Покаянный акафист пресвятой богородице

Детально: покаянный акафист пресвятой богородице - со всех открытых источников и разных уголков мира на сайте 1000-molitv.ru для наших уважаемых читателей.

Кондак 1

Избранной Небесным Царем, превысшей и умных чинов, всеблагой Царице, рода христианскаго Заступнице и от всех зол и напастей скорому вспоможению, вси мы, грешнии и в безмерных бедах сущии раби Ея, со слезами и умилением сердца, принесем покаянные пения: Ты же, яко премилосердная Мати наша, сама духоносному молению настави нас и прияти сия воздыхания души нашея удостой: о Благодатная, помилуй нас и спаси, и пачесолнечною теплотою любве Твоея грехми умерщвленный наш дух оживи.

Икос 1

Тьма неверия и в сне глубоце запустение жизни богоподобные объяша до конца предавшийся тлению род человеческий, и в неисходных пленицах падений греховных оковал все ны светоненавистник и древний убийца-диавол, князь мира сего. Но и врагами соделавшихся, не престала любити людей своих благость Творца, нас спасающего, и Тобою, о Пренепорочная дщерь Давидова, обетовал Он изначала даровати погибшим Семя жены Христа Еммануила. Се и мы ныне, аще и ослепихом очеса наша маловерием и ужасаемся глубины неотмытных беззаконий своих, но от Тебе, о Мати Света, чаем спасения, и не ищуще самооправдания во гресех неисчетных, Тебе надеждою непозыблемою к себе зовем: о Благодатная. на помощь к нам поспеши, — Царице Небесная, из бездны падений нас исхити, о Благодатная, лучами света горняго всеобдержащий мрак жития нашего озари, — Дево Пречистая, сиянием чистоты Твоея грехми потемневшие наша сердца освети, о Благодатная, бежати льщений лжи и греха Ты нас научи — Матерь Святейшая, любовь и верность правде в души наша вложи. О Благодатная, помилуй нас и спаси, и пачесолнечною теплотою любве Твоея грехми умерщвленный наш дух оживи.

Кондак 2

Оставивше двор отчий и, яко блудный сын, на страну далече отышедше, во мрак язычества, тину страстей и сень смертную впадоша вси сыны Сифовы, и ни царь и ни пророк, ни ангел и ни мудрец, но точию Божественный Сын Твой, о Благодатная Марие, возможе их к свету боговедения принести и вся силы, яже к животу и благочестию, даровати, да умиление, спасение обретши, Творцу и избавителю своему поем: Аллилуиа.

Икос 2

Шаташася всуе языцы и людие заблудшии поучахося тщетным, понеже забвено бысть чистое предание сынов Божиих, и сеть многобожия привлече осуетившиеся народы в кумирослужение лжи и истаявание вредоносных похотей и скверны угождения грехолюбивой плоти. Егда же предста Тебе, вещати дивная, воинств ангельских вождь — Гавриил, разгнася Светом Востока идольской лести ночная тьма, и начаток явися во Христе Иисусе всякия плоти конечнаго исцеления. Темже и мы умиленным сердцем, главизну спасения видяще, со Архангелом в благоговении Тебе взываем: о Благодатная, всегда с Тобою Бог и Господь, — Дево Богородице, спасение Той и нам в Тебе соделала, о Благодатная, коль благословен во истину пречистаго чрева Твоего Божественный Плод, — святая святых Святейшая, в Тебе вместися Невместимый и небом, не точию бренною землей, о Благодатная, колицее величие сотвори Тебе Царь и Господь, — Матерь Безневестная, любве безконечной и нам осияй животворящий свет. О, Благодатная, помилуй нас и спаси, и пачесолнечною теплотою любве Твоея грехми умерщвленный наш дух оживи.

Кондак 3

Новую тварь созидати и людей Своих во еже не земная, но горняя мудровати привести, сниде с небесе во юдоль земную Человеколюбец Господь, от Негоже и поднесь устрояется Царствие Божие на земли и претворяет собою, якоже квас добрый, да вскисает все многоразличное смешение человеческое. Мы же, единое стадо Христово возлюбивше и крепце во дворе Его присно сердцем утверждающеся, единодушно, и в падениях наших всяпобеждающему, Владыце жизни нашея поем: Аллилуиа.

Икос 3

Горний Иерусалим всегда осияя и всеоживляющей Благодатию Святаго Духа утешая прославленных Своих, яви Господь и в мире земном жизнь и силу Царствия Своего, и уже не юдолию плача и слез, но мира всеутоляющаго и радости нескомчаемыя, ея же никтоже не может отъяти, предстоит всем верным небошественный путь странствия нашего во временном сем бытии. На него же взирающе, и мы недостойнии и ленивии, к сему блаженству призвании, но изменою безверия и пустотою миролюбления себе из него извергшии, от Тебе, о Богомати, помощи и спасения себе чаем и слезами раскаяния и сердечного обращения от гибели сия вопием: о Благодатная, Ты нас исцели, — Мати милосердная, прощение Божие нам испроси, о Благодатная, к жизни в Сыне Твоем возврати. Небесный Покрове наш, током благодати, сущей в Тебе, изсохшее сердце в нас ороси, о Благодатная, не любити мира и злых, яже в мире, нас научи, — Дево Пречистая, влечения сердца нашего к чистой любви Христовой устреми. О, Благодатная, помилуй нас и спаси, и пачесолнечною теплотою любве Твоея грехми умерщвленной наш дух оживи.

Кондак 4

Небошественнаго пути златыя правила имуще и мало избранных, в сих подвизающихся, повсюду присно видяще, в Тебе, на высшую степень богоподобия восшедшей, образ небесной мудрости и в Бозе вечнаго созидания обретаем и Тобою преизлиха утешаемся, ибо наипаче пред всеми слагала еси в чистейшем сердце Твоем вся словеса деяний и учений Воплотившейся премудрости — Сына Твоего: отнюдуже приискренне о всех сих умилящиеся и дивная духа в Тебе созерцающе, толико прославльшемуся во святых Своих, похвально вси воспеваем: Аллилуиа.

Икос 4

Внутрь нас, якоже речет Господь, — в сердце человека, его просветлении, новой жизни и горе устремлениях, есть Царствие Божие, еже именуется правда и мир и радость о Дусе Святе, и красотою благоустроения души во избранных Божиих огнезрачне сияет нам. И сие совестию ведуще и духом ищуще, делы же студными и окаянством беззаконий своих вспять — во страну самоистуканных страстей — отторгающеся, Тебе, во избранных избранную, восполнити и утолити наше обнищание просим и скорбными воздыханиями сердца сыновне умоляем сице, о Благостная, приблизитеся к Тебе помози, — сил Повелительнице, о Бозе возмогати нас укрепи, о Благодатная, сею благодатию, в Тебе преизбыточествующею, оскудевающая сердца наша напой, — во блазе Помощнице цветы доброделания в пустынныя наши души всади, о Благодатная, достигати Царствия Сына Твоего подвигни нас и усоверши, — непорочности Вечне, духовные блага ценити и искати научи: О, Благодатная, помилуй нас и спаси, и пачесолнечною теплотою любве Твоея грехми умерщвленный наш дух оживи.

Кондак 5

Яко пшеница добрая на ниве, вырастает и красы плодит и зреет незримо на сердце человека Царствие Божие, и сторицею выращает Отец щедрот семя словес Его, аще почвою доброю, углубленною и потом усердия возделанною приемлет сие сердце наше. И сия вся добре ведуще и радостне созерцающе прославляем Единаго Виновника всяческого доброделания — Тебе, Отца светов, от Негоже исходит всякое даяние благо и всяк дар совершен: Аллилуиа.

Икос 5

«Блаженни слышащии слово Божие и хранящии его», ибо ни в сем веце, ни в будущем не отнимется от них сия благая часть, и соблюдше ю в добром и чистом сердце своем, всегда приносят они в терпении обильный плод свой, радуяся. Ибо и братом, и сестрой, и даже материею Своею удостоил наименовать их Господь, аще исполнят они волю Отца Его, Иже на небесех. Воистину, сице еще и духом и всею жизнию соделалася Ты, о Пресвятая Дево, Материю Господа Твоего, Егоже Пречистая Плоть исткася от Твоих честных кровей: ибо паче всех соблюла еси Божественное слово Его и к небесем со славою восшла еси, сотворши волю Отца Небеснаго. Мы же вси, умом и сердцем сведуще сия солнцем блистающия доброты Твоя, и радостию прославляюще во Успении Твоем к небеси возвышение рода человеческаго, благоговейными усты согласно поем божественныя величия Твоея: о Благодатная, яко Мати Владыки, восцарившаяся на небеси, — Венче, Превысший всякого создания, и нас, скорбных и убогих, не оставляющая на земли: о Благодатная, на камени исполнения заповедей нас утверди, — Возлюбленная Богом и лики ангельскими, и наша замкнувшиеся и в могилу себялюбия погребльшияся сердца отверзи к любви, о Благодатная, из душной темницы гордыни, уныния и плотских похотей вся ны изведи, — Царице Небесная, к Божию роду и нас, страстъми оземляневших, сопричти и подними. О, Благодатная, помилуй нас и спаси, и пачесолнечною теплотою любве Твоея грехми умерщвленный наш дух оживи.

Кондак 6

«Иже несть со Мною, на Мя есть, и иже не со Мною собирает, — расточает», рече Своим верным Ипостасная Премудрость, Христос Господь, презирая в глубине веков всепроницающим Оком Своим и сего дне, объюродевших без Христа мудрецов, на песце зиждемая строения. Ихже шатания видяще и в познании правды христианского благочестия паче утверждающеся, проникновенным сердцем и усты воспеваем мы Единому краеугольному Каменю небесных и земных созиданий, Владыце Христу: Аллилуиа.

Икос 6

Путь и жизнь и истину прият род человеческий во Христе, и победа, ею же Он победи мир, соделася достоянием всех верных Его — добрых делателей зде виноградника Божия. Ибо не точию залог блаженства века грядущаго Владыка дарует им, но в доброй совести каждаго во благо устрояется всяческое и земное делание их, и в правде созидается взаимное служение братий, любовию и миром побеждающее вражду и разделения в людех, наипаче же от рабства и тьмы заблуждений свободит сей верный раб земное житие свое. Обаче — увы нам, в лености и небрежении и слепоте безумно иждивающим, неисчетною ценою дарованное, премирное сокровище светозарныя веры Христовой! Ибо и плен, и узы, и ослепления свои — в свободы место возлюбили самопрельщенне все мы, свет заповедей Царя своего забыв до конца и самохотне предавшеся соблазнам и обманам многим в сии лукавые дни, яко и вся добрая, отцы преданная, правила паче расточате, в небрежении своем без Христа и света веры устрояя свою жизнь. Сего ради Тебе, яко стену веры и жизни христианския, никоими же злыми рушиму, добре ведущии и Единую Надежду себе имущии, из бездны отчаяния умоляем и вопием: о Благодатная, Сама сущи во истине, ко истине и нас приведи, — Милостивая изнемогшим Помощнице, победителями греха молящихся Тебе сотвори, о Благодатная, еже видети и ненавидети злой плен свой наш ум озари, — мудрости горней сокровище, красная жизни вечная очесам сердца яви, о Благодатная, соблазнов прельщение от нас отжени, — правды Христовой Свет немерцающий, развевати, яко пыль плевельную. Лукавые ухищрения вся ны умудри. О, Благодатная, помилуй нас и спаси, и пачесолнечною теплотою любви Твоея грехми умерщвленный наш дух оживи.

