарь Пресвятой Богородице перед Ея иконой, именуемой «Елецкая» (Владимирская)

Тропарь, глас 4:
Днесь светло красуется древний град Елец, поминающе славное чудо Пресвятыя Богородицы: егда бо на стогнах Первопрестольныя Москвы икону Ея чудную людие московстии сретаху, тогда Сама, Владычице, на горе Аргамачстей во граде Ельце, на сретение нечестивому Тамерлану изшедше, грозное его нашествие вспять обрати. Сего дивнаго явления изображение на новописанней иконе зряще и Заступницу нашу за вся благодеяния Ея благодаряще, умильно Ей взываем: и в предняя не остави нас, о Мати Милосердая.

Тропарь Пресвятой Богородице перед Ея иконой, именуемой «Елецкая» (Черниговская)

Тропарь, глас 6:
Твоего милосердия дарования воспоминающе, Владычице, и Твой чудотворный образ благоговейно лобызающе, упованием же Твоея помощи сердца наша веселяще, аки среди нас пребывающую Тя помышляем и верою Тебе вопием: Твоего моли Сына и Господа, да научит нас заповеди Его всегда творити и злыя искушения побеждати, и Тебе Предстательницу нашу, достойно пети и славити во веки.

Тропарь Пресвятой Богородице перед Ея иконой, именуемой «Живоносный Источник»

Тропарь, глас 4:
Днесь притецем вернии к Божественному и цельбоносному образу Пресвятая Богородицы, излиявшия капли своих излияний, и людем верным чудесе показавшия, яже мы видяще и слышаще духовно празднуем и любезно вопием: исцели наши недуги и страсти, якоже и каркинския и тмочисленныя страсти исцелила еси; темже молим Тя Дево Пречистая, моли воплощеннаго из Тебе Христа Бога нашего спастися душа нашим.

Тропарь, глас 4:
Почерпем, человецы, цельбы душам и телом молитвою, Река бо всем предтечет — Пречистая Царица Богородица, источающи нам чудную воду и измывающи сердец черности, греховныя струпы очищающи, души же освящающи верных Божественною благодатию.

Тропарь Пресвятой Богородице перед Ея иконой, именуемой «Жировицкая»

Тропарь, глас 5:
Пред святою Твоею иконою, Владычице, молящиися исцелений сподобляются, веры истинныя познание приемлют и агарянская нашествия отражают. Темже и нам, к Тебе припадающим, грехов оставления испроси, помыслами благочестия сердца наша просвети и к Сыну Твоему молитву вознеси о спасении душ наших.

Величание:
Величаем Тя, Пресвятая Дево, и почитаем честную икону Твою, юже от лет древних во обители Жировицкой прославила еси.

Тропарь Пресвятой Богородице перед Ея иконой, именуемой «Знамение» (Новгородская)

Тропарь, глас 4:
Яко необоримую стену и источник чудес стяжавше Тя раби Твои, Богородице Пречистая, сопротивных ополчения низлагаем; темже молим Тя: мир граду Твоему даруй и душам нашим велию милость.

Кондак, глас 4:
Честнаго образа Твоего знамение празднующе людие Твои, Богородительнице, имже дивную победу на сопротивных граду Твоему даровала еси; темже Тебе верою взываем: радуйся, Дево, христиан похвало.

Величание:
Величаем Тя, Пресвятая Дево, Богоизбранная Отроковице, и чтим образ Твой святый, имже дивную победу на сопротивныя граду Твоему даровала еси.

Тропарь Пресвятой Богородице перед Ея иконами, именуемыми «Знамение»

Тропарь, глас 4:
Яко необоримую стену и источник чудес стяжавше Тя раби Твои, Богородице пречистая, сопротивных ополчения низлагаем. Темже молим Тя: мир граду Твоему даруй и душам нашим велию милость.

Кондак, глас 4:
Честнаго образа Твоего знамение празднующе, людие Твои, Богородительнице, имже дивную победу на сопротивныя граду Твоему даровала еси. Темже Тебе верою взываем: радуйся, Дево, христиан похвало.

Величание:
Величаем Тя, Пресвятая Дево, и чтим образ Твой честный, имже показала еси преславное знамение.

Тропарь Пресвятой Богородице перед Ея иконой, именуемой «Иверская»

Тропарь, глас 1:
От святыя иконы Твоея, о Владычице Богородице, исцеления и цельбы подаются обильно с верою и любовию приходящим к ней: тако и мою немощь посети, и душу мою помилуй, Благая, и тело исцели благодатию Твоею, Пречистая.

Кондак, глас 8:
Аще и в море ввержена бысть святая икона Твоя, Богородице, от вдовицы не могущия спасти сию от врагов, но явилася есть хранительница Афона и вратарница обители Иверския, враги устрашающая и в православной Российстей стране чтущия Тя от всех бед и напастей избавляющая.

Тропарь Пресвятой Богородице перед Ея иконой, именуемой «Иверская-Монреальская»

Тропарь, глас 7:
От святыя иконы Твоея, о Владычице Богородице, миро благодатное источила еси обильно, верныя Твоя во изгнании сущия утешила еси и неверныя светом Сына Твоего просветила еси. Темже и припадаем к Тебе, Госпоже, со слезами: милостива нам буди в час судный, да некако толикую милость Твою восприявше, яко презорливи наказани будем, но подаждь нам Твоими молитвами плод духовный принести и спаси души наша.

Тропарь Пресвятой Богородице перед Ея иконой, именуемой «Иерусалимская»

Тропарь, глас 3:
Твоего предстательства уверение и милосердия Твоего явление икона Иерусалимская нам, Владычице, показася пред нею же души наша в молитве изливаем и верою Тебе вопием: воззри, Милосердая, на люди Твоя, вся скорби наша и печали утоли, утешение благое в сердца наша низпосли и спасение вечное душам нашим, Пречистая, испроси.

Тропарь Пресвятой Богородице перед Ея иконой, именуемой «Избавительница»

Тропарь, глас 4:
Яко пресветлая звезда, просия Божественными чудесы святый образ Твой, Избавительнице, лучами благодати и милосердия Твоего озарив в нощи скорбей сущих. Подаждь убо и нам, Всеблагая Дево, избавление от бед, исцеление недугов душевных и телесных, спасение и велию милость.

Тропарь Пресвятой Богородице перед Ея иконой, именуемой «Избавление от бед страждущих»

Тропарь, глас 4:
Яко пресветлая звезда просия Божественными чудесы святый Твой образ, лучами благодати и милосердия Твоего озарив в нощи скорбей. Подаждь убо и нам, Всеблагая Дево, Избавление от бед страждущих, исцеление недугов душевных и телесных, спасение и велию милость.

Кондак, глас 8:
Ко иконе Твоей, Пресвятая Госпоже, бедствующие с верою притекают, заступлением Твоим избавляемые от злых, но яко Мати Христа Бога и нас свободи от лютых обстояний, временных и вечных, да зовем Ти: Радуйся, Избавление страждущих от всех бед.

Тропарь Пресвятой Богородице перед Ея иконой, именуемой «Изборская»

Тропарь, глас 4:
Яко звезда пресветлая, возсия во граде Изборске образ честный Твой, Богородице Дево, от негоже иногда из обою очию течаху слезы, яко струя, егоже тогда видевше, народи изборстии, мужи и жены с чады, с плачем моляхуся к нему, мы же, взирающе умильно, сице глаголем: о Пресвятая Владычице Богородице, не забуди нас, грешных раб Своих, молящихся Христу, Богу нашему, спастися нам.

Тропарь Пресвятой Богородице перед Ея иконой, именуемой «Казанская»

Тропарь, глас 4:
Заступнице усердная, Мати Господа Вышняго, за всех молиши Сына Твоего, Христа Бога нашего, и всем твориши спастися, в державный Твой покров прибегающих. Всех нас заступи, о Госпоже Царице и Владычице, и же в напастех и скорбех и в болезнех, обремененных грехи многими, предстоящих и молящихся Тебе умиленною душею и сокрушенным сердцем пред пречистым Твоим образом со слезами, и невозвратно надежду имущих на Тя, избавления всех зол, всем полезная даруй и вся спаси, Богородице Дево: Ты бо еси Божественный покров рабом Твоим.

Кондак, глас 8:
Притецем, людие, к тихому сему и доброму пристанищу, скорой Помощнице, готовому и теплому спасению, покрову Девы: ускорим на молитву и потщимся на покаяние: источает бо нам неоскудныя милости Пречистая Богородица, предваряет на помощь и избавляет от великих бед и зол благонравныя и богобоящияся рабы Своя.

Величание:
Величаем Тя, Пресвятая Дево, Богоизбранная Отроковице, и чтем образ Твой святый, имже точиши исцеления всем с верою притекающым.

Тропарь Пресвятой Богородице перед Ея иконой, именуемой «Калужская»

Тропарь, глас 4:
Заступнице от враг иноплеменных Необоримая Калужския земли, и Избавительнице от смертоносныя язвы Милостивая! Избави рабы Твоя от всяких бед и болезней, с верою и любовию прибегающия к чудотворней иконе Твоей, и спаси души наша.

Величание:
Величаем Тя, Богородице Дево, и почитаем чудотворную икону Твою, еюже благоволила еси спасти землю Калужскую от нашествий вражиих и всегубительных болезней.

Тропарь Пресвятой Богородице перед Ея иконой, именуемой «Касперовская»

Тропарь, глас 4:
Днесь, благовернии людие, светло празднуем, осеняеми Твоим, Богомати, пришествием, и, к Твоему взирающе Пречистому образу, умильно глаголем: покрый нас честным Твоим покровом и избави нас от всякаго зла, молящи Сына Твоего, Христа Бога нашего, спасти души наша.

Кондак, глас 3:
Дева днесь предстоит в церкви и с лики святых невидимо за ны молится Богу Ангели со архиереи покланяются, апостоли же со пророки ликовствуют: нас бо ради молит Богородица Превечнаго Бога.

Тропарь Пресвятой Богородице перед Ея иконой, именуемой «Киево-Печерская (Успение)

Тропарь, глас 4:
Днесь светло торжествует Печерская обитель и радуется явлением образа Богоматере безмерный лик Печерских отцев, с нимиже и мы непрестанно вопием: радуйся, Благодатная, Печерская похвало.

Тропарь Пресвятой Богородице перед Ея иконой, именуемой «Козельщанская»

Тропарь, глас 4:
Веселися земле Полтавская, и все Отечество наше православное: се бо яко светозарное солнце, явися пречудная икона Твоя, Преблагословенная Богомати, Мир озаряющи множеством чудес Своих, Тою убо обретаем яже на земли вся благая и полезная, и сущих на небеси сокровищ сподобляемся. Сего ради вопием Ти: радуйся, Похвало наша приснопокланяемая, спаси ны, Тебе молящияся, Едина Надежда и Радование вечное поющих Тя.

Тропарь Пресвятой Богородице перед Ея иконой, именуемой «Коневская»

Тропарь, глас 1:
Возсия нам, яко солнце светозарное от востока в велелепии, Твоя, Владычице, икона, озаряющи чудес сиянием преславно всех, выну приходящих к ней с верою и любовию и молящихся усердно Твоему, еже о Сыне Твоем и Бозе, величию. Слава Богу, Арсением сию давшему нам, слава возвратившему от Новаграда, слава Действующему тою всем исцеления.

Тропарь Пресвятой Богородице перед Ея иконой, именуемой «Любечская»

Тропарь, глас 4:
Преблагословенная Царице, Пречистая Дево Богородице, прославльшая град Любеч угодника Твоего преподобнаго Антония Печерскаго рождением и чудотворныя иконы Твоея явлением, молим Тя, Всеблагая: моли за ны рождшагося от Тебе Царя, Христа Бога нашего, и Матерним Твоим к Нему предстательством избави нас от всякаго зла, недуги наша исцели, печали наша утоли и наследники яви нас Царствия Небеснаго, яко Милосердна.

Тропарь Пресвятой Богородице перед Ея иконой, именуемой «Максимовская»

Тропарь, глас 4:
Днесь светло красуется славнейший град Владимир, радостно совершая, Владычице, праздник явления Твоего святителю Максиму, в нем бывшаго, о немже ныне воспоминающе и молящеся Тебе, взываем сице: о Пречудная Владычице Богородице, молися Превечному Архиерею — Сыну Твоему, да непоколебиму утвердит Церковь Православную, град наш Владимир и всю Русскую землю в мире сохранит и спасет в правоверии души наша.

Величание:
Величаем Тя, Пресвятая Дево, и чтим образ Твой святый, егоже святитель Максим даде граду Владимиру в покров и всем верным во спасение.

Тропарь Пресвятой Богородице перед ея иконой, именуемой «Милостивой»

Тропарь, глас 1:
Притецем, людие, со дерзновением к Милостивой Царице Богородице, и умиленно воззовем к Ней: ниспослй, Владычице, милости Твоя богатыя, сохраняя во здравии и благоденствии грешныя рабы Твоя. Болящия исцели, скорбящия утеши и бедствующим помозй. И сподоби нас, Премилостивая, благочестно житие сие земное скончати, христианскую непостыдную кончину получите и Небесное Царствие унаследовати. Град наш избави от всякаго злаго обстояния, ограждая Твоим Милостивым заступлением. Мйрови мир даруй и спасение душам нашим испроси.

Тропарь Пресвятой Богородице перед Ея иконой, именуемой «Минская»

Тропарь, глас 5:
На древе крестнем явилася еси, Пренепорочная Отроковице, от Царьграда и Киева Богоспасаемому граду Минску милость показавши. Просвети нас, грешных, сиянием Своим, яви, яко присно, силу Свою, спаси нас предстательством Своим и избавляй от навет вражиих, Тя бо Необоримую Стену и едину Надежду имамы.

Тропарь Пресвятой Богородице перед Ея иконой, именуемой «Мирожская»

Тропарь, глас 4:
Яко звезда пресветла возсия в Российской земли от иконы честнаго образа Твоего, Богородице Дево, из обою очию текущи слезы Твоя, яко река, и видевше народи псковскии, мужи и жены и с чады, с плачем молящеся образу Твоему, сице глаголюще: О Пресвятая Владычице Богородице, не забуди грешных раб Твоих, молящися Христу Богу нашему спастися нам.

Величание:
Величаем Тя, Пресвятая Дево, Богоизбранная Отроковице, и чтем образ Твой честный, имже показала еси пречудное знамение.

Тропарь Пресвятой Богородице перед Ея иконой, именуемой «Млекопитательница»

Тропарь, глас 3:
Без семене от Божественного Духа волею же Отчею, зачала еси Сына Божия. От Отца без матере прежде век суща, нас же ради из Тебе без отца бывша плотию познала еси Младенца и млеком питала еси. Темже не престай молити избавитися от скорбей душам нашим.

Величание:
Величаем Тя, Пресвятая Дево, Млекопитательнице Спаса нашего, и чтим образ Твой святый, от негоже благодать исцеления нам присно подаеши.

Тропарь Пресвятой Богородице перед Ея иконой, именуемой «Муромская»

Тропарь, глас 4:
Днесь светло красуется град Муром, яко зарю солнечную восприемши Владычице, чудотворную Твою икону, к ней же ныне мы притекающе и молящеся Тебе взываем сице: о, Пречудная Владычице Богородице, молися из Тебе воплощенному Христу Богу нашему, да избавит град сей и вся грады и страны христианския невредимы от всех навет вражиих, и спасет души наша, яко милосерд!

Тропарь Пресвятой Богородице перед Ея иконой, именуемой «Неопалимая Купина»

Тропарь, глас 4:
Иже в купине, огнем горящей и несгораемой, показавый Моисеови Пречистую Твою Матерь, Христе Боже, огнь Божества неопальне во чреве приимшую, и нетленну по Рождестве пребывшую: Тоя молитвами пламене страстей избави нас, и от огненных запалений град Твой сохрани, яко Многомилостив.

Тропарь Божией Матери перед Ея иконой, именуемой «Нерушимая Стена»

Тропарь, глас 4:
К Богородице прилежно ныне притецем, грешнии н смиреннии, и припадем, в покаянии зовуще из глубины души: Владычице, помози, на ны милосердовавши, потщися, погибаем от множества прегрешений, не отврати Твоя рабы тщи, Тя бо и едину надежду имамы.