Кондак 7

Дево Пренепорочная, Жизнь миру родившая, приобщитися и нас, недостойных, сея истинныя Жизни в Сыне Твоем призови и лику избранных Его сопричти, и якоже Сама от дольных земли к горним восшедшая, и наши одебелевшие взоры горе устреми и духовныя зрети научи, во глубинах души нашея всецелую преданность Богу, яко Отцу любви, возбуди, да приискренне славословим Его, вкупе, во имя Его, сошедшеся: Аллилуиа.

Икос 7

Коль светла и благотишна, коль сладка и радостна жизнь богоизбранных во Христе, коль дивные знамения силы и любви являет в покое их сердца Сладчайший Спаситель наш, Господь Иисус! Тако и во всех тяготах и обременении и скорби душевной к Себе зовет нас Его бесконечная Любовь, — да возьмем Его иго на себя и да образ кротости и смирения Спаса своего в сердце своем воспримем мы. И благо Его иго, и бремя Его поистине легко, всякую тугу сердечную облегчая во утешение нам и отрадой мира неотъемлемого преобразуя сию скорбную жизнь. Обаче всех сих благих и развращенных и стропотных греха лишившихся, тлю же похотей и зависти, и злобы, и уныния, и иная вся плевельная в сердце сгяжавшии, прегорце во всех сих осуждаем себе и стяняше, в покаянии нелицемерном к Тебе единей очи свои возводим и сыновне зовем: о Благодатная, прости нас, прости, — дверь милосердия нам отверзше, люди своя воззови, о Благодатная, благое иго Христово желати нас научи, Небесный образе смирения, сие с кротостию и в наше сердце вложи, о Благодатная, мир в наши души, мир и с ближними нам ниспосли, — мира и любви Владычице, все житие страждущего народа Твоего умири и в покаяние возраждающее приведи. О, Благодатная, помилуй нас и спаси, и паче солнечною теплотою любве Твоея грехми умерщвленный наш дух озари.

Кондак 8

Бисер многоценный и почесть наивысшаго в мире сем знания даровася нам Отцем светов и Источником щедрот, яко сынам Святыя Его, Единыя Православныя Церкве, яже есть столп и утверждение истины. Мы же, аще по достоянию ценити сего не навыкше и деяньми сквернаго грехолюбия всечастно сим изменяюще, — обаче о таковом царском звании своем умиленным благодарением Призвавшему нас — Владыце неба и земли — поем: Аллилуиа.

Икос 8

«О роде неверный и развращенный. Доколе Я с вами, доколе терплю вас», — возгласил и в долготерпении Своем Господь, — о тех, иже в безверии и притворстве, еще же в лености и пустоте сердца и в сквернах греховных, приступали к нему, и тьма суще, к Свету Чистейшему приобщали себя. Но се и мы, аще и христиане именуемии, такожде мучим и распинаем Спасшего нас, ибо злобою многою и ожесточением, и изменами неверия, и язвами всесожигающих страстей по вся дни уязвляем Его, и не могуще от хладности и небрежения, и от лени своея, в покаяние и исправление приити, паче и паче движем на себя праведный гнев Судии. Ты же, Единое Упование наше, благодатию вся могущи, — можеши и сия неисцельные недуги уврачевати нам и праведне на ны движимый гнев Божий Твоим предстательством и молитвами утолити и отвести. Сего ради всем усердием, всею любовию своею и из глубины сердца воздыханьми к Тебе припадаем и вопием: о Благодатная, помози нам, о помоги, — Матерь Милосердная, из мерзкой тины грехов изыми, о Благодатная, елеем любве Твоей одеревеневшее сердце наше смягчи, — всех нас возлюбившая, лучами доброт Твоих оледенение лености нашей и самохотных вожделений в нашей душе растопи, о Благодатная, в веру, в жизнь духа призови нас и введи — Дево Пречистая, сердцем коснутися святости и любви Христовой нас подыми. О, Благодатная, помилуй нас и прости, и пачесолнечною теплотою любве Твоея грехми умерщвленный наш дух оживи.

Кондак 9

Сотвори Тебе величие Сильный, яко возлюбленной Матери Божественного Сына Своего, яко Святейшей из святых, Честнейшей Херувим и Славнейшей без сравнения Серафим. Обаче и Тебе путем крестным идти к славе указала Отчая Любовь, егда устами Симеона предтече, яко оружие пройдет сквозь матернски скорбящее сердце Твое. Мы же, яко во спасение наше все сие будет, ведущи, и безмерности Божественной благости к нам грешным постигнути не могущии, благодарне песнь хваления возносим Ему: Аллилуиа.

Икос 9

Огненную цепь лютых мучений, и наипаче позорнаго пригвождения ко кресту, претерпе пред очима Твоима Божественный Сын, до конца покорною Отцу волею испив чашу, все грехи мира омывающих, страданий Своих. И то зряще и сердцем с Сыном распинающися, до конца испила и Ты чашу сию, изболевшим сердцем Своим усыновив Себе во Христе всех страждущих и озлобляемых, кои изнемогают под бременем жизненнаго креста своего. Сего ради и мы во всех печалях и тесных обстояниях своих, к Тебе, яко Матери состраждущей всем скорбным и угнетенным, прибегаем и в горестях и напастях дней сих, Тебе с надеждою крепкою зовем: о Благодатная, Ты нас заступи, — Любовию пламенеющая, болезни лютыя многовоздыхающия души моея утоли, о Благодатная, терпением в скорбях наших усоверши, — Благословенная Богородице, силу поборати искушения в нас утверди, о Благодатная, от злых обстояний нас свободи, — Матерь Всеблагая, Твою силу — всепобеждающую и врагов правды разящую — народу маловерному ныне яви. О, Благодатная, помилуй нас и спаси, и пачесолнечною теплотою любве Твоея грехми умерщвленный наш дух оживи.

Кондак 10

Искони видеша народи христианстии Твое, о Крепкая Охрано бедствущих и погубляемых, неусыпное о них попечение, ея же ради вины и прославиша Тя вси и из рода в род свидетельствоваша о дивных чудесах, всюду поборающей о верных и на всякую усердную мольбу поспешающей, всесильной помощи Твоей, и тако благодарственне пели и поют из края в край о Тебе песнь хвалебную Богу: Аллилуиа.

Икос 10

Велие чудо сотвори Господь Твоего ради, о Матерь Божия, всемощнаго об отцех наших ходатайства. Егда бо великий ненавистник рода христианского и лютый мучитель Темираксак хвалишеся всю Российскую землю положити в запустение и искоренити христианскую веру, к Тебе возопиша людие Твои о спасении и в покаянии и слезах многих притекоша к святей Владимирстей иконе Твоей. И бежа тогда нечестивый, ибо в сонме святых узре той Тебе, яко Царицу, во славе неизреченной, молниезрачными лучами паче солнца осияваемую и ему отъити от предел нашея страны грозно претящу, о верных же Своих, руками простертыма, к Сыну Своему молящуюся. Мы же, верою несомненною великое море чудес Твоих вспоминающе, и все чаяние свое на Тя возложше, от моря злых устремлений, и в нас самих и окрест нас ополчившихся, и ныне оградити народ наш умоляем и в рыданиях многих поем: о Благодатная, на ны належащую грозу отжени, — Мати Благая, покрывши любовию, разслабление наше удали и прости, о Благодатная, силу и лепоту Православия миру яви, — веры Хранительнице, и нас убогих достойными ея сотвори, о Благодатная, солнца превысшую славу Твою нашему сердцу открый, — Ты, Матерь Света, тьму належащую с наших очес разжени. О, Благодатная, помилуй нас и спаси, и пачесолнечною теплотою любве Твоея грехми умерщвленный наш дух оживи.

Кондак 11

Многажды и отцы наши ослабеваху в добром христианском житии своем, и темнотою и невежеством, пороки и неправдами, такожде и братоненавидением и обидами слабому, в тину студодеяния себе погружаху. Обаче, и падающе глубоце, не к инем кумирам, но к Единому Богу — Спасителю своему прибегаху, и горняя возлюбив, покаянием же слезным к Тебе, Заступнице Усердной, очи свои возводяще, не преставаху пред святыми Твоими иконами пети: Аллилуиа.

Икос 11

Разоряшеся некогда страна Русская лихолетием, егда смуты и безначалие, татьбы и обманы, убийства и кровопролития, и злоба многая обуяша люди православные, и измалодушествовалися вси, себе погубляюще, еще и тяжкому врагов иноверных и жестоких нашествию предаде я Господь. И кто же бы спас тогда изнемогших и яко листвия разсыпавшихся, и уже в бездну отчаяния пришедших отцев наших, аще не Ты, о Всеблагая, умилосердилась о них, Еяже предстательством, яко же поведа святый угодник Божий и молитвенник за ны, Сергий, суд об отечестве нашем на милость преложил Владыка Христос. Та вся вспоминающе и большая сих зол во дни наша видяще, и яко в волнах морских погибающии, и мы Тебе громце зовем: о Благодатная, злобе врагов лютых одолеть нас немощных не попусти, — мира Владычице, вспять козни губительныя их обрати, о Благодатная, Судию Праведнаго о нас умоли, — Кротости Величие, тишину мира и любви в народе Твоем утверди. О, Благодатная, помилуй нас и спаси, и пачесолнечною теплотою любве Твоея грехми умерщвленный наш дух оживи.

Кондак 12

Излияся благодать, во апостоле языков сущая, на вся верующая, яко и на недужныя наносиша от пота тела его главотяжи и убрусцы, и тии исцеляхуся от недуг своих, такожде гонимии силою Божиею, бежаху и духи нечистии из них. Изливаеши и Ты, Преизбыточествующая благодатию, сию от полноты Твоея во святые иконы Твоя, яже избираеши в знамения от Твоея любве помощи верным, надеющимся на Тя, да поем, радостию торжествующе о сих явлениях силы Твоей, вси Прославльшему яко Царицу, Тебе: Аллилуиа.