Тропарь, глас 4:
Яко нерушимую стену и всемощный покров стяжахом Тя, раби Твои, Владычице Богородице, мрак грехов и скорбей отгоняющую. Темже вопием Ти: мир мирови даруй и душам нашим свет и спасение.

Тропарь Пресвятой Богородице перед Ея иконой, именуемой «Неувядаемый Цвет»

Тропарь, глас 5:
Радуйся, Богоневесто, жезле тайный, Цвет Неувядаемый процветший, радуйся, Владычице, Еюже радости наполняемся и жизнь наследствуем.

Тропарь Пресвятой Богородице перед Ея иконой, именуемой «Неупиваемая Чаша»

Тропарь, глас 4:
Днесь притецем вернии к Божественному и пречудному образу Пресвятыя Богоматери, напояющей верных сердца небесною Неупиваемою Чашею Своего милосердия и людем верным чудеса показующей. Яже мы видяще и слышаще духовно празднуем и тепле вопием: Владычице премилостивая, исцели наша недуги и страсти молящи Сына Твоего Христа Бога нашего спасти души наша.

Тропарь Пресвятой Богородице перед Ея иконой, именуемой «Нечаянная радость»

Тропарь, глас 4:
Днесь, вернии людие, духовно торжествуем, прославляюще Заступницу усердную рода христианскаго, и притекающе к Пречистому Ея образу, взываем сице: О премилостивая Владычице Богородице, подаждь нам нечаянную радость, обремененным грехми и скорбьми многими, и избави нас от всякаго зла, молящи Сына Твоего, Христа Бога нашего, спасти души наша.

Тропарь Пресвятой Богородице перед Ея иконой, именуемой «Никейская»

Тропарь, глас 4:
Бысть чрево Твое святая трапеза, имущи Небеснаго Хлеба, Христа, от Негоже всяк ядый не умирает, якоже рече всяческих, Богородице, Питатель.

Тропарь Пресвятой Богородице перед Ея иконой, именуемой «Озерянская»

Тропарь, глас 3:
Твоего предстательства уверение и милосердия Твоего явление икона Озерянская нам, Владычице, показася; пред неюже души наша в молитве изливаем и верою Тебе вопием: воззри, Милосердая, на люди Твоя, вся скорби наша и печали утоли, утешение благое в сердца наша низпосли и спасение вечное душам нашим, Пречистая, испроси.

Тропарь Пресвятой Богородице перед Ея иконой, именуемой «Оковецкой»

Тропарь, глас 4:
Предстательнице нератная, о Одигитрие готовая! Тверския земли и града Москвы красота и слава, днесь в кров Твой вси прибегаем и умильно вопием Твоему крепкому заступлению, просяще избавления от злых наветников православия, присно борющих нас, и получити, Богородительнице Чистая, токи неисчерпаемых чудесных исцелений от Твоея пречудныя иконы молитвой предстоящего пред Тобою Мирликийского чудотворца Николая да усердно вси Твое проповемы наше ограждение.

Кондак, глас 4:
Яко стену необоримую, источник милосердия, упование земным и заступление, Мати всяческих Творца Всесветлая, Тя стяжавши, раби Твои Богоотроковице, на мольбу нашу ныне умилосердися иже от врагов православия насилование скоро и невозвратно разори мечем божественныя Твоея и святителя Николая молитвами и не остави прославляющия люди и стада Твоя погибнути, яко вся возможно Тебе, чистая Богородице Неискусобрачная и Мати Зиждителя сущи и Всепетая, да усердно вси Твое проповемы наше ограждение.

Величание:
Величаем Тя, Пресвятая Дево, и чтим образ Твой святый, от него же истекает благодатная помощь всем, с верою притекающих к нему.

Тропарь Пресвятой Богородице перед Ея иконой, именуемой «Песчанская»

Люди верные со дерзновением притецем к чудотворному образу Богоматери Песчанской, ибо она дарует граду сему и стране нашей велию милость и спасение душам нашим.

Тропарь Пресвятой Богородице перед Ея иконой, именуемой «Почаевская»

Тропарь, глас 5:
Пред святою Твоею иконою, Владычице, молящиися исцелений сподобляются, веры истинныя познание приемлют и агарянская нашествия отражают. Темже и нам, к Тебе припадающим, грехов оставление испроси, помыслы благочестия сердца наша просвети, и к Сыну Твоему молитву вознеси о спасении душ наших.

Величание:
Величаем Тя, Пресвятая Дево, и почитаем честную икону Твою, юже от лет древних на горе Почаевстей прославила еси.

Тропарь Пресвятой Богородице перед Ея иконой, именуемой «Прибавление ума»

Тропарь, глас 4:
О Преславная мати Христа Бога нашего, благих Подателя, милостию Своею всю вселенную сохрани, даруй нам, рабом Твоим, премудрость и разум, светом Сына Твоего души наша просвети, едина Всепетая, от Херувим и Серафим славимая.

Кондак, глас 2:
Яко Единицы умом нас просвещающую, хвалим Тя, Пречистая, Мати Разума, всю вселенную держащаго, Красото мира видимаго и невидимаго, лучами жизни нас озаряющая.

Тропарь Пресвятой Богородице перед Ея иконой, именуемой «Призри на смирение»

Тропарь, глас 4:
Необоримая стена образ Твой и источник чудес, якоже древле от Него заступление Твое граду Пскову даровала еси, тако и ныне нас от всех бед и скорбей милостивно избави и спаси души наша, яко любвеобильная Мати.

Кондак, глас 3:
Пренепорочная Дево, отображение лика Твоего чтущия благодарныя дары приемлеши, живым и мертвым помогаеши, град и страну нашу спасаеши, и пред Сына твоего молитвы приносиши, и спасаеши всех нас.

Величание:
Величаем Тя, Пресвятая Дево, Богоизбранная Отроковице, и чтим святыя иконы Твоея чудесное отображение.

Тропарь Пресвятой Богородице перед Ея иконой, именуемой «Псково-Покровская»

Тропарь, глас 4:
Днесь светло красуется Богоспасаемый град Псков и вся страна Российская пришествием Матери Бога Вышняго на избавление града сего от варварскаго пленения. Услыша плач и слезы раб Своих, скоро приклонися на мольбу к Сыну Своему и Богу нашему, и молением Своим гнев Божий укроти и весь мир просвети, и град сей от скорби на радость премени. О, дивному знамению, како Пресвятая Владычице прииде на воздусе и в церковь Свою и на забрало града Пскова и призва угодников своих, благоверных князей, и поноси в людех беззаконие. И Своею пречистою рукою указоваше на поганаго злаго варвара и его совет на разрушение. Возвеселися, Богоспасаемый граде Пскове и все Православие, имеюще такову Заступницу непобориму. Днесь притецем, вернии, в дом спасительный Владычицы Богородицы, светло празднуя, и ко святому Ея образу со слезами припадем, вопиюще и глаголюще: О Всемилостивая Госпоже Владычице Богородице, молися Сыну Своему Христу Богу нашему спасти православныя люди и град сей избавити от огненнаго запаления и от нахождения поганых и междоусобныя брани, и спасти души наша яко Милосердая.

Тропарь Пресвятой Богородице перед Ея иконой, именуемой Пюхтицкой («У источника»)

Тропарь:
Утешение всех скорбящих, Скорая Помощнице в туге сердечней к Тебе прибегающим, услыши нас, Владычице, и даждь нам на пути к жизни вечней душ и сердец от скверн очищение и яко елень на источники водныя к Царству Небесному неустанное стремление.

Кондак:
Пресвятая Богородице, Дево, утоли жажду спасения страждущия души моея у Источника вод живых — Божественнаго Слова, Сына Твоего, Христа Бога нашего, призри на любящих и славящих Тя, Пречистая, и покрый нас покровом милосердия Твоего от всяких зол, тревог и бурь моря житейскаго.

Величание:
Величаем Тя, Светозарная Дево, и почитаем осиявшее гору Пюхтицкую благодатное явление Твое.

Тропарь Пресвятой Богородице перед Ея иконой, именуемой «Самонаписавшаяся»

Тропарь, глас 1:
Чудотворней Твоей иконе, Богородице Дево, всеблагоговейно покланяемся и лобызаем ю, подаеши бо тою исцеления, здравие же и крепость душам и телесем воистинну. Темже любовию Тебе взываем: слава промышлению Твоему о нас, Чистая, слава милосердию Твоему к верным, слава Тебе, самоизобразившейся, Всеблагая Владычице.

Тропарь Пресвятой Богородице перед Ея иконой, именуемой «Свенская»

Тропарь, глас 4:
Днесь светло торжествует Свенская обитель; и радуется явлением образа Богоматери; Безмерный лик Печерских отцев с ними же и мы непрестанно вопием: Радуйся Благодатная Свенская Похвало.

Тропарь Божией Матери пред иконой Ея, именуемой «Свято-Крестовской»

Тропарь:
Чрез святую Твою икону, явленную нам на Кавказе Тобою, о Владычице, люди града Святого Креста от страшнаго агарянского нападения чудесно свободила еси, благая Вратарнице! Пленение, скорбь и узы в радость и свободу пременила еси, скоропослушнице наша. Молим тя, Матерь Божия, и на будущее время защищай всех нас, на Кавказе живущих чад Твоих, от нашествия агарянского, непрестанно молящеся у Креста Сына Твоего, Всенепорочная.

Кондак, глас 8:
Якоже дивным видением многими стоящую Тя на воздусе у Креста Сына Твоего, Богородице, молящуюся о людех града Святого Креста, в страшной беде сущих, агарянского пленения свободила еси, благая Вратарнице, сице и на будущее время православных людей Кавказа защищай от нападающих на грады и веси наши, от недуга, неверия, глада и вражды избавляй, непрестанно молящеся о нас у Креста Сына Твоего, да зовем Ти: радуйся, Святокрестовская Божия Мати, всего Кавказа защито и ограждение.

Тропарь Пресвятой Богородице перед Ея иконой, именуемой «Себежская» или «Опочецкая» (Умиление)

Тропарь, глас 8:
Взыдем, православнии народи града Опочки, на тучную гору, яко на Фаворскую, в дом Спасителя своего, в честь боголепнаго Преображения Его, обилующу чудес и стократный клас израстившую, и узрим славу чудесе от чудотворнаго образа Пресвятыя Богоматере Умиления Себежския: яко море пролияся и Евфрат, текий из рая, тако слезы Ея быша, из обою оку пролитыя, о нашедшем гневе Создателя Своего за наше согрешение, припадем, каменносердечнии, и возрыдаем, просяще: о Владычице, умоли Сына Своего и Господа нашего сими пресвятыми Своими слезами, да избавит нас от всякаго злаго обстояния, и огненнаго запаления, и междоусобныя брани, от мора и глада, и нашествия иноплеменных в грядущия времена, и, радующеся, со Гавриилом благовестником возопием Ти: радуйся, Обрадованная, Господь с Тобою.

Величание:
Величаем Тя, Пресвятая Дево, Богоизбранная Отроковице, и чтим образ Твой честный, имже показала еси нам пречудное знамение.

Тропарь Пресвятой Богородице перед Ея иконой, именуемой «Скоропослушница»

Тропарь, глас 4:
Богородице притецем, сущий в бедах, и святей иконе Ея ныне припадем, с верою зовуще из глубины души: скоро наше услыши моление, Дево, яко Скоропослушница нарекшаяся. Тебе бо рабы Твои в нуждах готовую Помощницу имамы.

Кондак, глас 8:
В море житейстем обуреваемии, треволнению подпадаем страстей и искушений. Подаждь убо нам, Госпоже, руку помощи, якоже Петрови Сын Твой, и ускори от бед избавити ны, да зовем Ти: радуйся, Всеблагая Скоропослушнице.

Тропарь Пресвятой Богородице перед Ея иконой, именуемой «Сладкое целование»

Тропарь, глас 7:
Одержащей ереси, о честней иконе Твоей, Дево, яве промышляеши: морешествием Твоей обители яко дар достоин приношаеши. Сию же мы Сладколюбящую праве нарицающе, Тя ублажаем.

Тропарь Пресвятой Богородице перед Ея иконой, именуемой «Одигитрия»

Тропарь, глас 4:
К Богородице прилежно ныне притецем, грешнии и смиреннии, и припадем, в покаянии зовуще из глубины души: Владычице, помози, на ны милосердовавши, потщися, погибаем от множества прегрешений, не отврати Твоя рабы тщи, Тя бо и едину надежду имамы.

Слава, и ныне, Богородичен:
Не умолчим никогда, Богородице, силы Твоя глаголати, недостойнии. Аще бо Ты не бы предстояла молящи, кто бы нас избавил от толиких вед? Кто же бы сохранил до ныне свободны? Не отступим, Владычице, от Тебе: Твоя бо рабы спасаеши присно от всяких лютых.

Кондак, глас 6:
Предстательство христиан непостыдное, ходатайство ко Творцу непреложное, не презри грешных молений гласы, но предвари яко благая на помощь нас, верно зовущих Ти: ускори на молитву и потщися на умоление, предстательствующи присно, Богородице, чтущих тя.

Ин кондак, глас 6:
Не имамы иныя помощи, не имамы иныя надежды, разве Тебе, Владычице: Ты нам помози, на Тебя надеемся и Тобою хвалимся: Твои бы есмы раби, да не постыдимся.

Тропарь Пресвятой Богородице перед Ея иконой, именуемой «Спорительница хлебов»

Тропарь, глас 3:
Пречистая Дево Марие, Мати Царя небеси и земли, благоутробно призираеши на любящих Сына Твоего, Христа Бога нашего, и труждающихся во имя Его вечнаго ради спасения, и подаеши им вся обильно к наслаждению. Спорительнице сущи хлебов им, избавляя их всякия нужды и утеснения, и устрояя им, рабом Твоим сущим, избавление вечныя муки и жизнь вечную.

Тропарь Пресвятой Богородице перед Ея иконой, именуемой «Споручница грешных»

Тропарь, глас 4:
Умолкает ныне всякое уныние, и страх отчаяния исчезает, грешницы в скорби сердца обретают утешение, и небесною любовию озаряются светло: днесь бо Матерь Божия простирает нам спасающую руку, и от Пречистаго образа Своего вещает, глаголя: Аз Споручница грешных к Моему Сыну, Сей дал Мне за них руце слышати Мя выну. Темже людие обремененнии грехи многими, припадите подножию Ея иконы, со слезами вопиюще: Заступнице мира, грешным Споручнице, умоли Матерними молитвами Избавителя всех, да Божественным всепрощением покрыет грехи наша, и светлыя двери райския отверзет нам, Ты бо еси предстательство и спасение рода христианскаго.

Кондак, глас 1:
Честное Жилище бывши неизреченнаго естества Божественнаго выше слова и паче ума, и грешным еси Споручница, подаваеши благодать и исцеления, яко Мати всех Царствующаго, моли Сына Твоего, получити нам милость в день судный.

Тропарь на праздник Сретения чудотворной иконы Богородицы «Владимирской»

Тропарь, глас 4:
Днесь светло красуется славнейший град Москва, яко зарю солнечную восприемши, Владычице, чудотворную Твою икону, к нейже ныне мы притекающе и молящеся Тебе, взываем сице: о пречудная Владычице Богородице, молися из Тебе воплощенному Христу Богу нашему, да избавит град сей и вся грады и страны христианския невредимы от всех навет вражиих, и спасет душы наши, яко Милосерд.

Кондак, глас 8:
Взбранной Воеводе победительная, яко избавльшеся от злых пришествием Твоего честнаго образа, Владычице Богородице, светло сотворяем празднество сретения Твоего и обычно зовем Ти: радуйся, Невесто Неневестная.

Тропарь Пресвятой Богородице перед Ея иконой, именуемой «Страстная»

Тропарь, глас 4:
Днесь возсия неизреченно царствующему граду нашему Москве икона Богоматере, и, яко светозарным солнцем, пришествием тоя озарися весь мир, Небесныя силы и души праведных мысленно торжествуют, радующеся, мы же, на ню взирающе, к Богородице со слезами вопием: о Всемилостивая Госпоже, Владычице Богородице, молися из Тебе воплощенному Христу, Богу нашему, да подаст мир и здравие всем христианом по велицей и неизреченней Своей милости.