Икос 12

Многое множество милости Своея явила еси, Богородице, православным людем Твоим, наипаче же во святых написаниях Пречистаго Лика Твоего. Ибо и сия дивная знамения во множестве явишася в наши дни, ихже не знаша отцы наши и ни единый народ на земли, яко единою точию благодатною силою Твоею, яве же и совершение начим иным, обновишася и светло сияют святые иконы Твои. И то зряще и по достоянию воспети сия величия недоумевающе, благоговейно преклоняются и умиляются сердцем вси верные люди Твои. Сего ради и мы ныне, у Тебе единыя утешения ищуще, и благодарным сердцем дивныя дела любве Твоея свидетельствующе, аще и хладно есть в вере житие наше и пусто от разленения греховнаго сердце наше, прилежно у Тебе просити благаго пришествия Твоего подвизаемся, и в вышняя Твоя сердце подъемлюще, едиными усты и единым сердцем Тебе вопием: о Благодатная, к доброму житию по вере Христовой наш дух пробуди, — жизнь нам Родившая, от закоснения нас сохрани, о Благодатная, в надежде незыблемой Ты нас утверди, — Дево Владычице, Твоими верными вся ны соблюди, о Благодатная, сия страны дольняя Покровом Твоим осени, — о всех болезнущи, во благо устроити нашу горькую жизнь научи. О, Благодатная, помилуй нас и спаси, и пачесолнечною теплотою любве Твоея грехми умерщвленный, наш дух оживи.

Кондак 13

О, Преблагословенная Мати, пред Еяже любовию точию льна курение и самое сильное желание наше. Умилосердися на ны, Твоя многогрешныя рабы, прости и помилуй вся ны Твоею любовию молим Тя, помози, даруй избавление от отяготевших толико лет лютых зол и бед верному народу Твоему, сынами неверия порабощенному и растлеваемому. Твое избавление пошли — врачующее и наши недуги душевные, да на благое и верное житие по благому закону Сына Твоего приидем мы и да сердцем исцельшиися, и о свете веры нашея святые радующеся, сыновне из рода в род благодарною любовию и умилением воспеваем Всеблагому Отцу своему: Аллилуиа.

(Этот кондак читается трижды, затем икос 1 и кондак 1)

Предназначен для келейного чтения

Кондакъ 1

Избранной Небеснымъ Царемъ, превысшей и умныхъ чиновъ, всеблагой Царицѣ, рода христіанскаго Заступницѣ и отъ всѣхъ золъ и напастей скорому вспоможенію, вси мы, грѣшніи и въ безмѣрныхъ бѣдахъ сущіи раби Ея, со слезами и умиленіемъ сердца, принесемъ покаянная пѣнія: Ты же, яко премилосердная Мати наша сама духоносному моленію настави насъ и пріяти сія воздыханія души нашея удостой:

О, Благодатная, помилуй насъ и спаси, и пачесолнечною теплотою любве Твоея грѣхми умерщвленный нашъ духъ оживи.

Икосъ 1

Тма невѣрія и въ снѣ глубоцѣ запустѣніе жизни богоподобныя объяша до конца предавшійся тлѣнію родъ человѣческій, и въ неисходныхъ плѣницахъ паденій грѣховныхъ оковалъ все ны свѣтоненавистникъ и древній убійца-діаволъ, князь міра сего. Но и врагами содѣлавшихся, не престала любити людей Своихъ благость Творца, насъ спасающаго, и Тобою, о Пренепорочная Дщерь Давидова, обѣтовалъ Онъ изначала даровати погибшимъ Сѣмя жены – Христа Еммануила. Се и мы нынѣ, аще и ослѣпихомъ очеса наша маловѣріемъ и ужасаемся глубины неотмытныхъ беззаконій своихъ, но отъ Тебе, о Мати Свѣта, чаемъ спасенія, и не ищуще самооправданія во грѣсѣхъ неисчетныхъ, Тебе надеждою непозыблемою къ себѣ зовемъ:

О, Благодатная, на помощь къ намъ поспѣши, – Царице Небесная, изъ бездны паденій насъ исхити. О, Благодатная, лучами свѣта горняго всеобдержащій мракъ житія нашего озари, – Дѣво Пречистая, сіяніемъ чистоты Твоея грѣхми потемнѣвшія наша сердца освѣти. О, Благодатная, бѣжати льщеній лжи и грѣха Ты насъ научи – Матерь Святѣйшая, любовь и вѣрность правдѣ въ души наша вложи.

О, Благодатная, помилуй насъ и спаси, и пачесолнечною теплотою любве Твоея грѣхми умерщвленный нашъ духъ оживи.

Кондакъ 2

Оставивше дворъ Отчій и, яко блудный сынъ, на страну далече отышедше, во мракъ язычества, тину страстей и сѣнь смертную впадоша вси сыны Сиѳовы, и ни царь и ни пророкъ, ни ангелъ и ни мудрецъ, но точію Божественный Сынъ Твой, о Благодатная Маріе, возможе ихъ къ свѣту боговѣдѣнія привести и вся силы, яже къ животу и благочестію, даровати, да умиленнѣ, спасеніе обрѣтше, Творцу и Избавителю своему поемъ: Аллилуія.

Икосъ 2

Шаташася всуе языцы и людіе заблудшіи поучахуся тщетнымъ, понеже забвено бысть чистое преданіе сыновъ Божіихъ, и сѣть многобожія привлече осуетившіеся народы въ кумірослуженіе лжи и истаяваніе вредоносныхъ похотей и скверны угожденія грѣхолюбивой плоти. Егда же предста Тебѣ, вѣщати дивная, воинствъ ангельскихъ вождь – Гавріилъ, разгнася Свѣтомъ Востока идольской лести нощная тма, и начатокъ явися во Христѣ Іисусѣ всякія плоти конечнаго исцѣленія. Тѣмже и мы умиленнымъ сердцемъ, главизну спасенія нашего видяще, со архангеломъ въ благоговѣніи Тебѣ взываемъ:

О, Благодатная, всегда съ Тобою Богъ и Господь, – Дѣво Богородице, спасеніе Той и намъ въ Тебѣ содѣла. О, Благодатная, коль благословенъ во истину пречистаго чрева Твоего Божественный Плодъ, – святая святыхъ Святѣйшая, въ Тебѣ вмѣстися Невмѣстимый и небомъ, не точію бренною землей. О, Благодатная, колицее величіе сотвори Тебѣ Царь и Господь, – Матерь Безневѣстная, любве безконечной и намъ осіяй животворящій свѣтъ.

О, Благодатная, помилуй насъ и спаси, и пачесолнечною теплотою любве Твоея грѣхми умерщвленный нашъ духъ оживи.

Кондакъ 3

Новую тварь созидати и людей Своихъ во еже не земная, но горняя мудрствовати привести, сниде съ небесе во юдоль земную Человѣколюбецъ Господь, отъ Негоже и поднесь устрояется царствіе Божіе на земли и претворяетъ собою, якоже квасъ добрый, да вскисаетъ все многоразличное смѣшеніе человѣческое. Мы же, единое стадо Христово возлюбивше и крѣпцѣ во дворѣ Его присно сердцемъ утверждающеся, единодушно, и въ паденіяхъ нашихъ вся побѣждающему Владыцѣ жизни нашея поемъ: Аллилуія.

Икосъ 3

Горній Іерусалимъ всегда осіяя и всеоживляющею Благодатію Святаго Духа утѣшая прославленныхъ Своихъ, яви Господь и въ мірѣ земномъ жизнь и силу царствія Своего, и уже не юдолію плача и слезъ, но мира всеутоляюшаго и радости нескончаемыя, ея же никтоже можетъ отъяти, предстоитъ всѣмъ вѣрнымъ небошественный путь странствія нашего во временномъ семъ бытіи. На него же взирающе, и мы недостойніи и лѣнивіи, къ сему блаженству призванніи, но измѣною безвѣрія и пустотою міролюбленія себе изъ него извергшіи, отъ Тебе, о Богомати, помощи и спасенія себѣ чаемъ и слезами раскаянія и сердечнаго обращенія отъ гибели сея вопіемъ:

О, Благодатная, Ты насъ исцѣли, – Мати милосердная, прощеніе Божіе намъ испроси. О, Благодатная, къ жизни въ Сынѣ Твоемъ возврати, – небесный Покрове нашъ, токомъ благодати, сущей въ Тебѣ, изсохшее сердце въ насъ ороси. О, Благодатная, не любити міра и злыхъ, яже въ мірѣ, насъ научи, – Дѣво Пречистая, влеченія сердца нашего къ чистой любви Христовой устреми.

О, Благодатная, помилуй насъ и спаси, и пачесолнечною теплотою любве Твоея грѣхми умерщвленный нашъ духъ оживи.

Кондакъ 4

Небошественнаго пути златыя правила имуще и мало избранныхъ, въ сихъ подвизающихся, повсюду присно видяще, въ Тебѣ, на высшую степень богоподобія восшедшей, образъ небесной мудрости и въ Бозѣ вѣчнаго созиданія обрѣтаемъ и Тобою преизлиха утѣшаемся, ибо наипаче предъ всѣми слагала еси въ чистѣйшемъ сердцѣ Твоемъ вся словеса дѣяній и ученій Воплотившейся Премудрости – Сына Твоего: отнюдуже пріискреннѣ о всѣхъ сихъ умиляющеся и дивная духа въ Тебѣ созерцающе, Богу, толико прославльшемуся во святыхъ Своихъ, похвальнѣ вси воспѣваемъ: Аллилуія.

Икосъ 4

Внутрь насъ, якоже рѣче Господь, – въ сердцѣ человѣка, его просвѣтленіи, новой жизни и горѣ устремленіяхъ, есть Царствіе Божіе, еже именуется правда и миръ и радость о Дусѣ Святѣ, и красотою благоустроенія души во избранныхъ Божіихъ огнезрачнѣ сіяетъ намъ. И сіе совѣстію вѣдуще и духомъ ищуще, дѣлы же студными и окаянствомъ беззаконій своихъ вспять – во страну самоистуканныхъ страстей – отторгающеся, Тебе, во избранныхъ избранную, восполнити и утолити наше обнищаніе просимъ и скорбными воздыханіями сердца сыновнѣ умоляемъ сице:

О, Благодатная, приблизитися къ Тебѣ помози, – силъ Повелительнице, о Бозѣ возмогати насъ укрѣпи. О, Благодатная, сею благодатію, въ Тебѣ преизбыточествующею, оскудѣвающая сердца наша напой, – во блазѣ Помощнице цвѣты добродѣланія въ пустынныя наши души всади. О, Благодатная, достигати Царствія Сына Твоего подвигни насъ и усоверши, – непорочности Вѣнче, духовныя блага цѣнити и искати насъ научи.

О, Благодатная, помилуй насъ и спаси, и пачесолнечною теплотою любве Твоея грѣхми умерщвленный нашъ духъ оживи.