Тропарь Пресвятой Богородице перед Ея иконой, именуемой «Табынская»

Тропарь, глас 4:
Наста днесь пресветлый праздник, Пречистая Дево, честныя Твоея Табынския иконы, Владычице, яже паче лучей солнечных возсия, от Источника приснотекущаго, Христа, Бога нашего, источаеши целебныя дары с верою к тебе притекающим, Тя бо Христос Помощницу людем Своим дарова, покрывати и спасати от всякия беды рабы Своя, едину Благословенную.

Тропарь Пресвятой Богородице перед Ея иконой, именуемой «Тамбовская»

Тропарь, глас 4:
Днесь светло красуется град Тамбов, и святитель Христов Питирим радуется. Сияет бо ныне чудесы икона Твоя, Владычице, юже из первопрестольнаго града Москвы святитель принесе, и дивное людем являет Твое заступление, подающи исцеление всем, с верою к Тебе притекающим. Темже умильно вопием Ти: спасай нас иконою Твоею, Дево Всепетая.

Тропарь Пресвятой Богородице перед Ея иконой, именуемой «Тихвинская»

Тропарь, глас 4:
Днесь всемирная радость возсия нам велия, даровася святей горе Афонстей цельбоносная Твоя, Владычице Богородице, икона, со изображением тричисленно и нераздельно пречистых рук Твоих, в прославление Святыя Троицы: созываеши бо верных и молящихся Тебе о сем познати, яко двема имаши Сына и Господа держати, третию же яви на прибежище и покров чтущим Тя от всяких напастей и бед избавляти, да вси, притекающии к Тебе верою, приемлют от всех зол свобождение, от врагов защищение. Сего ради и мы вкупе со Афоном вопием: радуйся, Благодатная, Господь с Тобою.

Тропарь Пресвятой Богородице перед Ея иконой, именуемой «Толгская»

Тропарь, глас 4:
Днесь светло сияет на Толге образ Твой, Пречистая Дево Богородице, и, яко солнце незаходимое, всегда верным подадеся, Егоже видев на воздусе, невидимо Ангелы, яко никим, держима, преосвященный епископ града Ростова Трифон тече ко явленному светящемуся столпу огненну, и по водам, яко по суху, прейде, и моляшеся Ти верно о пастве и о людех. И мы, к Тебе притекающе, зовем: Пресвятая Дево Богородице, верно Тя славящих спасай, страну нашу, архиереев и вся Российския народы от всех бед избавляй по велицей Твоей милости.

Тропарь Пресвятой Богородице перед Ея иконой, именуемой «Трех радостей»

Тропарь, глас 4:
От святыя иконы Твоея радости неизреченныя преисполнила еси сердце благочестивыя жены. О Пречистая Владычице мира, Всемощная Царица радосте, Приснодево твари, егда возвратила оной и мужа, и сына, и достояние ея, такожде и всем нам милосердствуеши, даруй исполнение благих желаний, источая приснотекущий источник радости молящимся Тебе и вседушно вопиющим: Радость всему миру родившая, радости исполни неоскудевающия чтущих Тя.

Тропарь Пресвятой Богородице перед Ея иконой, именуемой «Троеручица»

Тропарь, глас 4:
Днесь всемирная радость возсия нам велия, даровася святей горе Афонстей цельбоносная Твоя, Владычице Богородице, икона, со изображением тричисленно и нераздельно пречистых рук Твоих, в прославление Святыя Троицы: созываеши бо верных и молящихся Тебе о сем познати, яко двема имаши Сына и Господа держати, третию же яви на прибежище и покров чтущим Тя от всяких напастей и бед избавляти, да вси, притекающии к Тебе верою, приемлют от всех зол свобождение, от врагов защищение. Сего ради и мы вкупе со Афоном вопием: радуйся, Благодатная, Господь с Тобою.

Тропарь, глас 4:
Днесь светло красуется царствующий град Москва, имеющи в себе, о Всемилостивейшая, всея твари Честнейшая, Заступнице наша Дево Богородице, честный образ Твой, имже подсолнечныя концы земли удивляеши и мир мирови даруеши, во образ бо Святыя Троицы являеши трие руце: двема убо Сына Своего, Христа Бога нашего, носиши, третиею от напастей и бед верно к Тебе прибегающих избавляеши, и от потопления изымаеши, и всем полезная даруеши, и преподобному Михаилу Малеонскую гору показа, и всех всегда милуеши, честною ризою Своею покрываеши жительство сие и вся грады и страны наша, да зовем Ти: радуйся, Обрадованная.

Тропарь, глас 4:
Яко звезда светозаряющая, из Сербии на Афон чудесно прииде всечестная икона Твоя Троеручица, юже обитель Хиландарская благоговейно восприемши, яко Божественный дар свыше, прославляет Тя, Владычицу, и умильно вопиет: не остави милость Твою от нас, но пребуди с нами во веки.

Величание:
Величаем Тя, Пренепорочная Дево, и чтим чудеса образа святаго Твоего, трех пречистых рук Твоих явление в славу Божества, в Троице Бога нашего.

Тропарь Пресвятой Богородице перед Ея иконой, именуемой «Умиление» (Смоленская)

Тропарь, глас 4:
Богорадованная Владычице, Препрославленная Мати щедрот и человеколюбия, Всемилостивая о всем мире Ходатаице! Прилежно, рабы Твои, к Божественному предстательству прибегающе и пречудному образу Твоему со умилением припадающе, молимся: молитву теплую к Сыну Твоему и Богу нашему сотвори, о Всепетая Царице Богородице, да всяких болезней и печалей нас Тебе ради избавит и от грехов всяких свободит, Царствия Своего Небеснаго наследники ны покажет, велие бо неизреченное, яко Мати, имаши дерзновение к Нему и вся можеши, Едина во веки Преблагословенная.

Тропарь Пресвятой Богородице перед Ея иконой, именуемой «Умиление»

Тропарь, глас 4:
К Богородице со умилением припадем, вси грехми обремененнии, чудотворную Ея икону Умиление облобызающе и вопиюще со слезами: Владычице, приими моление недостойных раб Твоих и подаждь нам, просящим, велию Твою милость.

Тропарь Пресвятой Богородице перед Ея иконой, именуемой «Умягчение злых сердец»

Тропарь, глас 5:
Умягчи наша злая сердца Богородице, и напасти ненавидящих нас угаси, и всякую тесноту души нашея разреши: на Твой бо святый образ взирающе, Твоим состраданием и милосердованием о нас умиляемся и раны Твоя лобызаем, стрел же наших, Тя терзающих, ужасаемся. Не даждь нам, Мати благосердная, в жестокосердии нашем и от жестокосердия ближних погибнути, Ты бо еси воистину злых сердец Умягчение.

Тропарь Пресвятой Богородице перед Ея иконой, именуемой «Урюпинская»

Тропарь, глас 3:
Явилася еси на древе в Донской земли, благодатная Твоя икона, Богородице, больныя исцеляти, заблуждшия обращати; темже умильно молимся Тебе: избави град наш от всякаго зла и спаси люди, к Тебе притекающия.

Тропарь Пресвятой Богородице перед Ея иконой, именуемой «Устюжская» («Благовещение»)

Тропарь, глас 4:
Вспетая и Всеславная Царице Богородице, Мати всея твари Содетеля, христианская Надеждо и Заступнице, печальным утешение, ненадеющимся и отчаявшимся скорое надеяние, молим Тя: милостива буди нам, грешным, не остави раб Твоих и не отрини моления недостойных. Молимтися, взирающе ко образу Твоему честному святыя и чудотворныя иконы Твоея и вопиюще с плавающими и путь шествующими, да пребудет милость Твоя. О Владычице, ризою честною защити, и во всяцех местех злых соблюди, и молися к рождшемуся из Тебе Христу Богу нашему, да спасет от грех души наша.

Тропарь Пресвятой Богородице перед Ея иконой, именуемой «Утоли моя печали»

Тропарь, глас 5:
Утоли болезни многовоздыхающия души моея, Утолившая всяку слезу от лица земли: Ты бо человеком болезни отгоняеши и грешных скорби разрушаеши, Тебе бо вси стяжахом надежду и утверждение. Пресвятая Мати Дево.

Кондак, глас 6:
Предстательство христиан непостыдное, ходатайство ко Творцу непреложное, не презри грешных молений гласы, но предвари, яко Благая, на помощь нас, верно зовущих Ти: ускори на молитву, и потщися на умоление, предстательствующи присно, Богородице, чтущих Тя.

Тропарь Пресвятой Богородице перед Ея иконой, именуемой «Феодоровская»

Тропарь, глас 4:
Присшествием честныя твоея иконы, Богоотроковице, обрадованный днесь Богохранимый град Кострома, якоже древний Израиль к кивоту завета, притекает к изображению лица Твоего и воплотившагося от Тебе Бога нашего, да Твоим матерним к Нему предстательством присно ходатайствуеши всем, под сень крова Твоего прибегающим, мир и велию милость.

Тропарь, глас 4:
Днесь светло красуется преименитый град Кострома и вся Русская страна, созывающи к веселию вся боголюбивыя народы христианския, на преславное торжество Божия Матере, пришествия ради чудотворнаго Ея и многоцелебнаго образа, днесь бо явися нам пресветлое великое солнце, приидите, вси Богоизбраннии людие, новый Израиль, ко источнику цельбоносному, источает бо нам неоскудныя милости Пресвятая Богородица и избавляет вся грады и страны христианския невредимы от всех навет вражиих. Но, о Всемилостивая Госпоже, Дево Богородице, Владычице, спаси страну нашу, и архиереи, и вся люди Твоего достояния от всех бед по велицей Твоей милости, да зовем Ти: радуйся, Дево, Христианом похвало.

Тропарь Пресвятой Богородице перед Ея иконой, именуемой «Цареградская»

Тропарь, глас 1:
Возсия нам, яко солнце светозарное от востока в велелепии, Твоя, Владычице, икона, озаряющи чудес сиянием преславно всех, приходящих к ней с верою и любовию и молящихся усердно к Твоему, еже о Сыне Твоем и Бозе, величию. Слава Богу, Евфосином сию давшему нам! Слава Приведшему ю от Царьграда! Слава Дающему тою всем исцеления.

Тропарь Пресвятой Богородице перед Ея иконой, именуемой «Целительница»

Тропарь, глас 4:
Яко Пресветлая Звездо, просия Божественными чудесы святый Твой образ «Целительнице», подаждь убо и нам, Богородице Марие, исцеление недугов душевных и телесных, спасение и велию милость.

Тропарь, глас 1:
Любовию, Чистая Дево, Твою святую икону почитающим и Божию Тя истинную Матерь прославляющим и верно поклоняющимтися Целительница явися, всякое зло и болезни от сих удаляющая, яко Всемогущая.

Тропарь Пресвятой Богородице перед Ея иконой, именуемой «Черниговская-Гефсиманская»

Тропарь, глас 5:
Пречистая Владычице Богородице, упование всех христиан, понеже инаго упования не имамы разве Тебе, Всенепорочная Владычице моя, Госпоже Богородице, Мати Христа Бога моего. Темже помилуй и избави мя от всех зол моих и умоли Милостиваго Сына Своего и Бога моего, да помилует окаянную душу мою, и да избавит мя от вечныя муки, и сподобит мя Царствия Своего.

Тропарь Пресвятой Богородице перед Ея иконой, именуемой «Чирская» (Псковская)

Тропарь, глас 4:
Яко необоримую стену и источник чудес, стяжавше Тя, рабы Твои, Богородице Пречистая, сопротивных ополчения низлагаем. Темже молим Тя: мир граду Твоему даруй и душам нашим велию милость.

Тропарь Пресвятой Богородице перед Ея иконой, именуемой «Шуйская-Смоленская»

Тропарь, глас 4:
Яко многоценное сокровище прият град Шуя чудесно написанную икону Твою, Пресвятая Владычице, Дево Богородице, во исцеление лютыя язвы и во утешение православных Тобою дарованную, от неяже источники благодатныя и до ныне обильно изливаются. Пробави, Пречистая, и на будущее время милости Твоя ведушим Тя, храни град Твой и всю Русскую землю и спасай людей, к Тебе с верою и любовию притекающих.

Тропарь Пресвятой Богородице перед Ея иконой, именуемой «Югская-Смоленская»

Тропарь, глас 4:
Днесь яко солнце пресветлое, возсия нам на воздусе всечестная икона Твоя, Владычице, лучами милости мир просвещающи, юже великая Россия, яко некий дар Божественный, свыше благоговейне восприемши, прославляет Тя, Богомати, всех Владычицу, и от Тебе рождшагося Христа Бога нашего величает радостно. Емуже молися, о Госпоже Царице Богородице, да сохранит вся грады и страны христианския невредимы от всех навет вражиих и спасет верою покланяющихся Его Божественному и Твоему Пречистому образу, Дево Неискусобрачная.

Иные популярные молитвы:

Православные молитвы святым угодникам в недугах. Православные молитвы нуждающимся в различных нуждах и немощах
Молитвы иные иконе Божьей матери и святым угодникам
Молитвы о вере
Виды и формы православных молитв
Молитвы святым Архангелам
Молитвы за родных и близких
О молитве: Как нужно молиться и каких ошибок избегать, Молитвенное правило, Из каких молитв должно состоять молитвенное правило мирянина, Когда совершать свое молитвенное правило, Как подготовиться к молитве, Как совершать дома свое молитвенное правило, Что делать при рассеянии на молитве, Как заканчивать свое молитвенное правило, Как научиться молитвенно проводить день, Как принудить себя к молитве, Что нужно для успешной молитвы
Молитвы на великие двунадесятые праздники
Тропари Б-В. Тропарь Пресвятой Богородице. Тропарь святым преподобным угодникам
Тропари Г-Д. Тропарь Пресвятой Богородице. Тропарь святым преподобным угодникам
Тропари Е-З. Тропарь Пресвятой Богородице. Тропарь святым преподобным угодникам
Тропари И-К. Тропарь Пресвятой Богородице. Тропарь святым преподобным угодникам
Молитвы перед иконами пресвятой Богородицы
Молитва святым, иные

.

Молитвенное правило преподобного Амвросия Оптинского

Все молитвы …

ТРОПАРИ  И  КОНДАКИ

ИКОНАМ  БОЖИЕЙ  МАТЕРИ

в  порядке  церковного  года,

начиная  с  1/14  сентября

(даты  указаны  по  старому  и  новому  стилям)

1/14  сентября

Иконы  Божией  Матери

«Черниговская-Гефсиманская»

Тропарь,  глас  5-й

Пречи́стая  Влады́чице  Богоро́дице,  упова́ние  всех  христиа́н,  поне́же  ина́го  упова́ния  не  и́мамы  ра́зве  Тебе́,  всенепоро́чная  Влады́чице  моя́,  Госпоже́  Богоро́дице,  Ма́ти  Христа́  Бо́га  моего́.  Те́мже  поми́луй  и  изба́ви  мя  от  всех  зол  мои́х  и  умоли́  ми́лостиваго  Сы́на  Своего́  и  Бо́га  моего́,  да  поми́лует  окая́нную  ду́шу  мою́,  и  да  изба́вит  мя  от  ве́чныя  му́ки,  и  сподо́бит  мя  Ца́рствия  Своего́.

Кондак,  глас  6-й

Предста́тельство  христиа́н  непосты́дное,  хода́тайство  ко  Творцу́  непрело́жное,  не  пре́зри  гре́шных  моле́ний  гла́сы,  но  предвари́,  я́ко  Блага́я,  на  по́мощь  нас,  ве́рно  зову́щих  Ти;  ускори́  на  моли́тву  и  потщи́ся  на  умоле́ние,  предста́тельствующи  при́сно,  Богоро́дице,  чту́щих  Тя.

Иконы  Божией  Матери  «Всеблаженная»

Тропарь,  глас  4-й

Торжество́  днесь  пра́зднуем  све́тлое,  се  бо  предлежи́т,  о  Всеблаже́нная,  ико́на  Твоя́  всечестна́я,  к  не́йже  с  любо́вию  се́рдца  вси  приходя́ще,  Влады́чице,  покланя́емся  и  те́пле  Тебе́  вопие́м:  изба́ви  нас  от  бед  и  обстоя́ний.