Кондакъ 5

Яко пшеница добрая на нивѣ, вырастаетъ и класы плодитъ и зрѣетъ незримо въ сердцѣ человѣка Царствіе Божіе, и сторицею выращаетъ Отецъ щедротъ сѣмя словесъ Его, аще почвою доброю, углубленною и потомъ усердія воздѣланною пріемлетъ сіе сердце наше. И сія вся добрѣ вѣдуще и радостнѣ созерцающе во святыхъ Божіихъ, вси мы благодарнѣ прославляемъ Единаго Виновника всяческаго добродѣланія – Тебе, Отца свѣтовъ, отъ Негоже исходитъ всякое даяніе благо и всякъ даръ совершенъ: Аллилуія.

Икосъ 5

Блаженни слышащіи слово Божіе и хранящіи его”, – ибо ни въ семъ вѣцѣ, ни въ будушемъ не отыимется отъ нихъ сія благая часть, и соблюдше ю въ добромъ и чистомъ сердцѣ своемъ, всегда приносятъ они въ терпѣніи обильный плодъ свой, радуяся. Ибо и братомъ, и сестрой, и даже матеріею Свою удостоилъ наименовать ихъ Господь, аще исполнятъ они волю Отца Его, Иже на небесѣхъ. Воистину, сице еще и духомъ и всею жизнію содѣлалася Ты, о Пресвятая Дѣво, Матерію Господа Твоего, Егоже Пречистая плоть исткася отъ Твоихъ честныхъ кровей: ибо паче всѣхъ соблюла еси Божественное слово Его и къ небесемъ со славою восшла еси, сотворши волю Отца Небеснаго. Мы же вси, умомъ и сердцемъ свѣдуще сія солицемъ блистающія доброты Твоя, и радостію прославляюще во Успеніи Твоемъ къ небеси возвышеніе рода человѣческаго, благоговѣйными усты согласно поемъ божественныя величія Твоя:

О, Благодатная, яко Мати Владыки, воцарившаяся на небеси, – Вѣнче, превысшій всякаго созданія, и насъ, скорбныхъ и убогихъ, не оставляющая на земли. О, Благодатная, на камени исполненія заповѣдей насъ утверди, – Возлюбленная Богомъ и лики ангельскими, и наша замкнувшіяся и въ могилу себялюбія погребльшіяся сердца отверзи къ любви. О, Благодатная, изъ душной темницы гордыни, унынія и плотскихъ похотей вся ны изведи, – Царице Небесная, къ Божію роду и насъ, страстьми оземлянѣвшихъ, сопричти и подними.

О, Благодатная, помилуй насъ и спаси, и пачесолнечною теплотою любве Твоея грѣхми умерщвленный нашъ духъ оживи.

Кондакъ 6

Иже нѣсть со Мною, на Мя есть, и иже не со Мною собираетъ, – расточаетъ”, – рече Своимъ вѣрнымъ Ѵпостасная Премудрость, Христосъ Господь, прозирая въ глубинѣ вѣковъ всепроницающимъ Окомъ Своимъ и сего дне, объюродѣвшихъ безъ Христа мудрецовъ, на песцѣ зиждемая строенія. Ихже шатанія видяще и въ познаніи правды христіанскаго благочестія паче утверждающеся, проникновеннымъ сердцемъ и усты воспѣваемъ мы Единому краеугольному Каменю небесныхъ и земныхъ созиданій, Владыцѣ Христу: Аллилуія.

Икосъ 6

Путь и истину и жизнь пріятъ родъ человѣческій во Христѣ, и побѣда, еюже Онъ побѣди міръ, содѣлася достояніемъ всѣхъ вѣрныхъ Его добрыхъ дѣлателей здѣ виноградника Божія. Ибо не точію залогъ блаженства вѣка грядущаго Владыка даруетъ имъ, но въ доброй совѣсти каждаго во благо устрояется всяческое и земное дѣланіе ихъ, и въ правдѣ созидается взаимное служеніе братій, любовію и миромъ побѣждающее вражду и раздѣленія въ людѣхъ; наипаче же отъ рабства и тмы заблужденій свободитъ сей вѣрный рабъ земное житіе свое. Обаче – увы намъ, въ лѣности и небреженіи и слѣпотѣ безумно иждивающимъ, неисчетною цѣною дарованное, премірное сокровище свѣтозарныя вѣры Христовой! Ибо и плѣнъ и узы, и ослѣпленіе свои въ – свободы – мѣсто возлюбили самопрельщеннѣ всѣ мы, свѣтъ заповѣдей Царя своего забывъ до конца и самохотнѣ предавшеся соблазнамъ и обманамъ многимъ въ сіи лукавые дни, яко и вся добрая, отцы преданная, правила паче и паче расточати, въ небреженіи своемъ безъ Христа и свѣта вѣры устрояя свою жизнь. Сего ради Тебе, яко стѣну вѣры и жизни христіанскія, никіими же злыми рушиму, добрѣ вѣдующіи и единую Надежду себѣ имущіи, изъ бездны отчаянія умоляемъ и вопіемъ:

О, Благодатная, Сама сущи во истинѣ, ко истинѣ и насъ приведи, – Милостивая изнемогшимъ Помощнице, побѣдителями грѣха молящихся Тебѣ сотвори. О, Благодатная, еже видѣти и ненавидѣти злой плѣнъ свой нашъ умъ озари, – мудрости горней сокровище, красная жизни вѣчныя очесамъ сердца яви. О, Благодатная, соблазновъ прельщеніе отъ насъ отжени, – правды Христовой Свѣтъ немерцающій, развѣвати, яко пыль плевельную, лукавыя ухищренія вся ны умудри.

О, Благодатная, помилуй насъ и спаси, и пачесолнечною теплотою любве Твоея грѣхми умерщвленный нашъ духъ оживи.

Кондакъ 7

Дѣво Пренепорочная, Жизнь міру родившая, пріобщитися и насъ, недостойныхъ, сея истинныя Жизни въ Сынѣ Твоемъ призови и лику избранныхъ Его сопричти. И, якоже Сама отъ дольныхъ земли къ горнимъ восшедшая, и наши одебелѣвшіе взоры горѣ устреми и духовная зрѣти научи; во глубинахъ души нашея всецѣлую преданность Богу, яко Отцу любви, возбуди, да пріискреннѣ славословимъ Его, вкупѣ, во имя Его, сошедшеся: Аллилуія.

Икось 7

Коль свѣтла и благоотишна, коль сладка и радостна жизнь богоизбранныхъ во Христѣ, коль дивныя знаменія силы и любви являетъ въ покоѣ ихъ сердца Сладчайшій Спаситель нашъ, Господь Іисусъ! Тако и во всѣхъ тяготахъ и обремененіи и скорби душевной къ Себѣ зоветъ насъ Его безконечная Любовь, – да возьмемъ иго Его на себя и да образъ кротости и смиренія Спаса своего въ сердце свое воспріимемъ мы. И благо Его иго, и бремя Его по истинѣ легко, всякую тугу сердечную облегчая во утѣшеніе намъ и отрадой мира неотъемлемаго преобразуя сію скорбную жизнь. Обаче всѣхъ сихъ благихъ въ развращенныхъ и стропотныхъ грѣха лишившіися, тлю же похотей и зависти, и злобы, и унынія, и иная вся плевельная въ сердцѣ стяжавшіи, прегорцѣ во всѣхъ сихъ осуждаемъ себе и стеняше, въ покаяніи нелицемѣрнемъ къ Тебѣ единѣй очи свои возводимъ и сыновнѣ зовемъ:

О, Благодатная, прости насъ, прости, – дверь милосердія намъ отверзше, люди Своя воззови. О, Благодатная, благое иго Христово желати насъ научи, – небесный Образе смиренія, сіе съ кротостію и въ наше сердце вложи. О, Благодатная, миръ въ наши души, миръ и съ ближними намъ ниспосли, – мира и любви Владычице, все житіе страждущаго народа Твоего умири и въ покаяніе возраждающее приведи.

О, Благодатная, помилуй насъ и спаси, и пачесолнечною теплотою любве Твоея грѣхми умерщвленный нашъ духъ оживи.

Кондакъ 8

Бисеръ многоцѣнный и почесть наивысшаго въ мірѣ семъ знанія даровася намъ Отцемъ свѣтовъ и Источникомъ щедротъ, яко сынамъ святыя Его, единыя Православныя Церкве, яже есть столпъ и утвержденіе истины. Мы же, аще по достоянію цѣнити сего не навыкше и дѣяньми сквернаго грѣхолюбія всечасно симъ измѣняюще, – обаче о таковомъ царскомъ званіи своемъ умиленнымъ благодареніемъ Призвавшему насъ – Владыцѣ неба и земли – поемъ: Аллилуія.

Икосъ 8

О, роде невѣрный и развращенный! Доколѣ Азъ съ вами, доколѣ терплю васъ?” – возгласилъ и въ долготерпѣніи Своемъ Господь – о тѣхъ, иже въ безвѣріи и притворствѣ, еще же въ лѣности и пустотѣ сердца и въ сквернахъ грѣховныхъ, приступали къ нему, и тма суще, къ Свѣту Чистѣйшему пріобщали себя. Но се и мы, аще и христіане именуеміи, такожде мучимъ и распинаемъ Спасшаго насъ, ибо злобою многою и ожесточеніемъ, и измѣнами невѣрія, и язвами всесожигающихъ страстей по вся дни уязвляемъ Его, и не могуще отъ хладности и небреженія, и отъ лѣни своея, въ покаяніе и исправленіе пріити, паче и паче движемъ на себя праведный гнѣвъ Судіи. Ты же, единое Упованіе наше, благодатію вся могущи, – можеши и сія неисцѣльные недуги уврачевати намъ и праведнѣ на ны движимый гнѣвъ Божій Твоимъ предстательствомъ и молитвами утолити и отвести. Сего ради всѣмъ усердіемъ, всею любовію своею и изъ глубины сердца воздыханьми къ Тебѣ припадаемъ и вопіемъ:

О, Благодатная, помози намъ, о помози, – Матерь милосердная, изъ мерзкой тины грѣховъ изыми. О, Благодатная, елеемъ любве Твоей одеревенѣвшее сердце наше смягчи, – всѣхъ насъ возлюбившая, лучами добротъ Твоихъ оледянѣніе лѣности нашей и самохотныхъ вожделѣній въ нашей душѣ растопи. О, Благодатная, въ вѣру, въ жизнь духа призови насъ и введи, – Дѣво Пречистая, сердцемъ коснутися святости и любви Христовой насъ подыми.

О, Благодатная, помилуй насъ и спаси, и пачесолнечною теплотою любве Твоея грѣхми умерщвленный нашъ духъ оживи.

Кондакъ 9

Сотвори Тебѣ величіе Сильный, яко возлюбленной Матери Божественнаго Сына Своего, яко Святѣйшей изъ святыхъ, Честнѣйшей херувимъ и Славнѣйшей безъ сравненія серафимъ. Обаче и Тебѣ путемъ крестнымъ идти къ сей славѣ указала Отчая Любовь, егда устами Симеона предрече, како оружіе пройдетъ сквозѣ матернски – скорбящее сердце Твое. Мы же, яко во спасеніе наше все сіе будетъ, вѣдущіи, и безмѣрности Божественной благости къ намъ грѣшнымъ постигнути не могущіи, благодарнѣ пѣснь хваленія возносимъ Ему: Аллилуія.

Икосъ 9

Огненную цѣпь лютыхъ мученій, и наипаче позорнаго пригвожденія ко кресту, претерпѣ предъ очима Твоима Божественный Сынъ, до конца покорною Отцу волею испивъ чашу, всѣ грѣхи міра омывающихъ, страданій Своихъ. И то зряще и сердоемъ съ Сыномъ распинающися, до конца испила и Ты чашу сію, изболѣвшимъ сердцемъ Своимъ усыновивъ Себѣ во Христѣ всѣхъ страждущихъ и озлобляемыхъ, кои изнемогаютъ подъ бременемъ жизненнаго креста своего. Сего ради и мы во всѣхъ печалѣхъ и тѣсныхъ обстояніихъ своихъ, къ Тебѣ, яко Матери состаждушей всѣмъ скорбнымъ и угнетеннымъ, прибѣгаемъ и въ горестяхъ и напастяхъ дней сихъ Тебѣ съ надеждою крѣпкою зовемъ:

О, Благодатная, Ты насъ заступи, – Любовію пламенѣющая, болѣзни лютыя многовоздыхающія души моея утоли. О, Благодатная, терпѣніемъ въ скорбѣхъ нашихъ усоверши, – Благословенная Богородице, силу поборати искушенія въ насъ утверди. О, Благодатная, отъ злыхъ обстояній насъ свободи, – Матерь Всеблагая, Твою силу – всепобѣждающую и враговъ правды разящую – народу маловѣрному нынѣ яви.

О, Благодатная, помилуй насъ и спаси, и пачесолнечною теплотою любве Твоея грѣхми умерщвленный нашъ духъ оживи.

Кондакъ 10

Искони видѣша народи христіанстіи Твое, о крѣпкая Охрано бѣдствующихъ и погубляемыхъ, неусыпное о нихъ попеченіе, ея же ради вины и прославиша Тя вси и изъ рода въ родъ свидѣтельствоваша о дивныхъ чудесѣхъ, всюду поборающей о вѣрныхъ и на всякую усердную мольбу поспѣшающей, всесильной помощи Твоей, и тако благодарственнѣ пѣли и поютъ изъ края въ край о Тебѣ пѣснь хвалебную Богу: Аллилуія.

Икосъ 10

Веліе чудо сотвори Господь Твоего ради, о Матерь Божія, всемощнаго объ отцѣхъ нашихъ ходатайства. Егда бо великій ненавистникъ рода христіанскаго и лютый мучитель Темираксакъ хваляшеся всю Россійскую землю положити въ запустѣніе и искоренити христіанскую вѣру, къ Тебѣ возопиша людіе Твои о спасеніи и въ покаяніи и слезахъ многихъ притекоша къ святѣй Владимірстѣй иконѣ Твоей. И бѣжа тогда нечестивый, ибо въ сонмѣ святыхъ узрѣ той Тебе, яко Царицу, во славѣ неизреченной, молніезрачными лучами паче солнца осіяваемую и ему отъити отъ предѣлъ нашея страны грозно претящу, о вѣрныхъ же Своихъ, рукама простертыма, къ Сыну Своему молящуюся. Мы же, вѣрою несомнѣнною великое море чудесъ Твоихъ вспоминающе, и все чаяніе свое на Тя возложше, отъ моря злыхъ устремленій, и въ насъ самѣхъ и окрестъ насъ ополчившихся, и нынѣ оградити народъ нашъ умоляем и въ рыданіяхъ многихъ поемъ:

О, Благодатная, на ны належащую грозу отжени, – Мати Благая, покрывши любовію, разслабленіе наше удали и прости. О, Благодатная, силу и лѣпоту Православія міру яви, – вѣры Хранительнице, и насъ убогихъ достойными ея сотвори. О, Благодатная, солнца превысшую славу Твою нашему сердцу открый, – Ты, Матерь Свѣта, тму належащую съ нашихъ очесъ разжени.

О, Благодатная, помилуй насъ и спаси, и пачесолнечною теплотою любве Твоея грѣхми умерщвленный нашъ духъ оживи.

Кондакъ 11

Многажды и отцы наши ослабѣваху въ добромъ христіанстѣмъ житіи своемъ, и темнотою и невѣжествомъ, пороки и неправдами, такожде и братоненавидѣніемъ и обидами слабому, въ тину студодѣянія себе погружаху. Обаче, и падающе глубоцѣ, не къ инѣмъ кумірамъ, но къ Единому Богу – Спасителю своему прибѣгаху, и горняя возлюбивъ, покаяніемъ же слезнымъ къ Тебѣ, Заступницѣ Усердной, очи свои возводяще, не преставаху предъ святыми Твоими иконами пѣти: Аллилуія.

Икосъ 11

Разоряшеся нѣкогда страна Русская лихолѣтіемъ, егда смуты и безначаліе, татьбы и обманы, убійства и кровопролитія, и злоба многая обуяша люди православные, и измалодушествовалися вси, себе погубляюще; еще же и тяжкому враговъ иновѣрныхъ и жестокихъ нашествію предаде я Господь. И кто же бы спасъ тогда изнемогшихъ и яко листвія разсыпавшихся, и уже въ бездну отчаянія пришедшихъ отцевъ нашихъ, аще не Ты, о Всеблагая, умилосердилась о нихъ, Еяже предстательствомъ, якоже повѣда святый угодникъ Божій и молитвенникъ за ны, Сергій, судъ объ отечествѣ нашемъ на милость преложилъ Владыка Христосъ. Та вся вспоминающе и большія сихъ золъ во дни наша видяще, и яко въ волнахъ морскихъ погибающіи, и мы Тебѣ громцѣ зовемъ:

О, Благодатная, злобѣ враговъ лютыхъ одолѣть насъ немощныхъ не попусти, – міра Владычице, вспять козни губительныя ихъ обрати. О, Благодатная, Судію Праведнаго о насъ умоли, – кротости величіе, тишину мира и любви въ народѣ Твоемъ утверди.

О, Благодатная, помилуй насъ и спаси, и пачесолнечною теплотою любве Твоея грѣхми умерщвленный нашъ духъ оживи.

Кондакъ 12

Изліяся благодать, во апостолѣ языковъ сущая, на вся вѣрующія, яко и на недужныя наносиша отъ пота тѣла его глазотяжи и убрусцы, и тіи исцѣляхуся отъ недугъ своихъ, такожде гониміи силою Божіею, бѣжаху и духи нечистіи изъ нихъ. Изливаеши и Ты, Преизбыточествующая благодатію, сію отъ полноты Твоея во святыя иконы Твоя, яже избираеши въ знаменія отъ Твоея любве помощи вѣрнымъ, надѣющимся на Тя, да поемъ, радостію торжествующе о сихъ явленіяхъ силы Твоей, вси Прославльшему яко Царицу, Тебѣ: Аллилуія.

Икосъ 12

Многое множество милости Своея явила еси, Богородице, православнымъ людемъ Твоимъ, наипаче же во святыхъ написаніяхъ Пречистаго Лика Твоего. Ибо и сія дивная знаменія во множествѣ явишася въ наши дни, ихже не знаша отцы наши и ни единый народъ на земли, яко единою точію благодатною силою Твоею, явѣ же и совершеннѣ ничѣмъ инымъ, обновишася и свѣтло сіяютъ святыя иконы Твои. И то зряще и по достоянію воспѣти сія величія недоумѣюще, благоговѣйно преклоняются и умиляются сердцемъ вси вѣрные люди Твои. Сего ради и мы нынѣ, у Тебе единыя утѣшенія ищуще, и благодарнымъ сердцемъ дивныя дѣла любве Твоея свидѣтельствующе, аще и хладно есть въ вѣрѣ житіе наше и пусто отъ разлѣненія грѣховнаго сердце наше, прилежно у Тебе просити благаго пришествія Твоего подвизаемся, и въ вышняя Твоя сердце подъемляюще, едиными усты и единымъ сердцемъ Тебѣ вопіемъ:

О, Благодатная, къ доброму житію по вѣрѣ Христовой нашъ духъ пробуди, – жизнь намъ Родившая, отъ закоснѣнія насъ сохрани. О, Благодатная, въ надеждѣ незыблемой Ты насъ утверди, – Дѣво Владычице, Твоими вѣрными вся ны соблюди. О, Благодатная, сія страны дальнія покровомъ Твоимъ осѣни, – о всѣхъ болѣзнующи, во благо устроити нашу горькую жизнь научи.

О, Благодатная, помилуй насъ и спаси, и пачесолнечною теплотою любве Твоея грѣхми умерщвленный нашъ духъ оживи.

Кондакъ 13

О, Преблагословенная Мати, предъ Еяже любовію точію льна куреніе и самое сильное желаніе наше. Умилосердися на ны, Твоя многогрѣшныя рабы, прости и помилуй вся ны Твоею любовію молимъ Тя; помози, даруй избавленіе отъ отяготѣвшихъ толико лѣтъ лютыхъ золъ и бѣдъ вѣрному народу Твоему, сынами невѣрія порабощенному и растлѣваемому. Твое избавленіе пошли – врачующее и наши недуги душевные, да на благое и вѣрное житіе по благому закону Сына Твоего пріидемъ мы и да сердцемъ исцѣльшіися, и о свѣтѣ вѣры нашея святыя радующеся, сыновнѣ изъ рода въ родъ благодарною любовію и умиленіемъ воспѣваемъ Всеблагому Отцу своему: Аллилуія.