Кондак,  глас  4-й

Во  пра́здник  Твой  соше́дшеся,  ве́рнии,  свяще́нное  ко  сла́ве  Бо́жией  торжество́  Твое́,  Влады́чице,  днесь  всеблагогове́йно  соверша́ем,  любо́вию  же  чту́ще  честну́ю  ико́ну  Твою́,  Тебе́  песносло́вим  вси  в  ра́дости:  ра́дуйся,  Де́во,  Честна́я  Всеблаже́нная.

4/17  сентября

Иконы  Божией  Матери

«Неопалимая  Купина»

Тропарь,  глас  4-й

И́же  во  огне́  купины́  неопали́мыя,  дре́вле  Моисе́ем  ви́денныя,  та́йно  воплоще́ния  Своего́  от  неискусобра́чныя  Де́вы  Мари́и  прообразова́вый,  Той  и  ны́не  я́ко  чуде́с  Творе́ц  и  всея́  тва́ри  Созда́тель  ико́ну  Ея́  святу́ю  чудесы́  мно́гими  просла́ви,  дарова́в  ю́  ве́рным  во  исцеле́ние  неду́гом  и  в  защище́ние  от  о́гненнаго  запале́ния.  Сего́  ра́ди  вопие́м  Преблагослове́нней:  Наде́ждо  христиа́н,  от  лю́тых  бед,  огня́  и  гро́ма  изба́ви  на  Тя  упова́ющия,  и  спаси́  ду́ши  на́ша  я́ко  Милосе́рда.

Другой  тропарь,  глас  тот  же

В  купине́,  огне́м  горя́щей  и  несгара́емей,  показа́вый  Моисе́ови  Пречи́стую  Твою́  Ма́терь,  Христе́  Бо́же,  огнь  Божества́  неопа́льне  во  чре́ве  прии́мшую  и  нетле́нну  по  Рождестве́  Пребы́вшую.  Тоя́  моли́твами  от  пла́мене  страсте́й  изба́ви  нас  и  от  о́гненных  запале́ний  град  Твой  сохрани́,  я́ко  Многоми́лостив.

Кондак,  глас  8-й

Предочи́стим  чу́вствия  душ  и  теле́с  на́ших,  да  ви́дим  та́инство  Боже́ственное,  о́бразно  явле́нное  дре́вле  вели́кому  во  проро́цех  Моисе́ю  купино́ю,  горе́вшею  огне́м  и  не  сгара́вшею,  в  не́йже  Твоего́  безсе́меннаго  рождества́,  Богоро́дице,  предвозвеще́ние  испове́дуем  и,  благогове́йно  покланя́ющеся  Тебе́  и  ро́ждшемуся  из  Тебе́  Спа́су  на́шему,  со  стра́хом  вопие́м:  ра́дуйся,  Влады́чице,  покро́ве,  и  прибе́жище,  и  спасе́ние  душ  на́ших.

8/21  сентября

Иконы  Божией  Матери  София,

Премудрость  Божия    (Киевская)

Тропарь,  глас    1-й

Преве́чная  Прему́дросте,  Христе́  Бо́же  наш!  Боже́ственным  смотре́нием  Свои́м  преклони́вый  небеса́,  благоволи́л  еси́  всели́тися  во  утро́бу  чи́стыя  Отрокови́цы,  средосте́ние  вражды́  разруши́в,  освяти́л  еси́  естество́  на́ше  и  Ца́рствие  Твое́  нам  отве́рзл  еси́;  сего́  ра́ди  Тебе́,  Творца́  на́шего  и  Изба́вителя,  и  Ро́ждшую  Тя,  спасе́ния  на́шего  та́йне  послужи́вшую  Де́ву  Чи́стую,  правосла́вно  велича́ем.

Другой  тропарь,  глас  4-й

Ве́лия  и  неизрече́нная  Прему́дрости  Бо́жии  си́ла  смотре́ния  плотска́го  та́инства,  Софи́е  преимени́тая,  де́вственных  душе́  и  неизглаго́ланнаго  де́вства  чистоте́,  смире́нныя  му́дрости  и́стине,  поко́ище  Свята́го  Ду́ха,  пречестны́й  хра́ме  непостижи́мыя  сла́вы  Его,  огнезра́чный  престо́ле  Христа́  Бо́га  на́шего,  в  Тя  бо  всели́ся  неизрече́нно  Сло́во  Бо́жие,  и  плоть  бысть,  неви́димый  яви́ся,  и  неприкоснове́нный  из  Тебе́  изы́де,  и  с  челове́ки  поживе́,  врага́  иско́ннаго  уловля́я  и  челове́ки  от  кля́твы  дре́вния  свобожда́я,  возводя́  па́ки,  отню́дуже  испадо́хом.  Мо́лим  ти  ся,  Влады́чице,  отягче́нныя  ны  во  гресе́х  лю́тых  поми́ловати  и  спасти́  ду́ши  на́ша,  и  я́ко  человеколю́бивая  и  милосе́рдая  Цари́ца,  Ма́ти  Прему́дрости  Бо́жия  Сло́ва,  при́зри  на  ны,  гре́шныя  лю́ди  Твоя́,  и  умилосе́рдися,  заступи́  от  напа́стей  и  скорбе́й  лю́тых  и  гра́ды  на́ша  невреди́мы  сохрани́,  иде́же  ны́не  имя  Твое́  пресвято́е  боголе́пно  сла́вится.

Кондак,  глас  4-й

Притеце́м,  правосла́внии  лю́дие,  к  Прему́дрости  Бо́жии  и  ви́дим  чудотво́рную  ико́ну  Пречи́стыя  Богома́тере,  Ю́же  имену́ем  по  явле́нию  Софи́ю,  Прему́дрость  Бо́жию,  зане́  храм  бысть  одушевле́н  Единоро́днаго  Сы́на  и  Сло́ва  Бо́жия.  Сия́  у́бо  светолу́чно  сия́ет  в  пречестне́м  хра́ме  Свое́м  и  сердца́  на́ша  весели́т,  приходя́щих  с  ве́рою  и  взира́ющих  со  стра́хом  и  благогове́нием  на  пречи́стую  сию́  ико́ну,  помышля́юще  в  сердца́х  на́ших,  я́ко  вои́стинну  Прему́дрости  Бо́жии  есть  селе́ние  и  та́инства  Его́  смотре́ние,  на  упова́ние  бо  ве́рным  воображе́ние  огнезра́чное  Ея́  зрим  и  покланя́емся,  я́ко  и́стинному  и  пренепоро́чному  Ея́  де́вству  в  рождестве́  и  по  рождестве́  па́ки;  от  Нея́же  изы́де  Огнь  Боже́ственный,  попаля́я  тле́нныя  стра́сти  и  просвеща́я  ду́ши  на́ша  и  чи́сты  сотворя́я,  И́мже  и  ве́ки  сотвори́  Оте́ц,  Той  же  и  Му́дрость,  Сло́во  и  Си́ла  нарече́тся,  сия́ние  сла́вы  и  О́браз  О́тчи  Ипоста́си.  И  па́ки  у́бо  мо́лим  и,  припа́дающе,  лобыза́ем  пречестну́ю  ико́ну  Прему́дрости  Бо́жия  Ма́тере  и  велегла́сно  вопие́м:  о  Милосе́рдая  Влады́чице,  спаси́  рабы  Своя́  от  наси́лия  диа́воля,  от  нахожде́ния  иноплеме́нных  и  междоусо́бныя  бра́ни,  я́ко  Ты  еси́  всех  благи́х  пода́тельница  и  покрови́тельница  притека́ющим  к  Тебе́  с  ве́рою  и  прося́щим  ве́лия  ми́лости.

8/21  сентября,  также  23  июля/5  августа

Иконы  Божией  Матери  «Почаевская»

Тропарь,  глас  5-й

Пред  свято́ю  Твое́ю  ико́ною,  Влады́чице,  моля́щиися  исцеле́ний  сподобля́ются,  ве́ры  и́стинныя  позна́ние  прие́млют  и  ага́рянская  наше́ствия  отража́ют.  Те́мже  и  нам,  к  Тебе́  припа́дающим,  грехо́в  оставле́ние  испроси́,  по́мыслы  благоче́стия  сердца́  на́ша  просвети́  и  к  Сы́ну  Твое́му  моли́тву  вознеси́  о  спасе́нии  душ  на́ших.

Кондак,  глас  1-й

Исто́чник  исцеле́ний  и  ве́ры  Правосла́вныя  утвержде́ние  Поча́евская  Твоя́  ико́на,  Богоро́дице,  яви́ся,  те́мже  и  нас,  к  ней  притека́ющих,  от  бед  и  искуше́ний  свободи́,  Ла́вру  Твою́  невреди́му  сохрани́,  Правосла́вие  во  окре́ст  стоя́щих  стра́нах  утверди́  и  грехи́  разреши́  моли́твенник  Твои́х:  ели́ка  бо  хо́щеши,  мо́жеши.

18  сентября/1  октября

Иконы  Божией  Матери  «Целительница»

Тропарь,  глас  4-й

Я́ко  пресве́тлая  звезда́,  просия́  Боже́ственными  чудесы́  святы́й  Твой  о́браз,  Цели́тельнице.  Пода́ждь  у́бо  и  нам,  Богоро́дице  Мари́е,  исцеле́ние  неду́гов  душе́вных  и  теле́сных,  спасе́ние  и  ве́лию  ми́лость.

  Кондак,  глас  6-й

Предста́тельство  христиа́н  непосты́дное,  хода́тайство  ко  Творцу́  непрело́жное,  не  пре́зри  гре́шных  моле́ний  гла́сы,  но  предвари́,  я́ко  Блага́я,  на  по́мощь  нас,  ве́рно  зову́щих  Ти;  ускори́  на  моли́тву  и  потщи́ся  на  умоле́ние,  предста́тельствующи  при́сно,  Богоро́дице,  чту́щих  Тя.

12/25  октября

Иконы  Божией  Матери  «Иерусалимская»

Тропарь,  глас  4-й

Богора́дованная  Влады́чице,  препросла́вленная  Ма́ти  щедро́т  и  человеколю́бия,  всеми́лостивая  о  всем  ми́ре  Хода́таице!  Приле́жно  раби́  Твоя́  к  Твое́му  предста́тельству  прибега́ем,  и  ко  пречу́дному  о́бразу  Твое́му  со  умиле́нием,  припа́дающе,  мо́лимся:  моли́тву  те́плую  Сы́ну  Твое́му  и  Бо́гу  на́шему  сотвори́,  о  Всепе́тая  Цари́це  Богоро́дице,  да  от  вся́ких  боле́зней  и  печа́лей  нас  Тебе́  ра́ди  изба́вит,  и  от  грехо́в  вся́ких  свободи́в,  Ца́рствия  Своего́  Небе́снаго  насле́дники  ны  пока́жет:  ве́лие  бо  и  неизрече́нное  я́ко  Ма́ти  к  Нему́  дерзнове́ние  и́маши  и  вся  от  Него́  испроси́ти  мо́жеши,  еди́на  во  ве́ки  Преблагослове́нная.

Кондак,  глас  3-й

Твоего́  предста́тельства  увере́ние  и  милосе́рдия  Твоего́  явле́ние  ико́на  Иерусали́мская  нам,  Влады́чице,  показа́ся,  пред  не́ю  же  ду́ши  на́ша  в  моли́тве  излива́ем  и  ве́рою  Тебе́  вопие́м:  воззри́,  Милосе́рдая,  на  лю́ди  Твоя́,  вся  ско́рби  на́ша  и  печа́ли  утоли́,  утеше́ние  благо́е  в  сердца́  на́ша  низпосли́  и  спасе́ние  ве́чное  душа́м  на́шим,  Пречи́стая,  испроси́.

Другой  кондак,  глас  5-й

Не  отри́ни,  о  милосе́рдая  Ма́ти,  слез  и  воздыха́ний  на́ших,    но    проше́ния  на́ша  ми́лостивно  прии́мши,  пред  Иерусали́мскою  ико́ною  Твое́ю  моля́щихся  люде́й  ве́ру  укрепи́,  умиле́нием  сердца́  их  испо́лни,  и  крест  земна́го  жития́  нести́  им  помози́,  ели́ка  бо  хо́щеши  мо́жеши.

13/26  октября,  также  12/25  февраля

и  во  вторник  Светлой  седмицы

Иконы  Божией  Матери  Иверская

Тропарь,  глас    1-й

От  святы́я  ико́ны  Твоея́,  о  Влады́чице  Богоро́дице,  исцеле́ния  и  це́льбы  подаю́тся  оби́льно,  с  ве́рою  и  любо́вию  приходя́щим  к  ней.  Та́ко  и  мою́  не́мощь  посети́,  и  ду́шу  мою́  поми́луй,  Блага́я,  и  те́ло  исцели́  благода́тию  Твое́ю,  Пречи́стая.

Другой  тропарь,  глас  тот  же

Де́рзость  ненави́дящих  о́браз  Госпо́день,  и  держа́ва  нечести́вых  безбо́жно  в  Нике́ю  прии́де,  и  посла́ннии  безчелове́чно  вдови́цу,  благоче́стно  чту́щую  ико́ну  Богома́тере,  истязу́ют.  Но  тая́  но́щию  с  сы́ном  ико́ну  в  мо́ре  пусти́,  вопию́щи:  сла́ва  Тебе́,  Чи́стая,  я́ко  непроходи́мое  мо́ре  плещи́  своя́  подаде́,  сла́ва  правоше́ствию  Твое́му,  еди́на  Нетле́нная.

Кондак,  глас  8-й

А́ще  и  в  мо́ре  вве́ржена  бысть  свята́я  ико́на  Твоя́,  Богоро́дице,  от  вдови́цы  не  могу́щия  спасти́  сию́  от  враго́в,  но  яви́лася  есть  храни́тельница  Афо́на  и  врата́рница  оби́тели  Иверския,  враги́  устраша́ющая  и  в  правосла́вней  Росси́йстей  стране́  чту́щия  Тя  от  всех  бед  и  напа́стей  избавля́ющая.

15/28  октября

Иконы  Божией  Матери

«Спорительница  хлебов»

Тропарь,  глас  3-й

Пречи́стая  Де́во  Мари́е,  Ма́ти  Царя́  небеси́  и  земли́,  благоутро́бно  призира́еши  на  лю́бящих  Сы́на  Твоего́,  Христа́  Бо́га  на́шего,  и  тружда́ющихся  во  и́мя  Его  ве́чнаго  ра́ди  спасе́ния,  и  подае́ши  им  вся  оби́льно  к  наслажде́нию.  Спори́тельнице  су́щи  хлебо́в  им,  избавля́я  их  вся́кия  ну́жды  и  утесне́ния  и  устроя́я  им,  рабо́м  Твои́м  су́щим,  избавле́ние  ве́чныя  му́ки  и  жизнь  ве́чную.

Кондак,  глас  6-й

Предста́тельство  христиа́н  непосты́дное,  хода́тайство  ко  Творцу́  непрело́жное,  не  пре́зри  гре́шных  моле́ний  гла́сы,  но  предвари́,  я́ко  Блага́я,  на  по́мощь  нас,  ве́рно  зову́щих  Ти;  ускори́  на  моли́тву  и  потщи́ся  на  умоле́ние,  предста́тельствующи  при́сно,  Богоро́дице,  чту́щих  Тя.

17/30  октября

Иконы  Божией  Матери  «Избавительница»

Тропарь,  глас  4-й

Избавле́ние  принося́щая  всем  от  се́рдца  Тебе́  призыва́ющим,  принеси́  избавле́ние  ско́рое  и  нам,  в  лю́тых  беда́х  прибега́ющим,  и  в  Тебе́  еди́ной  избавле́ние  на́ше  по  Бо́зе  полага́ющим.

Кондак,  глас  4-й

Ко  ико́не  Твое́й,  Пресвята́я  Госпоже́,  бе́дствовавшии  с  ве́рою  прите́кше,  заступле́нием  Твои́м  изба́витися  от  злых,  но  я́ко  Ма́терь  Христа́  Бо́га,  и  нас  свободи́  от  лю́тых  обстоя́ний,  вре́менных  и  ве́чных,  да  зове́м  Ти:  ра́дуйся,  Изба́вительнице  от  всех  бед.