Се́й конда́къ глаго́лется три́жды. Та́же Икосъ 1-й и Конда́къ 1-й

Молитва ко Пресвятой Богородицѣ

Богородице Дѣво, надеждо всѣмъ концемъ земли, Заступнице рода христіанскаго! Предъ честною иконою Твоею припадающе и неисчетная Твоя благодѣянія отцемъ нашимъ воспоминающе, вси мы къ Тебѣ прибѣгаемъ и изъ глубины сердца усердно вопіемъ: градъ нашъ и во удаленіи сущія люди Твоя милостію Твоею посѣти и отъ всякаго зла соблюди. Даруй мірови миръ, землѣ плодовъ изобиліе, держа́вѣ Россíйстѣй крѣпость и единеніе, въ мирномъ житіи христіанстѣмъ преспѣяніе и мудрое строеніе, на враги же одолѣніе… О, Премилосердная Царице Небесная, паче материнскія любве насъ, недостойныхъ чадъ Твоихъ, возлюбившая! Ты видиши, яко плача и рыданій достойно есть нынѣшнее житіе наше, и до конца отъ невидимыхъ и видимыхъ враговъ въ путь погибели преходитъ. Ибо вси мы отъ твердыни закона Бога нашего отвергохомся и въ лѣности и маловѣріи изнемогаемъ; яко сынъ блудный, на страну далече отъ пути правды Его заблудихомъ и о спасеніи нашемъ нерадимъ. Нѣсть мира, нѣсть любве въ сердцахъ нашихъ, и тмою грѣховъ многихъ ослѣлили мы духовныя очи свои. О, Пренепорочная и Пречистая Владычице, благая Мати издревле вѣрнаго народа Твоего, нынѣ безмѣрными паденіи низу поверженнаго! Вси мы, грѣшніи и непотребніи раби Твои, въ стенаніи сердца нашего воздыханіяхъ горькихъ и покаяніи нелицемѣрнемъ къ Тебѣ, яко послѣдней помощи и отрадѣ нашей, прибѣгаемъ и неотступно Тебѣ зовемъ: воспомяни вѣру и молитвы отецъ нашихъ, не отвергнись отъ насъ, но воздвигни изъ глубины грѣховныя и отъ тяжкой плѣницы беззаконій свободи; всеисцѣльную силу Твою ниспосли, стѣною покрова Твоего насъ, въ бѣдѣ и отчаяніи сущихъ, огради и во правой вѣрѣ и дѣланіи заповѣдей Христовыхъ утверди; облецы ревностію и святынею пастырей нашихъ, духъ ихъ, во еже прилежати доброму дѣланію въ виноградѣ семъ, возбуди, и общеніе вѣры и братскаго другъ о другѣ попеченія въ стадѣ Христовомъ насади и возрасти; разсѣянныя собери, унывающее сердце наше любовію и умиленіемъ согрѣй, и всѣхъ насъ въ единомысліе и истину приведи; заблудшихъ же и отъ православной вѣры отступльшихъ братій нашихъ вразуми и во единеніе святыя Церкве, яко спасительнаго для насъ ковчега, возврати; скорбящія и во искушеніяхъ сущія умудри и подкрѣпи, озлобленныя умири, юныя направи; сирыя, убогія и вся бѣдствующія ризою Твоею честною защити. О, Всесильная Владычице, Радосте всѣхъ скорбящихъ и страждущихъ, дивная Помощнице лютѣ обуреваемыхъ! Услыши насъ, услыши, молимъ Тя, – вонми стенаніямъ и рыданіямъ многимъ несчастныхъ чадъ Твоихъ, злѣ нынѣ погибающихъ. Посѣти милостію Твоею братій, нашихъ, во гладѣ и болѣзнехъ смертныхъ сущихъ, лютыя нужды ихъ утоли и отъ всякихъ злыхъ обстояній избави. Буди всѣмъ, притекающимъ къ Тебѣ, вѣрная помощь, утѣшеніе и благоотишное пристанище отъ всякихъ бурь и напастей многомятежныя нашея жизни: Ты бо еси больныхъ исцѣленіе, скорбящихъ терпѣніе и отрада, заблудшихъ и соблазняемыхъ вразумленіе и на пути правды утвержденіе. Пріими здѣ приносимая моленія наша и вознеси ихъ къ престолу Всевышняго, яко да Твоимъ предстательствомъ ограждаеми и всемошнымъ покровомъ Твоимъ милостиво осѣняеми и соблюдаеми, въ благодареніи сердца нашего прославимъ, всегда побѣдители насъ творящаго – Бога, и Тебе, о наше по Бозѣ благодатное Упованіе, нынѣ и присно, и во вѣки вѣковъ. Аминь.

Кондак 1

Взбра́нной Воево́де победи́тельная, я́ко из­ба́вль­ше­ся от злых, бла­го­да́р­ствен­ная воспису́ем Ти раби́ Твои́, Бо­го­ро́­ди­це; но я́ко иму́щая держа́ву непобеди́мую, от вся́­ких нас бед сво­бо­ди́, да зо­ве́м Ти: ра́­дуй­ся, Не­ве́с­то Не­не­ве́ст­ная.

Икос 1

А́н­гел пред­ста́­тель с Не­бе­се́ по́с­лан бысть ре­щи́ Бо­го­ро́­ди­це: ра́­дуй­ся, и со безпло́тным гла́сом воплоща́ема Тя зря, Го́с­по­ди, ужаса́шеся и стоя́ше, зо­вы́й к Ней та­ко­ва́я: Ра́­дуй­ся, Е́ю­же ра́­дость возсия́ет; ра́­дуй­ся, Е́ю­же кля́тва изче́знет. Ра́­дуй­ся, па́д­ша­го Ада́ма воззва́ние; ра́­дуй­ся, слез Е́виных из­бав­ле́­ние. Ра́­дуй­ся, высото́ неудобовосходи́мая челове́ческими по́мыслы; ра́­дуй­ся, глубино́ неудобозри́мая и а́нгельскима очи́­ма. Ра́­дуй­ся, я́ко еси́ Царе́во седа́лище; ра́­дуй­ся, я́ко но́сиши Но­ся́­ща­го вся. Ра́­дуй­ся, Звез­до́, яв­ля́ю­щая Со́лн­це; ра́­дуй­ся, утро́бо Бо­же́ст­вен­на­го воплоще́ния. Ра́­дуй­ся, Е́ю­же обновля́ется тварь; ра́­дуй­ся, Е́ю­же покланя́емся Твор­цу́. Ра́­дуй­ся, Не­ве́с­то Не­не­ве́ст­ная.

Кондак 2

Ви́­дя­щи Свя­та́я Се­бе́ в чис­то­те́, глаго́лет Гаврии́лу де́рзостно: пре­сла́в­ное тво­его́ гла́­са неудобоприя́тельно ду­ши́ Мое́й явля́­ет­ся: безсе́меннаго бо зача́тия рождество́ ка́­ко глаго́леши, зо­вы́й: Алли­лу́иа.

Икос 2

Ра́­зум недоразумева́емый ра­зу­ме́­ти Де́ва и́щу­щи, возо­пи́ к служа́щему: из боку́ чи́сту, Сы́­ну ка́­ко есть роди́тися мо́щно, рцы Ми? К Ней­же он ре­че́ со стра́­хом, оба́­че зо­вы́й си́­це: Ра́­дуй­ся, сове́та не­из­ре­че́н­наго Таи́ннице; ра́­дуй­ся, молча́ния прося́щих ве́ро. Ра́­дуй­ся, чу­де́с Хри­сто́­вых на­ча́­ло; ра́­дуй­ся, ве­ле́­ний Его́ глави́зно. Ра́­дуй­ся, ле́ствице не­бе́с­ная, Е́ю­же сни́­де Бог; ра́­дуй­ся, мо́сте, преводя́й су́­щих от зем­ли́ на не́­бо. Ра́­дуй­ся, А́н­ге­лов многослову́щее чу́­до; ра́­дуй­ся, бесо́в многоплаче́вное пораже́ние. Ра́­дуй­ся, Свет неизрече́нно ро­ди́в­шая; ра́­дуй­ся, е́же ка́­ко, ни еди́­на­го же научи́вшая. Ра́­дуй­ся, прему́дрых превосходя́щая ра́­зум; ра́­дуй­ся, ве́р­ных оза­ря́ю­щая смы́слы. Ра́­дуй­ся, Не­ве́с­то Не­не­ве́ст­ная.

Кондак 3

Си́­ла Вы́ш­ня­го осени́ тог­да́ к зача́тию Браконеиску́сную, и благопло́дная Тоя́ ложесна́, я́ко село́ по­ка­за́ сла́дкое, всем хотя́щим жа́ти спа­се́­ние, внег­да́ пе́­ти си́­це: Алли­лу́иа.

Икос 3

Иму́­щи Богоприя́тную Де́ва утро́бу, востече́ ко Елисаве́ти: младе́нец же о́ноя а́бие по­зна́в Сея́ целова́ние, ра́довашеся, и игра́ньми я́ко пе́снь­ми во­пия́­ше к Бо­го­ро́­ди­це: Ра́­дуй­ся, о́трасли не­увя­да́­емыя розго́; ра́­дуй­ся, Плода́ безсме́ртнаго стяжа́ние. Ра́­дуй­ся, Де́лателя де́лающая Человеколю́бца; ра́­дуй­ся, Сади́теля жи́з­ни на́шея ро́жд­шая. Ра́­дуй­ся, ни́во, растя́щая гобзова́ние щед­ро́т; ра́­дуй­ся, трапе́зо, нося́щая оби́­лие очище́ния. Ра́­дуй­ся, я́ко рай пи́щный процвета́еши; ра́­дуй­ся, я́ко при­ста́­ни­ще ду­ша́м гото́виши. Ра́­дуй­ся, прия́тное мо­ли́т­вы ка­ди́­ло; ра́­дуй­ся, всего́ ми́­ра очи­ще́­ние. Ра́­дуй­ся, Бо́­жие к сме́ртным благоволе́ние; ра́­дуй­ся, сме́рт­ных к Бо́­гу дерз­но­ве́­ние. Ра́­дуй­ся, Не­ве́с­то Не­не­ве́ст­ная.

Кондак 4

Бу́­рю внутрь име́я по­мыш­ле́­ний су­мни́­тель­ных, целому́дренный Ио́сиф смяте́ся, к Те­бе́ зря небра́чней, и бракоокра́дованную помышля́я, Непоро́чная; уве́­дев же Твое́ зача́тие от Ду́­ха Свя́та, ре­че́: Алли­лу́иа.

Икос 4

Слы́шаша па́стырие А́н­ге­лов пою́щих плотско́е Хрис­то́­во прише́ствие, и те́кше я́ко к Па́­сты­рю ви́дят Се­го́ я́ко а́гнца непоро́чна, во чре́ве Мари́ине упа́сшася, Ю́же пою́­ще ре́ша: Ра́­дуй­ся, А́гнца и Па́стыря Ма́­ти; ра́­дуй­ся, дво́ре слове́сных ове́ц. Ра́­дуй­ся, не­ви́­ди­мых вра­го́в муче́ние; ра́­дуй­ся, ра́йс­ких две́рей отверзе́ние. Ра́­дуй­ся, я́ко не­бе́с­ная сра́дуются земны́м; ра́­дуй­ся, я́ко зем­на́я сликовству́ют не­бе́с­ным. Ра́­дуй­ся, апо́с­то­лов не­мо́лч­ная ус­та́; ра́­дуй­ся, стра­сто­те́рп­цев не­по­бе­ди́­мая де́рзосте. Ра́­дуй­ся, тве́р­дое ве́­ры утвер­жде́­ние; ра́­дуй­ся, све́т­лое бла­го­да́­ти позна́ние. Ра́­дуй­ся, Е́ю­же обнажи́ся ад; ра́­дуй­ся, Е́ю­же облеко́хомся сла́­вою. Ра́­дуй­ся, Не­ве́с­то Не­не­ве́ст­ная.