22  октября/4  ноября,  также  8/21  июля

Иконы  Божией  Матери  Казанская

Тропарь,  глас  4-й

Засту́пнице  усе́рдная,  Ма́ти  Го́спода  Вы́шняго,  за  всех  мо́лиши  Сы́на  Твоего́  Христа́  Бо́га  на́шего,  и  всем  твори́ши  спасти́ся,  в  держа́вный  Твой  покро́в  прибега́ющим.  Всех  нас  заступи́,  о  Госпоже́  Цари́це  и  Влады́чице,  и́же  в  напа́стех  и  в  ско́рбех,  и  в  боле́знех,  обремене́нных  грехи́  мно́гими,  предстоя́щих  и  моля́щихся  Тебе́  умиле́нною  душе́ю,  и  сокруше́нным  се́рдцем,  пред  пречи́стым  Твои́м  о́бразом  со  слеза́ми,  и  невозвра́тно  наде́жду  иму́щих  на  Тя  избавле́ния  всех  зол,  всем  поле́зная  да́руй,  и  вся  спаси́,  Богоро́дице  Де́во:  Ты  бо  еси́  Боже́ственный  покро́в  рабо́м  Твои́м.

Кондак,  глас  8-й

Притеце́м,  лю́дие,  к  ти́хому  сему́  и  до́брому  приста́нищу,  ско́рой  Помо́щнице,  гото́вому  и  те́плому  спасе́нию,  покро́ву  Де́вы.  Ускори́м  на  моли́тву,  и  потщи́мся  на  покая́ние:  источа́ет  бо  нам  неоску́дныя  ми́лости  Пречи́стая  Богоро́дица,  предваря́ет  на  по́мощь,  и  избавля́ет  от  вели́ких  бед  и  зол,  благонра́вныя  и  богобоя́щияся  рабы́  Своя́.

24  октября/6  ноября

Иконы  Божией  Матери

«Всех  скорбящих  Радость»

Тропарь,  глас  4-й

К  Богоро́дице  приле́жно  ны́не  притеце́м,  гре́шнии  и  смире́ннии,  и  припаде́м,  в  покая́нии  зову́ще  из  глубины́  ду́ши:  Влады́чице,  помози́,  на  ны  милосе́рдовавши,  потщи́ся,  погиба́ем  от  мно́жества  прегреше́ний,  не  отврати́  Твоя́  рабы́  тщи,  Тя  бо  и  еди́ну  наде́жду  и́мамы.

Стихира    (тропарь),  глас  2-й

Всех  скорбя́щих  Ра́досте,  и  оби́димых  засту́пнице,  и  а́лчущих  пита́тельнице,  стра́нных  утеше́ние,  обурева́емых  приста́нище,  больны́х  посеще́ние,  немощны́х  покро́ве  и  засту́пнице,  же́зле  ста́рости,  Ма́ти  Бо́га  Вы́шняго  Ты  еси́,  Пречи́стая:  потщи́ся,  моли́мся,  спасти́ся  рабо́м  Твои́м.

Кондак,  глас  8-й

Взбра́нной  Воево́де  победи́тельная,  я́ко  изба́вльшеся  от  злых  прише́ствием  Твоего́  честна́го  о́браза,  Влады́чице  Богоро́дице,  све́тло  сотворя́ем  пра́зднество  сре́тения  Твоего́  и  обы́чно  зове́м  Ти:  ра́дуйся,  Неве́сто  Неневе́стная.

2/15  ноября,  также  28  июля/10  августа

и  во  вторник  Светлой  седмицы

Иконы  Божией  Матери  «Шуйская-Смоленская»

Тропарь,  глас  4-й

Я́ко  многоце́нное  сокро́вище  прия́т  град  Шу́я  чуде́сно  напи́санную  ико́ну  Твою́,  Пресвята́я  Влады́чице  Де́во  Богоро́дице,  во  исцеле́ние  лю́тыя  я́звы  и  во  утеше́ние  правосла́вных,  Тобо́ю  дарова́нную,  от  нея́же  исто́чники  благода́тныя  и  доны́не  оби́льно  излива́ются.  Проба́ви,  Пречи́стая,  и,  на  бу́дущее  вре́мя  ми́лости  Твоя́  ве́дущим  Тя,  храни́  град  Твой  и  всю  Ру́сскую  зе́млю  и  спаса́й  люде́й,  к  Тебе́  с  ве́рою  и  любо́вию  притека́ющих.

Кондак,  глас  6-й

Предста́тельство  христиа́н  непосты́дное,  хода́тайство  ко  Творцу́  непрело́жное,  не  пре́зри  гре́шных  моле́ний  гла́сы,  но  предвари́,  я́ко  Блага́я,  на  по́мощь  нас,  ве́рно  зову́щих  Ти;  ускори́  на  моли́тву  и  потщи́ся  на  умоле́ние,  предста́тельствующи  при́сно,  Богоро́дице,  чту́щих  Тя.

9/22  ноября

Иконы  Божией  Матери  «Скоропослушница»

Тропарь,  глас  4-й

К  Богоро́дице  притеце́м,  су́щии  в  беда́х,  и  ко  святе́й  ико́не  Ея́  ны́не  припаде́м,  с  ве́рою  зову́ще  из  глубины́  ду́ши:  ско́ро  на́ше  услы́ши  моле́ние,  Де́во,  я́ко  Скоропослу́шница  наре́кшаяся,  Тебе́  бо  ра́ди  раби́  Твоя́  в  ну́ждах  гото́вую  Помо́щницу  и́мамы.

Кондак,  глас  8-й

В  мо́ри  жите́йстем  обурева́емии,  треволне́нию  подпада́ем  страсте́й  и  искуше́ний.  Пода́ждь  у́бо  нам,  Госпоже́,  ру́ку  по́мощи,  я́коже  Петро́ви  Сын  Твой,  и  ускори́  от  бед  изба́вити  ны,  да  зове́м  Ти:  ра́дуйся,  Всеблага́я  Скоропослу́шнице.

27  ноября/10  декабря

Иконы  Божией  Матери  «Знамение»

Тропарь,  глас  4-й

Я́ко  необори́мую  сте́ну  и  исто́чник  чуде́с  стяжа́вше  Тя,  раби́  Твои́,  Богоро́дице  Пречи́стая,  сопроти́вных  ополче́ния  низлага́ем.  Те́мже  мо́лим  Тя:  мир  гра́ду  Твое́му  да́руй  и  душа́м  на́шим  ве́лию  ми́лость.

Кондак,  глас  тот  же

Честна́го  о́браза  Твоего́  зна́мение  пра́зднующе,  лю́дие  Твои́,  Богороди́тельнице,  и́мже  ди́вную  побе́ду  на  сопроти́вныя  гра́ду  Твое́му  дарова́ла  еси́.  Те́мже  Тебе́  ве́рою  взыва́ем:  ра́дуйся,  Де́во,  христиа́н  похвало́.

26  декабря/8  января

Иконы  Божией  Матери  «Трех  радостей»

Тропарь,  глас  4-й

От  святы́я  ико́ны  Твоея́  ра́дости  неизрече́нныя  преиспо́лнила  еси́  се́рдце  благочести́выя  жены́.  О  Пречи́стая  Влады́чице  ми́ра,  всемо́щная  Цари́це  ра́досте,  Присноде́во  тва́ри,  егда́  возврати́ла  о́ной  и  му́жа,  и  сы́на,  и  достоя́ние  ея́,  та́кожде  и  всем  нам  милосе́рдствуеши,  да́руй  исполне́ние  благи́х  жела́ний,  источа́я  приснотеку́щий  исто́чник  ра́дости  моля́щимся  Тебе́  и  вседу́шно  вопию́щим:  Ра́дость  всему́  ми́ру  роди́вшая,  ра́дости  испо́лни  неоскудева́ющия  чту́щих  Тя.

Кондак,  глас  6-й

Предста́тельство  христиа́н  непосты́дное,  хода́тайство  ко  Творцу́  непрело́жное,  не  пре́зри  гре́шных  моле́ний  гла́сы,  но  предвари́,  я́ко  Блага́я,  на  по́мощь  нас,  ве́рно  зову́щих  Ти;  ускори́  на  моли́тву  и  потщи́ся  на  умоле́ние,  предста́тельствующи  при́сно,  Богоро́дице,  чту́щих  Тя.

12/25  января

Иконы  Божией  Матери  «Млекопитательница»

Тропарь,  глас  1-й

Без  се́мени  от  Боже́ственнаго  Ду́ха,  во́лею  же  О́тчею  зачала́  еси́  Сы́на  Бо́жия.  От  Отца́  без  ма́тере  пре́жде  век  су́ща,  нас  же  ра́ди  из  Тебе́  без  Отца́  бы́вша,  пло́тию  родила́  еси́  и  Младе́нца  млеко́м  пита́ла  еси́.  Те́мже  не  преста́й  моли́ти  изба́витися  от  бед  душа́м  на́шим.

Кондак,  глас  5-й

Душ  на́ших  чу́вствия  очисти́вше,  у́зрим  на  ико́не  та́инство  пресла́вное,  Творца́  вселе́нной  и  Го́спода  Вы́шних  сил,  во  объя́тиих  держи́ма  и  от  сосцу́  Твое́ю  я́ко  Младе́нца  пита́ема,  и,  со  стра́хом  и  ра́достию  покланя́ющеся  Тебе́  и  ро́ждшемуся  от  Тебе́  Спа́су  на́шему,  воззове́м:  ра́дуйся,  Влады́чице,  жи́зни  на́шея  Пита́тельнице.

21  января/3  февраля

Иконы  Божией  Матери  «Отрада»

или  «Утешение»

Тропарь,  глас  4-й

О  покро́в  благода́тный  и  спаси́тельный  стяжа́хом  честну́ю  Твою́  ико́ну,  Богоро́дице.  На  сию́  у́бо  со  умиле́нием  взира́юще,  Тебе́  вопие́м:  Влады́чице  низпосли́  отра́ду  и  утеше́ние;  на  Тя  упова́ние  возлага́ем  гре́шнии  и  смире́ннии,  на  Твое́  предста́тельство  наде́емся  недосто́йнии,  ускори́  нас  изба́вити  от  бед  и  скорбе́й,  и  умоли́  Сы́на  Твоего́,  Христа́  Бо́га  на́шего,  поми́ловати  и  спасти́  ду́ши  на́ша.

Кондак,  глас  6-й

Предста́тельство  христиа́н  непосты́дное,  хода́тайство  ко  Творцу́  непрело́жное,  не  пре́зри  гре́шных  моле́ний  гла́сы,  но  предвари́,  я́ко  Блага́я,  на  по́мощь  нас,  ве́рно  зову́щих  Ти;  ускори́  на  моли́тву  и  потщи́ся  на  умоле́ние,  предста́тельствующи  при́сно,  Богоро́дице,  чту́щих  Тя.

25  января/7  февраля

Иконы  Божией  Матери  «Утоли  моя  печали»

Тропарь,  глас  5-й

Утоли́  боле́зни  многовоздыха́ющия  ду́ши  моея́,  утоли́вшая  вся́ку  слезу́  от  лица́  земли́:  Ты  бо  челове́ком  боле́зни  отго́ниши  и  гре́шных  ско́рби  разруша́еши,  Тебе́  бо  вси  стяжа́хом  наде́жду  и  утвержде́ние,  Пресвята́я  Ма́ти  Де́во.

Кондак,  глас  6-й

Предста́тельство  христиа́н  непосты́дное,  хода́тайство  ко  Творцу́  непрело́жное,  не  пре́зри  гре́шных  моле́ний  гла́сы,  но  предвари́,  я́ко  Блага́я,  на  по́мощь  нас,  ве́рно  зову́щих  Ти;  ускори́  на  моли́тву  и  потщи́ся  на  умоле́ние,  предста́тельствующи  при́сно,  Богоро́дице,  чту́щих  Тя.

5/18  февраля

Иконы  Божией  Матери  «Взыскание  погибших»

Тропарь,  глас  1-й

Ра́дуйся,  Благода́тная  Богоро́дице  Де́во,  во  объя́тиях  Свои́х  Преве́чнаго  Младе́нца  и  Бо́га  носи́вшая.  Проси́  Его́  да́ти  ми́ру  умире́ние  и  душа́м  на́шим  спасе́ние.  Сын  бо  Тебе́,  Богома́ти,  веща́ет,  я́ко  вся  проше́ния  Твоя́  во  благо́е  испо́лнит.  Сего́  ра́ди  и  мы  припа́дающе,  мо́лимся  и  наде́ющиися  на  Тя,  да  не  поги́бнем,  и́мя  Твое́  имену́ем:  Ты  бо  еси́,  Влады́чице,  Взыска́ние  поги́бших.

Кондак,  глас  6-й

Предста́тельство  христиа́н  непосты́дное,  хода́тайство  ко  Творцу́  непрело́жное,  не  пре́зри  гре́шных  моле́ний  гла́сы,  но  предвари́,  я́ко  Блага́я,  на  по́мощь  нас,  ве́рно  зову́щих  Ти;  ускори́  на  моли́тву  и  потщи́ся  на  умоле́ние,  предста́тельствующи  при́сно,  Богоро́дице,  чту́щих  Тя.

6/19  февраля

Иконы  Божией  Матери  Елецкая-Харьковская

Тропарь,  глас  4-й

К  Богоро́дице  приле́жно  ны́не  притеце́м,  гре́шнии  и  смире́ннии,  и  припаде́м,  в  покая́нии  зову́ще  из  глубины́  ду́ши:  Влады́чице,  помози́,  на  ны  милосе́рдовавши,  потщи́ся,  погиба́ем  от  мно́жества  прегреше́ний,  не  отврати́  Твоя́  рабы́  тщи,  Тя  бо  и  еди́ну  наде́жду  и́мамы.

Кондак,  глас  5-й

На  неувяда́емом  дре́ве  уго́днику  яви́вшися,  Твое́  же  предста́тельство  всем  моля́щимся  при́сно  явля́ющи,  Влады́чице,  и  на́шего  не  отврати́  смире́ннаго  моле́ния,  но  прегреше́ний  на́ших  проще́ния  испроси́  и,  ско́рби  душ  на́ших  отъе́млющи,  благода́рственное  на́ше  приими́  поклоне́ние,  да  любо́вию  Тя  во  ве́ки  сла́вим,  Всепе́тая.

2/15  марта

Иконы  Божией  Матери  «Державная»

Тропарь,  глас  8й

А́нгелов  ли́цы  благогове́йно  Тебе́  слу́жат  и  вся  Небе́сныя  си́лы  немо́лчными  гла́сы  Тя  ублажа́ют,  Богоро́дице  Де́во,  усе́рдно  мо́лим  Тя,  Влады́чице,  да  пребу́дет  Боже́ственная  благода́ть  на  честне́й  ико́не  Твое́й  Держа́вней  и  светоза́рный  луч  сла́вы  чуде́с  Твои́х  да  нисхо́дит  от  нея́  на  всех  с  ве́рою  Тебе́  моля́щихся  и  вопию́щих  Бо́гу:  Аллилу́ия.

Кондак,  глас  8-й

Взбра́нной  Воево́де  победи́тельныя  пе́сни  прино́сим,  я́ко  дарова́ся  нам  Держа́ва  Твоя́,  и  ничесо́же  устраши́мся,  не  от  ми́ра  бо  спасе́ние  на́ше,  но  превознесе́нныя  Влады́чицы  милосе́рдием  огражда́емся  и  тому́  днесь  ра́дуемся,  я́ко  прии́де  Засту́пница  на  стра́жу  земли́  Своея́.

7/20  марта,  также  29  мая/11  июня

Иконы  Божией  Матери  «Споручница  грешных»

Тропарь,  глас  4-й

Умолка́ет  ны́не  вся́кое  уны́ние  и  страх  отча́яния  исчеза́ет,  гре́шницы  в  ско́рби  се́рдца  обрета́ют  утеше́ние  и  небе́сною  любо́вию  озаря́ются  све́тло:  днесь  бо  Ма́терь  Бо́жия  простира́ет  нам  спаса́ющую  ру́ку  и  от  Пречи́стаго  о́браза  Своего́  веща́ет,  глаго́лющи:  Аз  Спору́чница  гре́шных  к  Моему́  Сы́ну,  Сей  дал  есть  Мне  за  них  ру́це  слы́шати  Мя  вы́ну.  Те́мже,  лю́дие,  обремене́ннии  грехми́  и  скорбьми́  мно́гими,  припади́те  к  подно́жию  ико́ны  Ея́,  со  слеза́ми  вопию́ще:  засту́пнице  ми́ра,  гре́шным  Спору́чнице,  умоли́  Ма́терними  Твои́ми  моли́твами  Изба́вителя  всех,  да  Боже́ственным  всепроще́нием  покры́ет  грехи́  на́ша  и  све́тлыя  две́ри  ра́йския  отве́рзет  нам,  Ты  бо  еси́  предста́тельство  и  спасе́ние  ро́да  христиа́нскаго.

Кондак,  глас    1-й

Честно́е  жили́ще  бы́вшее  неизрече́ннаго  естества́  Боже́ственнаго  вы́ше  сло́ва  и  па́че  ума́  и  гре́шным  еси́  Спору́чница,  подава́еши  благода́ть  и  исцеле́ние,  я́ко  Ма́ти  всех  Ца́рствующаго:  моли́  Сы́на  Твоего́  получи́ти  нам  ми́лость  в  День  су́дный.

14/27  марта,  также  16/29  августа

Иконы  Божией  Матери  «Феодоровская»

Тропарь,  глас  4-й

Днесь  све́тло  красу́ется  преимени́тый  град  Кострома́  и  вся  Ру́сская  страна́,  созыва́ющи  к  весе́лию  вся  боголюби́выя  наро́ды  христиа́нския,  на  пресла́вное  торжество́  Бо́жия  Ма́тере,  прише́ствия  ра́ди  чудотво́рнаго  Ея́  и  многоцеле́бнаго  о́браза,  днесь  бо  яви́ся  нам  пресве́тлое  вели́кое  со́лнце,  прииди́те,  вси  Богоизбра́ннии  лю́дие,  но́вый  Изра́иль,  ко  исто́чнику  цельбоно́сному,  источа́ет  бо  нам  неоску́дныя  ми́лости  Пресвята́я  Богоро́дица  и  избавля́ет  вся  гра́ды  и  страны  христиа́нския  невреди́мы  от  всех  наве́т  вра́жиих.  Но,  о  Всеми́лостивая  Госпоже́  Де́во  Богоро́дице  Влады́чице,  спаси́  страну́  на́шу,  и  архиере́и,  и  вся  лю́ди  Твоего́  достоя́ния  от  всех  бед  по  вели́цей  Твое́й  ми́лости,  да  зове́м  Ти:  ра́дуйся,  Де́во,  христиа́ном  похвало́.

Другой  тропарь,  глас  тот  же

Прише́ствием  честны́я  Твоея́  ико́ны  Богоотрокови́це,  обра́дованный  днесь  Богохрани́мый  град  Кострома́  я́коже  дре́вний  Изра́иль  к  киво́ту  Заве́та,  притека́ет  ко  изображе́нию  лица́  Твоего́,  и  воплоти́вшагося  от  Тебе́  Бо́га  на́шего,  да  Твои́м  Ма́терним  к  Нему́  предста́тельством  при́сно  хода́тайствуеши  всем,  под  сень  кро́ва  Твоего́  прибега́ющим,  мир  и  ве́лию  ми́лость.

Кондак,  глас  8-й

Притеце́м,  лю́дие,  вси  к  ти́хому  и  до́брому  приста́нищу,  в  дом  Бо́жия  Ма́тере,  чу́дному  о́бразу  Цари́цы  и  Богоро́дицы,  за  неизрече́нную  ми́лость  Ея  явле́нному,  ве́рно  припа́дающе  и  вопию́ще:  о  Всеми́лостивая  Влады́чице,  за  спаси́тельное  Твое́  смотре́ние,  чу́днаго  о́браза  к  нам  прише́ствие,  посети́  нас,  гре́шных,  све́тло  сотворя́ющих  пра́зднество  Твое́,  укрепи́  страну́  на́шу,  ди́вно  на  враги́  побе́ду  подаю́щи,  и  ве́ру  утверди́.  Це́рковь  Сы́на  Твоего́  непоколеби́му  соблюди́,  притека́ющих  к  Тебе́  спаси́,  от  вся́ких  напа́стей  изба́ви,  сохраня́ющи  в  ми́ре  все  Правосла́вие,  да  зове́м  Ти:  ра́дуйся,  Неве́сто  Неневе́стная.

Другой  кондак,  глас  тот  же

Благода́рственная  принося́ще  Ти,  раби́  Твои́,  Богороди́тельнице,  о  всех,  и́миже  благоде́яла  еси́  гра́ду  на́шему,  из  глубины́  души́  взыва́ем  к  Тебе́  и  ми́ли  ся  де́ем:  не  преста́ни,  Влады́чице,  Ма́терними  к  Сы́ну  Твое́му  и  Богу  на́шему  моли́твами  подава́ти  вся  блага́я  и  спаси́тельная  всем,  ве́рою  и  любо́вию  вопи́ющим  Ти:  ра́дуйся,  Де́во,  христиа́н  похвало́.

19  марта/1  апреля

Иконы  Божией  Матери  «Умиление»

Тропарь,  глас  4–й

К  Богоро́дице  с  умиле́нием  припаде́м,  вси  грехми́  обремене́ннии,  чудотво́рную  Ея́  ико́ну  Умиле́ние  облобыза́юще  и  вопию́ще  со  слеза́ми:  Влады́чице,  приими́  моле́ние  недосто́йных  раб  Твои́х  и  пода́ждь  нам,  прося́щим,  ве́лию  Твою́  ми́лость.

Кондак,  глас  3-й

Ю́же  подража́я  непло́дную  смоко́вницу,  аз  окая́нный,  умиле́ния  пло́да  отню́д  не  приношу́  и  посече́ния  страшу́ся,  но,  взира́я  к  чудотво́рней  ико́не  Твое́й  Умиле́ния,  Влады́чице,  стеню́  от  се́рдца  и  вопию́:  умили́ся,  Благосе́рдая,  и  мне,  окамене́нному  се́рдцем,  благоволи́  пода́ти  душе́вное  и  серде́чное  умиле́ние.

3/16  апреля

Иконы  Божией  Матери  «Неувядаемый  цвет»

Тропарь,  глас  5-й

Преблагослове́нная  Богоро́дице  Де́во,  покланя́емся  Твое́му  Пречи́стому  о́бразу,  Тебе́  пое́м  хвале́бную  песнь,  Тебе́  прино́сим  ну́жды,  го́ре  и  сле́зы,  Ты  же,  о  кро́ткая  Засту́пница  на́ша,  Тебе́  так  близки́  земны́я  печа́ли.  Приими́  на́ша  воздыха́ния.  Помози́  нам  и  от  бед  спаси́.  Неуста́нно  бо  и  со  умиле́нием  да  зове́м  Ти:  ра́дуйся,  Ма́ти  Бо́жия,  Цве́те  неувяда́емый.

Кондак,  глас  6-й

Предста́тельство  христиа́н  непосты́дное,  хода́тайство  ко  Творцу́  непрело́жное,  не  пре́зри  гре́шных  моле́ний  гла́сы,  но  предвари́,  я́ко  Блага́я,  на  по́мощь  нас,  ве́рно  зову́щих  Ти;  ускори́  на  моли́тву  и  потщи́ся  на  умоле́ние,  предста́тельствующи  при́сно,  Богоро́дице,  чту́щих  Тя.

18  апреля/1  мая

Иконы  Божией  Матери  Максимовская

Тропарь,  глас  4-й

Днесь  све́тло  красу́ется  сла́внейший  град  Влади́мир,  ра́достно  соверша́я,  Влады́чице,  пра́здник  явле́ния  Твоего́  святи́телю  Макси́му,  в  нем  бы́вшаго,  о  не́мже  ны́не  воспомина́юще  и  моля́щеся  Тебе́,  взыва́ем  си́це:  о  пречу́дная  Влады́чице  Богоро́дице,  моли́ся  Преве́чному  Архиере́ю,  Сы́ну  Твое́му,  да  непоколеби́му  утверди́т  Це́рковь  Правосла́вную,  град  наш  Влади́мир  и  всю  Ру́сскую  зе́млю  в  ми́ре  сохрани́т  и  спасе́т  в  правове́рии  ду́ши  на́ша.

Кондак,  глас  6-й

При́зри  на  нас,  Всепе́тая  Богоро́дице,  возсия́й  просвеще́ние  сердце́м  помраче́нным  и  озари́  ста́до  Твое́,  Пречи́стая,  ели́ка  бо  хо́щеши  и  мо́жеши,  я́ко  Ма́ти  су́щи  Зижди́теля,  и  возопи́й  моля́щим  Тя:  Аз  е́смь  с  ва́ми  и  никто́же  возмо́жет  на  вы.

25          апреля/8  мая, 26          также  17/30  сентября Иконы  Божией  Матери  Цареградская Тропарь,  глас  1-й

Возсия́  нам,  я́ко  со́лнце  светоза́рное  от  восто́ка  в  велеле́пии,  Твоя́,  Влады́чице,  ико́на,  озаря́ющи  чуде́с  сия́нием  пресла́вно  всех,  приходя́щих  к  ней  с  ве́рою  и  любо́вию  и  моля́щихся  усе́рдно  к  Твое́му,  е́же  о  Сы́не  Твое́м  и  Бо́зе,  вели́чию.  Сла́ва  Бо́гу,  Евфроси́ном  сию́  да́вшему  нам,  сла́ва  Приве́дшему  ю́  от  Царьгра́да,  сла́ва  Даю́щему  то́ю  всем  исцеле́ния.

Кондак,  глас  8-й

Препросла́вленная  Вы́шняго  Ма́терь  созыва́ет  к  песнопе́нию  нас  Своего́  о́браза  прише́ствием  от  Царьгра́да,  и  возбужда́ет  зре́нием  того́  на  по́двиг,  побежда́ти  сопроти́вных  си́лу,  и  к  Ней,  я́ко  на́шея  ра́дости  вино́вней,  пе́ти:  ра́дуйся,  Неве́сто  Неневе́стная.

1/14  мая,  9/22  декабря

Иконы  Божией  Матери  «Нечаянная  Радость»

Тропарь,  глас  4-й

Днесь,  ве́рнии  лю́дие,  духо́вно  торжеству́ем,  прославля́юще  Засту́пницу  усе́рдную  ро́да  христиа́нскаго  и  притека́юще  к  пречи́стому  Ея́  о́бразу,  взыва́ем  си́це:  о  преми́лостивая  Влады́чице  Богоро́дице,  пода́ждь  нам  неча́янную  ра́дость,  обремене́нным  грехи́  и  скорбьми́  мно́гими,  и  изба́ви  нас  от  вся́каго  зла,  моля́щи  Сы́на  Твоего́,  Христа́  Бо́га  на́шего,  спасти́  ду́ши  на́ша.

Кондак,  глас  6-й

Не  и́мамы  ины́я  по́мощи,  не  и́мамы  ины́я  наде́жды,  ра́зве  Тебе́,  Влады́чице:  Ты  нам  помози́,  на  Тебе́  надее́мся  и  Тобо́ю  хва́лимся,  Твои́  бо  есмы́  раби́,  да  не  постыди́мся.

5/18  мая

Иконы  Божией  Матери  «Неупиваемая  Чаша»

Тропарь,  глас  4-й

Днесь  притеце́м  ве́рнии  к  Боже́ственному  и  пречу́дному  о́бразу  Пресвяты́я  Богома́тери,  напоя́ющей  ве́рных  сердца́  небе́сною    Неупива́емою  Ча́шею  Своего́  милосе́рдия  и  лю́дем  ве́рным  чудеса́  показу́ющей.  Я́же  мы  ви́дяще  и  слы́шаще  духо́вно  пра́зднуем  и  те́пле  вопие́м:  Влады́чице  преми́лостивая,  исцели́  на́ша  неду́ги  и  стра́сти  моля́щи  Сы́на  Твоего́  Христа́  Бо́га  на́шего  спасти́  ду́ши  на́ша.

Кондак,  глас  6-й

Предста́тельство  христиа́н  непосты́дное,  хода́тайство  ко  Творцу́  непрело́жное,  не  пре́зри  гре́шных  моле́ний  гла́сы,  но  предвари́,  я́ко  Блага́я,  на  по́мощь  нас,  ве́рно  зову́щих  Ти;  ускори́  на  моли́тву  и  потщи́ся  на  умоле́ние,  предста́тельствующи  при́сно,  Богоро́дице,  чту́щих  Тя.

7/20  мая

Иконы  Божией  Матери  Жировицкая

Тропарь,  глас  2й

По́мощи  от  Тебе́  тре́бующия  не  пре́зри,  Влады́чице,  и  милосе́рдия  бе́здну  отве́рзи  всем  притека́ющим  к  цельбоно́сней  ико́не  Твое́й.  Печа́ли  на́ша  жите́йския  утоли́,  Всеще́драя,  и  от  юдо́ли  сея́  плаче́вныя  к  ра́дости  ве́чней  ве́рныя  Твоя́  преста́ви.  Тебе́  бо  вси  стяжа́хом  наде́жду  и  утвержде́ние,  ми́лости  исто́чник,  покро́в  и  спасе́ние  душ  на́ших.

Другой  тропарь,  глас  5-й

Пред  свято́ю  Твое́ю  ико́ною,  Влады́чице,  моля́щиися  исцеле́ний  сподобля́ются,  ве́ры  и́стинныя  позна́ние  прие́млют  и  ага́рянская  наше́ствия  отража́ют.  Те́мже  и  нам,  к  Тебе́  припа́дающим,  грехо́в  оставле́ния  испроси́,  по́мыслами  благоче́стия  сердца́  на́ша  просвети́  и  к  Сы́ну  Твое́му  моли́тву  вознеси́  о  спасе́нии  душ  на́ших.

Кондак,  глас  4-й

Вели́чия  Твоя́  кто  испове́сть,  Пресвята́я  Де́во,  Творца́  всех  Христа́  Бо́га  Ро́ждшая?  Еди́на  бо  еси́  Ма́ти  и  Де́во,  преблага́я,  препросла́вленная,  упова́ние  на́ше,  исто́чник  благосты́ни,  ве́рным  прибе́жище  и  ми́ру  спасе́ние.

21  мая/3  июня

Иконы  Божией  Матери  Красногорская

или  Черногорская

Тропарь,  глас  2-й

Ра́дуйся,  свята́я  горо́  Кра́сная,  небеси́  подо́бная,  сла́ва  бо  Бо́жия  на  тебе́  возсия́.  Взыгра́йте,  го́ры  и  хо́лми,  весе́лием,  я́ко  на  сей  горе́  ико́на  Бо́жия  Ма́тере,  честна́го  Ея́  умиле́ния,  просла́вися.  Лику́йте,  челове́цы,  и  весели́теся,  я́ко  нам  дарова́ся  бога́тство  неотъе́млемое,  исцеле́ний  сокро́вище;  гла́сы,  я́коже  тру́бы,  возшуми́те,  прославля́юще  Ея́  чудеса́  пресла́вная.  И  Ты,  Чи́стая,  ра́дуйся,  я́ко  с  Тобо́ю  Госпо́дь.

Кондак,  глас  3-й

На  горе́  святе́й  ви́дяще  Твою́  святу́ю  ико́ну,  Богоро́дице,  Ма́ти  Де́во,  пое́м  Твоего́  светоо́бразнаго  ли́ка  изображе́ние,  поклоня́емся  Твое́й  святе́й  ико́не,  почита́ем  о́ную,  и  сла́вим  тоя́  пресла́вная  чудеса́,  и  си́це  зове́м  Тебе́:  ра́дуйся,  Неве́сто  Неневе́стная.

21  мая/3  июня,  также  23  июня/6  июля

и  26  августа/8  сентября

Иконы  Божией  Матери  Владимирская

Тропарь,  глас  4-й

Днесь  све́тло  красу́ется  сла́внейший  град  Москва́,  я́ко  зарю́  со́лнечную  восприи́мши,  Влады́чице,  чудотво́рную  Твою́  ико́ну,  к  не́йже  ны́не  мы  притека́юще  и  моля́щеся  Тебе́  взыва́ем  си́це:  о  Пречу́дная  Влады́чице  Богоро́дице,  моли́ся  из  Тебе́  воплоще́нному  Христу́  Бо́гу  на́шему,  да  изба́вит  град  сей  и  вся  гра́ды,  и  страны  христиа́нския  невреди́мы  от  всех  наве́т  вра́жиих  и  спасе́т  ду́ши  на́ша,  я́ко  Милосе́рд.