Кондак 5

Боготе́чную звезду́ узре́вше волсви́, тоя́ после́доваша зари́, и я́ко свети́льник держа́ще ю, то́ю испыта́ху кре́пкаго Ца­ря́, и дости́гше Непостижи́маго, воз­ра́­до­ва­ша­ся, Ему́ во­пию́­ще: Алли­лу́иа.

Икос 5

Ви́деша о́т­ро­цы халде́йстии на ру­ку́ Деви́чу Со­зда́в­ша­го рука́ми че­ло­ве́­ки, и Вла­ды́­ку разумева́юще Его́, а́ще и ра́бий прия́т зрак, по­тща́­ша­ся дарми́ послужи́ти Ему́, и возопи́ти Благослове́нней: Ра́­дуй­ся, Звезды́ незаходи́мыя Ма́­ти; ра́­дуй­ся, заре́ та́инственнаго дне. Ра́­дуй­ся, пре́­лес­ти пещь угаси́вшая; ра́­дуй­ся, Тро́ицы таи́нники про­све­ща́ю­щая. Ра́­дуй­ся, мучи́теля безчелове́чнаго измета́ющая от нача́льства; ра́­дуй­ся, Го́с­по­да Человеколю́бца показа́вшая Хри­ста́. Ра́­дуй­ся, ва́рварскаго из­бав­ля́ю­щая слу­же́­ния; ра́­дуй­ся, тиме́ния изыма́ющая дел. Ра́­дуй­ся, ог­ня́ по­кло­не­ние угаси́вшая; ра́­дуй­ся, пла́мене страс­те́й изменя́ющая. Ра́­дуй­ся, ве́р­ных нас­та́в­ни­це це­ло­му́д­рия; ра́­дуй­ся, всех ро­до́в ве­се́­лие. Ра́­дуй­ся, Не­ве́с­то Не­не­ве́ст­ная.

Кондак 6

Пропове́дницы богоно́снии, бы́вше волсви́, возврати́шася в Вавило́н, сконча́вше Твое́ проро́чество, и пропове́давше Тя Хри­ста́ всем, оста́виша И́рода я́ко буесло́вна, не ве́дуща пе́­ти: Алли­лу́иа.

Икос 6

Возсия́вый во Еги́пте про­све­ще́­ние и́с­ти­ны, отгна́л еси́ лжи тьму: и́до­ли бо его́, Спа́­се, не тер­пя́­ще Твоея́ кре́­пос­ти, па­до́­ша, сих же изба́вльшиися вопия́ху к Бо­го­ро́­ди­це: Ра́­дуй­ся, ис­прав­ле́­ние че­ло­ве́­ков; ра́­дуй­ся, низпаде́ние бесо́в. Ра́­дуй­ся, пре́­лес­ти держа́ву попра́вшая; ра́­дуй­ся, и́доль­скую лесть обличи́вшая. Ра́­дуй­ся, мо́ре, потопи́вшее фарао́на мы́сленнаго; ра́­дуй­ся, ка́­ме­ню, напои́вший жа́ждущия жи́з­ни. Ра́­дуй­ся, о́гненный сто́л­пе, на­став­ля́яй су́щия во тьме; ра́­дуй­ся, по­кро́­ве ми́­ру, ши́рший о́блака. Ра́­дуй­ся, пи́­ще, ма́нны прие́мнице; ра́­дуй­ся, сла́дости свя­ты́я служи́тельнице. Ра́­дуй­ся, земле́ обетова́ния; ра́­дуй­ся, из нея́же тече́т мед и млеко́. Ра́­дуй­ся, Не­ве́с­то Не­не­ве́ст­ная.

Кондак 7

Хо­тя́­щу Симео́ну от ны́нешняго ве́­ка преста́витися преле́стнаго, вда́лся еси́ я́ко младе́нец тому́, но позна́лся еси́ ему́ и Бог со­вер­ше́н­ный. Те́м­же уди­ви́­ся Тво­е́й неизрече́нней пре­му́д­ро­сти, зо­вы́й: Алли­лу́иа.

Икос 7

Но́вую по­ка­за́ тварь, я́вль­ся Зижди́тель нам от Не­го́ бы́вшим, из безсе́менныя прозя́б утро́бы, и сохрани́в Ю, я́ко­же бе, нетле́нну, да чу́­до ви́­дя­ще, воспои́м Ю, во­пию́­ще: Ра́­дуй­ся, цве́­те не­тле́­ния; ра́­дуй­ся, ве́н­че воз­дер­жа́­ния. Ра́­дуй­ся, воскресе́ния о́б­раз облиста́ющая; ра́­дуй­ся, а́н­гель­ское жи­тие́ яв­ля́ю­щая. Ра́­дуй­ся, дре́­во светлоплодови́тое, от него́же пита́ются ве́рнии; ра́­дуй­ся, дре́­во бла­го­сен­но­ли́ст­вен­ное, и́м­же покрыва́ются мно́­зи. Ра́­дуй­ся, во чре́ве нося́щая Изба́вителя плене́нным; ра́­дуй­ся, ро́жд­шая Наста́вника заблу́дшим. Ра́­дуй­ся, Судии́ пра­вед­на­го умоле́ние; ра́­дуй­ся, мно́гих со­гре­ше́­ний про­ще́­ние. Ра́­дуй­ся, оде́ж­до на­ги́х дерзнове́ния; ра́­дуй­ся, лю­бы́, вся́­кое же­ла́­ние побежда́ющая. Ра́­дуй­ся, Не­ве́с­то Не­не­ве́ст­ная.

Кондак 8

Стра́н­ное рождество́ ви́­дев­ше, устра­ни́м­ся ми́­ра, ум на не­бе­са́ прело́жше: се­го́ бо ра́­ди высо́кий Бог на зем­ли́ яви́­ся смире́нный че­ло­ве́к, хо­тя́й привлещи́ к вы­со­те́ Тому́ во­пию́­щия: Алли­лу́иа.

Икос 8

Весь бе в ни́ж­них и вы́ш­них ни­ка́­ко­же от­сту­пи́ не­опи­са́н­ное Сло́­во: снизхожде́ние бо Бо­же́ст­вен­ное, не прехожде́ние же ме́стное бысть, и рождество́ от Де́­вы Богоприя́тныя, слы́шащия сия́: Ра́­дуй­ся, Бо́­га не­вме­сти́­ма­го вмес­ти́­ли­ще; ра́­дуй­ся, честна́го та́инства две́ри. Ра́­дуй­ся, не­ве́р­ных су­мни́­тель­ное слы́­ша­ние; ра́­дуй­ся, ве́р­ных из­ве́ст­ная по­хва­ло́. Ра́­дуй­ся, колесни́це пре­свя­та́я Су́щаго на Херуви́мех; ра́­дуй­ся, се­ле́­ние пре­сла́в­ное Су́щаго на Серафи́мех. Ра́­дуй­ся, проти́вная в то́жде собра́вшая; ра́­дуй­ся, де́вство и рождество́ сочета́вшая. Ра́­дуй­ся, Е́ю­же разреши́ся преступле́ние; ра́­дуй­ся, Е́ю­же отве́рзеся рай. Ра́­дуй­ся, ключу́ Ца́рст­вия Хри­сто́­ва; ра́­дуй­ся, на­де́ж­до благ ве́ч­ных. Ра́­дуй­ся, Не­ве́с­то Не­не­ве́ст­ная.

Кондак 9

Вся́­кое ес­тес­тво́ а́н­гель­ское уди­ви́­ся ве­ли́­кому Тво­его́ вочелове́чения де́лу; непристу́пнаго бо я́ко Бо́­га, зря́ще всем присту́пнаго Че­ло­ве́­ка, нам у́бо спребыва́юща, слы́шаща же от всех: Алли­лу́иа.

Икос 9

Ве­ти́я мно­го­ве­ща́н­ныя, я́ко ры́­бы без­гла́с­ныя ви́­дим о Те­бе́, Бо­го­ро́­ди­це, недоумева́ют бо гла­го́­ла­ти, е́же ка́­ко и Де́ва пре­бы­ва́е­ши, и роди́ти возмогла́ еси́. Мы же, та́ин­ству ди­вя́­ще­ся, ве́р­но во­пи­е́м: Ра́­дуй­ся, пре­му́д­ро­сти Бо́­жия при­я́те­ли­ще, ра́­дуй­ся, про­мыш­ле́­ния Его́ со­кро́­ви­ще. Ра́­дуй­ся, любому́дрыя нему́дрыя яв­ля́ю­щая; ра́­дуй­ся, хитрослове́сныя безслове́сныя об­ли­ча́ю­щая. Ра́­дуй­ся, я́ко обуя́ша лю́тии взыска́теле; ра́­дуй­ся, я́ко увядо́ша баснотво́рцы. Ра́­дуй­ся, афине́йская плете́ния рас­тер­за́ю­щая; ра́­дуй­ся, ры́барския мре́жи исполня́ющая. Ра́­дуй­ся, из глу­би­ны́ неве́дения извлача́ющая; ра́­дуй­ся, мно́ги в ра́зуме про­све­ща́ю­щая. Ра́­дуй­ся, кораблю́ хотя́щих спас­ти́­ся; ра́­дуй­ся, при­ста́­ни­ще жите́йских пла́ваний. Ра́­дуй­ся, Не­ве́с­то Не­не­ве́ст­ная.

Кондак 10

Спас­ти́ хо­тя́ мир, И́же всех Украси́тель, к се­му́ самообетова́н при­и́де, и Па́стырь сый, я́ко Бог, нас ра́­ди яви́­ся по нам че­ло­ве́к: подо́бным бо подо́бное при­зва́в, я́ко Бог слы́шит: Алли­лу́иа.

Икос 10

Сте­на́ еси́ де́­вам, Бо­го­ро́­ди­це Де́­во, и всем к Те­бе́ при­бе­га́ю­щим: и́бо не­бе­се́ и зем­ли́ Тво­ре́ц устро́и Тя, Пре­чи́с­тая, все́лься во утро́­бе Тво­е́й, и вся приглаша́ти Те­бе́ нау­чи́: Ра́­дуй­ся, сто́л­пе де́вст­ва; ра́­дуй­ся, дверь спа­се́­ния. Ра́­дуй­ся, нача́льнице мы́сленнаго назда́ния; ра́­дуй­ся, пода́тельнице Бо­же́ст­вен­ныя бла́­гос­ти. Ра́­дуй­ся, Ты бо обнови́ла еси́ зача́тыя сту́дно; ра́­дуй­ся, Ты бо наказа́ла еси́ окра́денныя умо́м. Ра́­дуй­ся, тли́теля смы́слов упраждня́ющая; ра́­дуй­ся, Се́ятеля чис­то­ты́ ро́жд­шая. Ра́­дуй­ся, черто́же безсе́меннаго уневе́щения; ра́­дуй­ся, ве́р­ных Го́сподеви сочета́вшая. Ра́­дуй­ся, до́б­рая младопита́тельнице де́­вам; ра́­дуй­ся, невестокраси́тельнице душ свя­ты́х. Ра́­дуй­ся, Не­ве́с­то Не­не­ве́ст­ная.