Кондак,  глас  8-й

Взбра́нной  Воево́де  победи́тельная,  я́ко  изба́вльшеся  от  злых  прише́ствием  Твоего́  честна́го  о́браза,  Влады́чице  Богоро́дице,  све́тло  сотворя́ем  пра́зднество  сре́тения  Твоего́  и  обы́чно  зове́м  Ти:  ра́дуйся,  Неве́сто  Неневе́стная.

28  мая/10  июня

Иконы  Божией  Матери  Никейская

Тропарь,  глас  4-й

Бысть  чре́во  Твое́  свята́я  трапе́за,  иму́щи  Небе́снаго  Хле́ба,  Христа́,  от  Него́же  всяк  яды́й  не  умира́ет,  я́коже  рече́  вся́ческих,  Богоро́дице,  Пита́тель.

Кондак,  глас  6-й

Предста́тельство  христиа́н  непосты́дное,  хода́тайство  ко  Творцу́  непрело́жное,  не  пре́зри  гре́шных  моле́ний  гла́сы,  но  предвари́,  я́ко  Блага́я,  на  по́мощь  нас,  ве́рно  зову́щих  Ти;  ускори́  на  моли́тву  и  потщи́ся  на  умоле́ние,  предста́тельствующи  при́сно,  Богоро́дице,  чту́щих  Тя.

3/16  июня

Иконы  Божией  Матери  Югская

Тропарь,  глас  4-й

Днесь,  я́ко  со́лнце  пресве́тлое,  возсия́  нам  на  возду́се  всечестна́я  ико́на  Твоя́,  Влады́чице,  луча́ми  ми́лости  мир  просвеща́ющи,  ю́же  вели́кая  Росси́я,  я́ко  не́кий  дар  Боже́ственный,  свы́ше  благогове́йне  восприе́мши,  прославля́ет  Тя,  Богома́ти,  всех  Влады́чицу,  и  от  Тебе́  ро́ждшагося  Христа́  Бо́га  на́шего  велича́ет  ра́достно.  Ему́же  моли́ся,  о  Госпоже́  Цари́це  Богоро́дице,  да  сохрани́т  вся  гра́ды  и  стра́ны  христиа́нския  невреди́мы  от  всех  наве́т  вра́жиих  и  спасе́т  ве́рою  покланя́ющихся  Его́  Боже́ственному  и  Твое́му  Пречи́стому  о́бразу,  Де́во  неискусобра́чная.

Кондак,  глас  8-й

Притеце́м,  лю́дие,  к  Де́ве  и  Богоро́дице  Цари́це,  благодаря́ще  Христа́  Бо́га  на́шего,  и  к  Тоя́  чудотво́рней  ико́не  уми́льне  взира́юще,  припаде́м  и  возопие́м  Ей:  о  Влады́чице  Мари́е,  присети́вше  страну́  сию́  Твоего́  честна́го  о́браза  явле́нием  чуде́сно,  спаса́й  в  ми́ре  и  благовре́менстве  страну́  на́шу  и  вся  христиа́ны,  насле́дники  показу́ющи  небе́сныя  жи́зни,  Тебе́  бо  ве́рно  зове́м:  ра́дуйся,  Де́во,  ми́ру  спасе́ние.

8/21  июня

Иконы  Божией  Матери  Урюпинская

Тропарь,  глас  3-й

Яви́лася  еси́  на  дре́ве  в  Донско́й  земли́  благода́тная  Твоя́  ико́на,  Богоро́дице,  больны́я  исцеля́ти,  заблу́ждшия  обраща́ти;  те́мже  уми́льно  мо́лимся  Тебе́:  изба́ви  град  наш  от  вся́каго  зла  и  спаси́  лю́ди,  к  Тебе́  притека́ющия.

Кондак,  глас  5-й

Всеблага́я  чи́стая  Богоро́дице,  к  Тебе́  прибега́ем,  ве́рнии,  Тобо́ю  бо  позна́хом  ми́лость  Бо́жию,  чу́дную  ико́ну  Твою́,  от  нея́же  вси  здра́вие  и  спасе́ние  прие́млем.

11/24  июня

Иконы  Божией  Матери  «Достойно  есть»

или  «Милующая»

Тропарь,  глас  4-й

Отце́в  все  Афо́нское  мно́жество,  собери́теся,  ве́рно  пра́зднующе  днесь  ра́дующеся  и  све́тло  восклица́юще  вси  в  весе́лии,  Бо́жия  бо  Ма́ти  от  А́нгела  пресла́вно  воспева́ется.  Те́мже,  я́ко  Богоро́дицу,  при́сно  Сию́  сла́вим.

Другой  тропарь,  глас  тот  же

Притеце́м  ве́рнии  со  дерзнове́нием  к  Ми́лующей  Цари́це  Богоро́дице  и  умиле́нно  воззове́м  к  Ней:  низпосли́  на  ны  ми́лости  Твоя́  бога́тыя:  град  сей  изба́ви  от  вся́каго  обстоя́ния,  мир  да́руй  ми́рови  и  спасе́ние  душа́м  на́шим.

Кондак,  глас  4-й

Пра́зднует  днесь  весь  Афо́н,  я́ко  песнь  прия́т  от  А́нгела  чу́дно  Тебе́,  чи́стей  Богома́тери,  Ю́же  вся  тварь  чтит,  сла́вящи.

Другой  кондак,  глас  8-й

Арха́нгельский  глас  вопие́м  Ти,  Всецари́це:  досто́йно  есть,  я́ко  вои́стинну  блажи́ти  Тя,  Богоро́дицу,  Присноблаже́нную  и  Пренепоро́чную  и  Ма́терь  Бо́га  на́шего.

18  июня/1  июля

Иконы  Божией  Матери  Боголюбская

Тропарь,  глас  1-й

Боголюби́вая  Цари́це,  неискусому́жная  Де́во  Богоро́дице  Мари́е!  Моли́  за  ны  Тебе́  возлюби́вшаго  и  ро́ждшагося  от  Тебе́  Сы́на  Твоего́  Христа́  Бо́га  на́шего,  пода́ти  нам  оставле́ние  прегреше́ний,  ми́рови  мир,  земли́  плодо́в  изоби́лие,  па́стырем  святы́ню  и  всему́  челове́чу  ро́ду  спасе́ние.  Гра́ды  на́ша  и  всю  зе́млю  Росси́йскую  от  нахожде́ния  иноплеме́нных  заступи́  и  от  междоусо́бныя  бра́ни  сохрани́.  О  Ма́ти  Боголюби́вая  Де́во!  О  Цари́це  всепе́тая!  Ри́зою  Твое́ю  покры́й  нас  от  вся́каго  зла,  от  ви́димых  и  неви́димых  враг  защити́  и  спаси́  ду́ши  на́ша.

Другой  тропарь,  глас  тот  же

Всепе́тая  и  всесла́вная  Цари́це,  Ма́ти  всея́  тва́ри  Соде́теля,  христиа́нская  наде́ждо  и  засту́пнице,  печа́льных  утеше́ние,  ненаде́ющихся  и  отча́явшихся  ско́рое  наде́яние!  Мо́лим  Тя,  ми́лостива  бу́ди  нам,  гре́шным,  и  не  оста́ви  раб  Свои́х,  и  не  отри́ни  моле́ния  ве́рных,  в  скорбе́х  и  бе́дах  пред  честны́м  о́бразом  Твои́м  избавле́ния  тре́бующих.  О  Влады́чице,  блага́я  помо́щнице!  Ри́зою  Твое́ю  честно́ю  нас  защити́  и  от  всех  зол  изба́ви,  моля́щи  Сы́на  Твоего́,  Христа́  Бо́га  на́шего,  да  спасе́т  ду́ши  на́ша,  я́ко  Милосе́рд.

Кондак,  глас  3-й

Де́ва  днесь  предстои́т  Сы́ну,  ру́це  Свои́  к  Нему́  простира́ющи,  святы́й  князь  Андре́й  ра́дуется,  и  с  ним  Росси́йская  страна́  торжеству́ет,  нас  бо  ра́ди  мо́лит  Богоро́дица  Преве́чнаго  Бо́га.

26  июня/9  июля

Иконы  Божией  Матери  Тихвинская

Тропарь,  глас  4-й

Днесь,  я́ко  со́лнце  пресве́тлое,  возсия́  нам  на  возду́се  всечестна́я  ико́на  Твоя́,  Влады́чице,  луча́ми  ми́лости  мир  просвеща́ющи,  ю́же  вели́кая  Росси́я,  я́ко  не́кий  дар  Боже́ственный  свы́ше  благогове́йне  восприи́мши,  прославля́ет  Тя,  Богома́ти,  всех  Влады́чицу,  и  от  Тебе  ро́ждшагося  Христа́  Бо́га  на́шего  велича́ет  ра́достно.  Ему́же  моли́ся,  о  Госпоже́  Цари́це  Богоро́дице,  да  сохрани́т  вся  гра́ды  и  стра́ны  христиа́нския  невреди́мы  от  всех  наве́т  вра́жиих  и  спасе́т  ве́рою  покланя́ющихся  Его́  Боже́ственному  и  Твое́му  пречи́стому  о́бразу,  Де́во  неискусобра́чная.

Кондак,  глас  8-й

Притеце́м,  лю́дие,  к  Де́ве  Богоро́дице  Цари́це,  благодаря́ще  Христа́  Бо́га,  и  к  Тоя́  чудотво́рней  ико́не  уми́льно  взира́юще,  припаде́м  и  возопие́м  Ей:  о  Влады́чице  Мари́е!  Присети́вши  страну́  сию́  Твоего́  честна́го  о́браза  явле́нием  чуде́сно,  спаса́й  в  ми́ре  и  благовре́менстве  вся  Христиа́ны,  насле́дники  показу́ющи  небе́сныя  жи́зни,  Тебе́  бо  ве́рно  зове́м:  ра́дуйся,  Де́во,  ми́ра  спасе́ние.

28  июня/11  июля,  также  12/25  июля

Иконы  Божией  Матери  «Троеручица»

Тропарь,  глас  4-й

Днесь  всеми́рная  ра́дость  возсия́  нам  ве́лия,  дарова́ся  святе́й  горе́  Афо́нстей  цельбоно́сная  Твоя́,  Влады́чице  Богоро́дице,  ико́на,  со  изображе́нием  тричи́сленно  и  неразде́льно  пречи́стых  рук  Твои́х,  в  прославле́ние  Святы́я  Тро́ицы:  созыва́еши  бо  ве́рных  и  моля́щихся  Тебе́  о  сем  позна́ти,  я́ко  двема́  и́маши  Сы́на  и  Го́спода  держа́ти,  тре́тию  же  яви́  на  прибе́жище  и  покро́в  чту́щим  Тя  от  вся́ких  напа́стей  и  бед  избавля́ти,  да  вси  притека́ющия  к  Тебе́  ве́рою,  прие́млют  от  всех  зол  свобожде́ние,  от  враго́в  защище́ние.  Сего́  ра́ди  и  мы  вку́пе  со  Афо́ном  вопие́м:  ра́дуйся,  Благода́тная,  Госпо́дь  с  Тобо́ю.

Кондак,  глас  8-й

Днесь  весе́лое  наста́  ны́не  Твое́  торжество́,  Богома́ти  пречи́стая;  вси  ве́рнии  испо́лнишася  ра́дости  и  весе́лия,  я́ко  сподо́бльшиеся  изря́дно  воспе́ти  преди́вное  явле́ние  честна́го  о́браза  Твоего́  и  ро́ждшагося  из  Тебе́  Младе́нца,  и́стинна  же  Бо́га,  Его́же  двема́  рука́ма  объе́млеши,  и  тре́тиею  от  напа́стей  и  бед  нас  изыма́еши  и  избавля́еши  от  всех  зол  и  обстоя́ний.

30  июня/13  июля

Иконы  Божией  Матери  Волынская

Тропарь,  глас  4-й

Засту́пнице  земли́  Росси́йския  от  наше́ствия  Свейскаго  и  непреста́нная  за  нас  моли́твеннице,  мир  земли́  и  душа́м  на́шим  у  Го́спода  испроси́,  да  святи́тся  в  нас  и́мя  Бо́жие  во  ве́ки.

Кондак,  глас  6-й

Предста́тельство  христиа́н  непосты́дное,  хода́тайство  ко  Творцу́  непрело́жное,  не  пре́зри  гре́шных  моле́ний  гла́сы,  но  предвари́,  я́ко  Блага́я,  на  по́мощь  нас,  ве́рно  зову́щих  Ти;  ускори́  на  моли́тву  и  потщи́ся  на  умоле́ние,  предста́тельствующи  при́сно,  Богоро́дице,  чту́щих  Тя.

2/15  июля

Иконы  Божией  Матери  Ахтырская

к  Тропарь,  глас  4-й

Преблагослове́нная  Де́во,  Богороди́тельнице  чи́стая,  у  Креста́  Сы́на  Твоего́  и  Бо́га  на́шего  предстоя́щи,  скорбь  ве́лию  претерпе́ла  еси́  и  благода́ть  от  Него́  прияла́  еси́  су́щия  в  ско́рбех  утеша́ти.  Те́мже  на  пречи́стый  о́браз  Твой  благогове́йно  взира́юще  и  изображе́нную  Тя  на  нем  пред  Кресто́м  Спа́са  на́шего  ви́дяще,  умиле́нно  к  Тебе́  вопие́м:  Засту́пнице  усе́рдная,  блага́я  и  ми́лостивая!  Ускори́  изба́вити  ны  от  вся́кия  ско́рби,  ну́жды  и  боле́зни  и  спаси́  ду́ши  на́ша,  да  Тя  со  благодаре́нием  сла́вим  во  ве́ки.

Кондак,  глас  8-й

Притеце́м,  ве́рнии,  к  благода́тному  ми́лостей  и  щедро́т  исто́чнику  –  чудотво́рному  Пречи́стыя  Де́вы  о́бразу:  сей  бо  нам  свы́ше  дарова́ся,  душа́м  и  телесе́м  во  спасе́ние,  ему́же  покланя́ющеся  с  любо́вию,  возопие́м  к  Богоро́дице,  о  Всепе́тая  Ма́ти,  о  Цари́це  Всеми́лостивая,  покры́й  и  соблюди́  нас  от  вся́каго  зла  Твои́м  к  Бо́гу  Ма́терним  предста́тельством.

5/18  июля

Иконы  Божией  Матери  «Экономисса»

Тропарь,  глас  4-й

Предста́тельство  стра́шное  и  непосты́дное,  не  пре́зри,  Блага́я,  моли́тв  на́ших,  Всепе́тая  Богоро́дице,  ми́лостивая  ве́рных  Домострои́тельнице,  утверди́  правосла́вных  жи́тельство,  спаси́  страну́  на́шу  и  всех  правосла́вно  живу́щих  в  ней  защити́,  зане́  родила́  еси́  Бо́га,  еди́на  Благослове́нная.

Кондак,  глас  6-й

Предста́тельство  христиа́н  непосты́дное,  хода́тайство  ко  Творцу́  непрело́жное,  не  пре́зри  гре́шных  моле́ний  гла́сы,  но  предвари́,  я́ко  Блага́я,  на  по́мощь  нас,  ве́рно  зову́щих  Ти;  ускори́  на  моли́тву  и  потщи́ся  на  умоле́ние,  предста́тельствующи  при́сно,  Богоро́дице,  чту́щих  Тя.

10/23  июля

Иконы  Божией  Матери  Коневская

Тропарь,  глас    1-й

Возсия́  нам,  я́ко  со́лнце  светоза́рное,  от  восто́ка  в  велеле́пии  Твоя́,  Влады́чице,  ико́на,  озаря́ющи  чуде́с  сия́нием  пресла́вно  всех  непреста́нно  приходя́щих  к  ней  с  ве́рою  и  любо́вию,  и  моля́щихся  усе́рдно  Твое́му  е́же  о  Сы́не  Твое́м  и  Бо́зе  вели́чию.  Сла́ва  Бо́гу,  Арсе́нием  сию́  да́вшему  нам,  сла́ва  Возврати́вшему  ́ю  от  Новагра́да,  сла́ва  Де́йствующему  то́ю  всем  исцеле́ния.

Кондак,  глас  8-й

Препросла́вленная  Вы́шняго  Ма́ти  созыва́ет  к  песнопе́нию  нас  Своего́  о́браза  прише́ствием  от  Новагра́да,  и  возбужда́ет  зре́нием  того́  на  по́двиг,  побежда́ти  сопроти́вных  си́лу,  и  к  Ней,  я́ко  на́шея  ра́дости  вино́вней,  пе́ти:  ра́дуйся,  Неве́сто  Неневе́стная.

16/29  июля

Иконы  Божией  Матери  Чирская    (Псковская) 

Тропарь,  глас  4-й

Я́ко  необори́мую  сте́ну  и  исто́чник  чуде́с,  стяжа́вше  Тя,  раби́  Твои́,  Богоро́дице  Пречи́стая,  сопроти́вных  ополче́ния  низлага́ем.  Те́мже  мо́лим  Тя:  мир  гра́ду  Твое́му  да́руй  и  душа́м  на́шим  ве́лию  ми́лость.

Кондак,  глас  4-й

Честна́го  о́браза  Твоего́  зна́мение  пра́зднующе,  лю́дие  Твои́,  Богороди́тельнице,  и́мже  ди́вную  побе́ду  на  сопроти́вныя  гра́ду  Твое́му  дарова́ла  еси́,  те́мже  Тебе́  ве́рою  взыва́ем:  ра́дуйся,  Де́во,  христиа́н  похвало́.

18/31  июля,  2/15  июля

Иконы  Божией  Матери  Калужская

Тропарь,  глас  4-й

Засту́пнице  от  враг  иноплеме́нных  необори́мая  Калу́жския  земли́  и  изба́вительнице  от  смертоно́сныя  я́звы,  Ми́лостивая!  Изба́ви  рабы́  Твоя́  от  вся́ких  бед  и  боле́зней,  с  ве́рою  и  любо́вию  прибега́ющия  к  чудотво́рней  ико́не  Твое́й,  и  спаси́  ду́ши  на́ша.

Кондак,  глас  6-й

Не  и́мамы  пе́сней,  ниже́  Сло́вес,  ка́ко  досто́йно  восхвали́ти  Тя,  Ма́ти  Христа́  Бо́га  на́шего,  явле́ния  ра́ди  чудотво́рныя  ико́ны  Твоея́  земли́  Калу́жстей,  то́кмо  мо́жем  вопи́ти  Тебе́:  не  отврати́  ми́лости  Твоея́  от  нас  и  низпосли́  ю́  всем  притека́ющим  к  цельбоно́сней  ико́не  Твое́й.

28  июля/10  августа

Иконы  Божией  Матери  Смоленская

«Одигитрия»

Тропарь,  глас  4-й

К  Богоро́дице  приле́жно  ны́не  притеце́м,  гре́шнии  и  смире́ннии,  и  припаде́м,  в  покая́нии  зову́ще  из  глубины́  ду́ши:  Влады́чице,  помози́,  на  ны  милосе́рдовавши,  потщи́ся,  погиба́ем  от  мно́жества  прегреше́ний,  не  отврати́  Твоя́  рабы́  тщи,  Тя  бо  и  еди́ну  наде́жду  и́мамы.

Другой  тропарь,  глас  4-й

Не  умолчи́м  никогда́,  Богоро́дице,  си́лы  Твоя́  глаго́лати,  недосто́йнии.  Аще  бо  Ты  не  бы  предстоя́ла  моля́щи,  кто  бы  нас  изба́вил  от  толи́ких  бед?  Кто  же  бы  сохрани́л  доны́не  свобо́дны?  Не  отсту́пим,  Влады́чице,  от  Тебе́:  Твоя́  бо  рабы́  спаса́еши  при́сно  от  вся́ких  лю́тых.

Кондак,  глас  6-й

Предста́тельство  христиа́н  непосты́дное,  хода́тайство  ко  Творцу́  непрело́жное,  не  пре́зри  гре́шных  моле́ний  гла́сы,  но  предвари́,  я́ко  Блага́я,  на  по́мощь  нас,  ве́рно  зову́щих  Ти;  ускори́  на  моли́тву  и  потщи́ся  на  умоле́ние,  предста́тельствующи  при́сно,  Богоро́дице,  чту́щих  Тя.

28  июля/10  августа

Иконы  Божией  Матери  Гребневская

Тропарь,  глас  8-й

Днесь,  я́ко  солнце  пресве́тло,  просия́  в  Росси́йстей  стране́,  в  конце́  ея́  полу́деннем,  всечестна́я  ико́на  Твоя́,  Влады́чице,  ю́же  благове́рный  вели́кий  князь  Дими́трий  в  град  Москву́  принесе́.  Све́тло  пра́зднуем,  благове́рнии  лю́дие,  честна́го  о́браза  прише́ствие,  моля́щеся  приле́жно:  Влады́чице  Богоро́дице,  моли́ся  Сы́ну  Твое́му,  Христу́  Бо́гу  на́шему,  изба́вити  град  Москву́,  страну́  на́шу  и  вся  правосла́вныя  христиа́ны  от  ва́рварскаго  плене́ния  и  междоусо́бныя  бра́ни,  и  всех  наве́т  вра́жиих,  Тебе́  бо  Еди́ну  Засту́пницу  и́мамы.

Кондак,  глас  тот  же

От  святы́я  ико́ны  Твоея́,  Богоро́дице  Де́во,  источа́ются  исцеле́ния,  я́ко  ре́ки  мно́ги,  я́же  ви́девше,  росси́йстии  лю́дие,  си́це  глаго́лем:  о  Пресвята́я  Влады́чице  Богоро́дице,  не  забу́ди  гре́шных  раб  Твои́х,  моля́щихся  Христу́  Бо́гу  на́шему  спасти́ся  нам.

8/21  августа

Иконы  Божией  Матери  Толгская

Тропарь,  глас  4-й

Днесь  све́тло  сия́ет  на  То́лге  о́браз  Твой,  Пречи́стая  Де́во  Богоро́дице,  и  я́ко  со́лнце  незаходи́мое,  всегда́  ве́рным  подаде́ся,  его́же  ви́дев  на  возду́се  неви́димо  А́нгелы,  я́ко  ники́м  держи́ма,  преосвяще́нный  епи́скоп  гра́да  Росто́ва  Три́фон,  тече́  ко  явле́нному  светя́щемуся  столпу́  о́гненну  и  по  вода́м  я́ко  по  су́ху  пре́йде:  и  моля́шеся  Ти  ве́рно  о  па́стве  и  о  лю́дех.  И  мы  к  Тебе́  притека́юще  зове́м:  Пресвята́я  Де́во  Богоро́дице,  ве́рно  Тя  сла́вящих  спаса́й,  страну́  на́шу,  архиере́ев  и  вся  правосла́вныя  наро́ды  от  всех  бед  избавля́й  по  вели́цей  Твое́й  ми́лости.

Кондак,  глас  8-й

Чу́дное  и  богоприя́тное  светоно́снаго  зра́ка  Твоего́  явле́ние,  Пречи́стая  Де́во,  с  ве́рою  взира́ющим  быва́ет  изве́стное  ча́яние  спасе́ния,  столпо́м  бо  о́гненным  явля́ющи  предста́тельство,  неусы́пное  и  те́плое  за  ны  к  Бо́гу  возсыла́еши  моле́ние,  и́мже  страну́  Росси́йскую  от  вся́ких  бед  изба́ви,  мо́лимся,  да  ра́достными  усты́  вопие́м  Ти  вси:  ра́дуйся,  Предводи́тельнице  ве́чнаго  блаже́нства.

13/26  августа  и  в  Неделю  всех  святых

Иконы  Божией  Матери  «Умягчение  злых  сердец»  или  «Семистрельная»

Тропарь,  глас  5-й

Умягчи́  на́ша  зла́я  сердца́,  Богоро́дице,  и  напа́сти  ненави́дящих  нас  угаси́,  и  вся́кую  тесноту́  ду́ши  на́шея  разреши́,  на  Твой  бо  святы́й  о́браз  взира́юще,  Твои́м  сострада́нием  и  милосе́рдованием  о  нас  умиля́емся  и  ра́ны  Твоя́  лобыза́ем,  стрел  же  на́ших,  Тя  терза́ющих,  ужаса́емся.  Не  даждь  нам,  Ма́ти  благосе́рдная,  в  жестокосе́рдии  на́шем  и  от  жестокосе́рдия  бли́жних  поги́бнути,  Ты  бо  еси́  вои́стинну  злых  серде́ц  умягче́ние.

Кондак,  глас  2-й

Благода́тию  Твое́ю,  Влады́чице,  умягчи́  сердца  злоде́ев,  низпосли́  благодете́лей,  соблюда́ющи  их  от  вся́каго  зла,  благомоля́щимся  Ти  усе́рдно  пред  честны́ми  ико́нами  Твои́ми.

13/26  августа

Иконы  Божией  Матери  «Страстна́я»

Тропарь,  глас  4-й

Днесь  возсия́  неизрече́нно  ца́рствующему  гра́ду  на́шему  Москве́  ико́на  Богома́тере,  и  я́ко  светоза́рным  со́лнцем,  прише́ствием  тоя  озари́ся  весь  мир.  Небе́сныя  си́лы  и  ду́ши  пра́ведных  мы́сленно  торжеству́ют,  ра́дующеся,  мы  же  на  ню  взира́юще,  к  Богоро́дице  со  слеза́ми  вопие́м:  о,  всеми́лостивая  Госпоже́  Влады́чице  Богоро́дице,  моли́ся  из  Тебе́  воплоще́нному  Христу́  Бо́гу  на́шему,  да  пода́ст  мир  и  здра́вие  всем  Христиа́ном  по  вели́цей  и  неизрече́нней  Свое́й  ми́лости.

Кондак,  глас  3-й

Благода́ть  прия́хом  нетле́ния,  е́же  дарова́ла  еси́  нам,  спаси́тельнаго  Твоего́  целе́ния  чудотво́рным  Твои́м  о́бразом  честны́м,  Богоро́дице  Де́во,  те́мже  вопие́м  Ти  и  с  ра́достию  зове́м:  Госпоже́  Цари́це,  мо́лим  ти  ся  уми́льно,  гре́шнии,  со  слеза́ми,  глаго́люще:  о  Пресвята́я  Влады́чице,  ско́рое  нам  яви́  заступле́ние  и  по́мощь,  спаси́  ны  от  супоста́т  на́ших,  и  от  вся́кия  ско́рби  соблюди́,  зе́млю  на́шу  ми́ром  огради́,  и  вся  лю́ди  Твоя́  покры́й,  и  соблюди́  на  Тя  упова́ющия,  потщи́ся  изба́вити,  да  не  поги́бнем  зле,  раби́  Твои́,  но  да  зове́м  Ти:  ра́дуйся,  Неве́сто  Неневе́стная.

19  августа/1  сентября

Иконы  Божией  Матери  Донская

Тропарь,  глас  4-й

Засту́пнице  ве́рных  преблага́я  и  ско́рая,  Пречи́стая  Богоро́дице  Де́во!  Мо́лим  Тя  пред  святы́м  и  чудотво́рным  о́бразом  Твои́м,  да  я́коже  дре́вле  от  него́  заступле́ние  Твое́  гра́ду  Москве́  дарова́ла  еси́,  та́ко  ны́не  и  нас  от  вся́ких  бед  и  напа́стей  ми́лостиво  изба́ви,  и  спаси́  ду́ши  на́ша,  я́ко  милосе́рдая.

Кондак,  глас  2-й

Небе́сныя  оби́тели  пресели́вшаяся  с  пло́тию,  су́щия  на  земли́  ника́коже  оста́вила  еси́,  Богоро́дице,  о́браз  Боже́ственный  и  многочуде́сный  Пречи́стаго  Лица́  Твоего́  зре́ти  лю́бящим  Тя  и  покланя́тися  дарова́ла  еси́,  я́ко  зна́мение  Твоея́  благода́ти,  чтим  его́  лобыза́юще.

22  августа/4  сентября

Иконы  Божией  Матери  Грузинская

Тропарь,  глас  4-й

Днесь  све́тло  красу́ется  оби́тель  Красного́рская,  и  с  не́ю  ликовству́ет  Раи́фская  пусты́ня,  я́ко  зарю́  со́лнечную,  от  восто́ка  возсия́вшую,  восприи́мши,  Влады́чице,  чудотво́рную  Твою́  ико́ну,  е́юже  разгоня́еши  мглу  искуше́ний  и  бед  от  вопию́щих  ве́рно:  изба́ви  оби́тель  на́шу  и  вся  стра́ны  христиа́нския  от  всех  наве́т  вра́жиих  и  спаси́  ду́ши  на́ша,  я́ко  милосе́дная  Засту́пница  ро́да  христиа́нскаго.

Кондак,  глас  8-й

Тебе́,  избра́нней  от  всех  родо́в  Бо́жией  Ма́тери,  благода́рственная  пе́ния  прино́сим,  прише́ствием  честны́я  Твоея́  ико́ны,  раби́  Твоя́,  да  зове́м  Ти:  ра́дуйся,  Неве́сто  Неневе́стная.

В  пятницу  Светлой  седмицы

Иконы  Божией  Матери  «Живоносный  Источник»

Тропарь,  глас  2-й

Исто́чник  еси́  вои́стинну  воды́  живы́я,  Влады́чице,  неду́ги  бо  душ  и  теле́с  лю́тыя  прикоснове́нием  еди́ным  Твои́м  измыва́еши,  Во́ду  спасе́ния  Христа́  излива́ющи.

Другой  тропарь,  глас  4-й

Днесь  притеце́м  ве́рнии  к  Боже́ственному  и  цельбоно́сному  о́бразу  Пресвяты́я  Богоро́дицы,  излия́вшия  ка́пли  своих  излия́ний,  и  лю́дем  ве́рным  чуде́с  показа́вшия,  я́же  мы  ви́дяще  и  слы́шаще,  духо́вно  пра́зднуем  и  любе́зно  вопие́м  исцели́ти  на́ши  неду́ги  и  стра́сти,  я́коже  и  каркинския  и  тьмочи́сленныя  стра́сти  исцели́ла  еси́.  Те́мже  мо́лим  Тя,  Де́во  Пречи́стая,  моли́  воплоще́ннаго  из  Тебе́  Христа́  Бо́га  на́шего  спасти́ся  душа́м  на́шим.

Кондак,  глас  8-й

От  неистощи́мыя  Тя,  Исто́чниче  Богоблагода́тный,  подае́ши  ми,  точа́щи  во́ды  Твоея́  благода́ти,  приснотеку́щий  па́че  сло́ва.  Я́ко  бо  Сло́во  ро́ждшая  па́че  смы́сла,  молю́  Ти  ся,  ороси́  мя  благода́тию,  да  зову́  Ти:  ра́дуйся,  Водо́  спаси́тельная.

Иконы  Божией  Матери  «Прибавление  ума»

Тропарь,  глас  3-й

Во́лею  Отца́  Небе́снаго  зачала́  Сы́на  Бо́жия,  без  се́мене  земна́го  отца́,  пре́жде  творе́ния  ми́ра  от  Отца́  без  ма́тере  рожде́ннаго,  пло́тию  родила́  еси́,  Его́же  моли́  о  дарова́нии  нам  ума́  ко  спасе́нию  душ  на́ших.

Кондак,  глас  6-й

Рожде́ннаго  Ду́хом  от  Отца́  Небе́снаго,  пре́жде  сотворе́ния  денни́цы,  Тобо́ю  пло́тию  Рожде́ннаго  без  отца́,  не  наруши́в  де́вства,  Того́  умоли́  помо́чь  нам  победи́ть  за́вистию  одержи́маго  па́дшаго  денни́цу.  Да  оде́ржим  по́лную  побе́ду  над  диа́волом,  ми́ром  и  пло́тию,  Твои́ми  моли́твами,  Богоневе́стная.