Кондак 11

Пе́­ние вся́­кое побежда́ется, спростре́тися тща́щееся ко мно́жеству мно́гих щед­ро́т Тво­и́х: равночи́сленныя бо песка́ пе́сни а́ще при­но́­сим Ти, Ца­рю́ Свя­ты́й, ни­что́же соверша́ем досто́йно, я́же дал еси́ нам, Те­бе́ во­пию́­щим: Алли­лу́иа.

Икос 11

Све­то­при­е́м­ную све­щу́, су́­щим во тьме я́вльшуюся, зрим Свя­ту́ю Де́ву, не­ве­ще́ст­вен­ный бо вжига́ющи огнь, наставля́ет к ра́зуму Боже́ственному вся, за­ре́ю ум про­све­ща́ю­щая, зва́нием же почита́емая, си́­ми: Ра́­дуй­ся, луче́ у́мнаго Со́лн­ца; ра́­дуй­ся, све­ти́­ло незаходи́маго Све́­та. Ра́­дуй­ся, мо́л­ние, ду́­ши про­све­ща́ю­щая; ра́­дуй­ся, я́ко гром вра­ги́ устра­ша́ю­щая. Ра́­дуй­ся, я́ко многосве́тлое возсиява́еши про­све­ще́­ние; ра́­дуй­ся, я́ко многотеку́щую источа́еши ре­ку́. Ра́­дуй­ся, купе́ли живопису́ющая о́б­раз; ра́­дуй­ся, грехо́вную отъе́млющая скве́рну. Ра́­дуй­ся, ба́­не, омы­ва́ю­щая со́­весть; ра́­дуй­ся, ча́ше, че́рплющая ра́­дость. Ра́­дуй­ся, обоня́ние Хри­сто́­ва благоуха́ния; ра́­дуй­ся, жи­во­те́ та́йнаго ве­се́­лия. Ра́­дуй­ся, Не­ве́с­то Не­не­ве́ст­ная.

Кондак 12

Бла­го­да́ть да́­ти вос­хо­те́в, дол­го́в дре́в­них, всех дол­го́в Реши́тель че­ло­ве́­ком, при­и́де Со­бо́ю ко отше́дшим Того́ бла­го­да́­ти, и раздра́в рукописа́ние, слы́шит от всех си́­це: Алли­лу́иа.

Икос 12

Пою́­ще Твое́ Рождество́, хва́­лим Тя вси, я́ко оду­шев­ле́н­ный храм, Бо­го­ро́­ди­це: во Тво­е́й бо все­ли́в­ся утро́­бе содержа́й вся ру­ко́ю Гос­по́дь, освяти́, просла́ви и нау­чи́ вопи́ти Те­бе́ всех: Ра́­дуй­ся, се­ле́­ние Бо́­га и Сло́ва; ра́­дуй­ся, свя­та́я свя­ты́х бо́льшая. Ра́­дуй­ся, ковче́же, позлаще́нный Ду́­хом; ра́­дуй­ся, со­кро́­ви­ще жи­во­та́ не­ис­то­щи́­мое. Ра́­дуй­ся, чест­ны́й ве́н­че лю­де́й бла­го­чес­ти́­вых; ра́­дуй­ся, честна́я по­хва­ло́ иере́ев благогове́йных. Ра́­дуй­ся, це́рк­ве не­по­ко­ле­би́­мый сто́л­пе; ра́­дуй­ся, Ца́рст­вия неруши́мая сте­но́. Ра́­дуй­ся, Е́ю­же воздви́жутся по­бе́­ды; ра́­дуй­ся, Е́ю­же низпа́дают врази́. Ра́­дуй­ся, те́­ла мо­его́ врачева́ние; ра́­дуй­ся, ду­ши́ моея́ спа­се́­ние. Ра́­дуй­ся, Не­ве́с­то Не­не­ве́ст­ная.

Кондак 13

О, Все­пе́­тая Ма́­ти, ро́жд­шая всех свя­ты́х Свя­те́й­шее Сло́­во! Ны́нешнее прие́мши при­но­ше́­ние, от вся́­кия из­ба́­ви на­па́с­ти всех, и бу́­ду­щия из­ми́ му́­ки, о Те­бе́ во­пию́­щих: Алли­лу́иа, алли­лу́иа, алли­лу́иа.

Этот, кондак чи­та­ет­ся трижды, за­те́м икос 1-й и кондак 1-й.

Икос 1

А́н­гел пред­ста́­тель с не­бе­се́ по́с­лан бысть ре­щи́ Бо­го­ро́­ди­це: ра́­дуй­ся, и со безпло́тным гла́сом воплоща́ема Тя зря, Го́с­по­ди, ужаса́шеся и стоя́ше, зо­вы́й к Ней та­ко­ва́я: Ра́­дуй­ся, Е́ю­же ра́­дость возсия́ет; ра́­дуй­ся, Е́ю­же кля́тва изче́знет. Ра́­дуй­ся, па́д­ша­го Ада́ма воззва́ние; ра́­дуй­ся, слез Е́виных из­бав­ле́­ние. Ра́­дуй­ся, высото́ неудобовосходи́мая челове́ческими по́мыслы; ра́­дуй­ся, глубино́ неудобозри́мая и а́нгельскима очи́­ма. Ра́­дуй­ся, я́ко еси́ Царе́во седа́лище; ра́­дуй­ся, я́ко но́сиши Но­ся́­ща­го вся. Ра́­дуй­ся, Звез­до́, яв­ля́ю­щая Со́лн­це; ра́­дуй­ся, утро́бо Бо­же́ст­вен­на­го воплоще́ния. Ра́­дуй­ся, Е́ю­же обновля́ется тварь; ра́­дуй­ся, Е́ю­же покланя́емся Твор­цу́. Ра́­дуй­ся, Не­ве́с­то Не­не­ве́ст­ная.

Кондак 1

Взбра́нной Воево́де победи́тельная, я́ко из­ба́вль­ше­ся от злых, бла­го­да́р­ствен­ная воспису́ем Ти раби́ Твои́, Бо­го­ро́­ди­це; но я́ко иму́щая держа́ву непобеди́мую, от вся́­ких нас бед сво­боди́, да зо­ве́м Ти: ра́­дуй­ся, Не­ве́с­то Не­не­ве́ст­ная.

Мо­лит­ва

О, Пре­свя­та́я Гос­по­же́ Вла­ды́­чи­це Бо­го­ро́­ди­це, вы́шши еси́ всех А́н­гел и Ар­ха́н­гел, и всея́ тва́­ри честне́йши, по­мо́щ­ни­це еси́ оби́­ди­мых, ненаде́ющихся на­де́я­ние, убо́­гих за­сту́п­ни­це, пе­ча́ль­ных уте­ше́­ние, а́лчущих корми́тельнице, на­ги́х оде­я́ние, больны́х ис­це­ле́­ние, гре́ш­ных спа­се́­ние, хри­сти­а́н всех поможе́ние и за­ступ­ле́­ние. О, Все­ми́­лос­ти­вая Гос­по­же́, Де́­во Бо­го­ро́­ди­це Вла­ды́­чи­це, ми́­лос­тию Твое́ю спа­си́ и по­ми́­луй святе́йшия патриа́рхи пра­во­сла́вныя, преосвяще́нныя митрополи́ты, архиепи́скопы и епи́скопы и весь свяще́ннический и и́ноческий чин, и вся пра­во­сла́вныя христиа́ны ри́­зою Твое́ю чест­но́ю защити́; и умо­ли́, Гос­по­же́, из Те­бе́ без се́­ме­не воплоти́вшагося Хри­ста́ Бо́­га на́­ше­го, да препоя́шет нас си́­лою Свое́ю свы́­ше, на неви́димыя и ви́­ди­мыя вра­ги́ на́­ша. О, Все­ми́­лос­ти­вая Гос­по­же́ Вла­ды́­чи­це Бо­го­ро́­ди­це! Воз­дви́г­ни нас из глу­би­ны́ гре­хо́в­ныя и из­ба́­ви нас от гла́­да, губи́тельства, от тру́­са и по­то́­па, от ог­ня́ и ме­ча́, от нахожде́ния ино­пле­ме́н­ных и меж­до­усо́б­ныя бра́­ни, и от на­пра́с­ныя сме́р­ти, и от нападе́ния вра́­жия, и от тлетво́рных ветр, и от смер­то­но́с­ныя я́з­вы, и от вся́­ка­го зла. По­да́ждь, Гос­по­же́, мир и здра́­вие ра­бо́м Тво­и́м, всем правосла́вным христиа́ном, и про­све­ти́ им ум, и о́чи серде́чнии, е́же ко спа­се́­нию; и спо­до́­би ны, гре́ш­ныя ра­бы́ Твоя́, Ца́рст­вия Сы́­на Тво­его́, Хри­ста́ Бо́­га на́­ше­го; я́ко дер­жа́­ва Его́ благослове́на и препросла́влена, со Без­на­ча́ль­ным Его́ От­це́м, и с Пре­свя­тым, и Бла­ги́м, и Жи­во­тво­ря́­щим Его́ Ду́­хом, ны́­не и при́с­но, и во ве́­ки ве­ко́в. Ами́нь.

Мо­лит­ва вторая

О, Пре­свя­та́я Де́­во Ма́­ти Го́с­по­да, Ца­ри́­це Не­бе­се́ и зем­ли́! Вонми́ многоболе́зненному воздыха́нию ду́­ш на́ших, при́­зри с вы­со­ты́ свя­ты́я Твоея́ на нас, с ве́­рою и лю­бо́­вию покланя́ющихся пре­чи́с­то­му о́б­ра­зу Тво­ему́. Се бо грех­ми́ погружа́емии и скорбьми́ обурева́емии, взира́юще на Твой о́б­раз, я́ко живе́й Ти су́­щей с на́­ми, при­но́­сим смире́нныя мо­ле́­ния на́­ша. Не и́ма­мы бо ни ины́я по́­мо­щи, ни ина́го предста́тельства, ни уте­ше­ния, то́кмо Те­бе́, о, Ма́­ти всех скор­бя́­щих и об­ре­ме­не́н­ных. Помози́ нам не­мощ­ны́м, утоли́ скорбь на́­шу, наста́ви на путь пра́вый нас, заблужда́ющих, уврачу́й и спа­си́ безнаде́жных, да́­руй нам про́чее вре́­мя жи­во­та́ на́­ше­го в ми́­ре и тишине́ проводи́ти, по­да́ждь хри­сти­ан­скую кон­чи́­ну, и на стра́шнем су­де́ Сы́­на Тво­его́ яви́­ся нам ми­ло­се́р­дая За­сту́п­ни­ца, да всег­да́ по­е́м, ве­ли­ча́­ем и сла́­вим Тя, я́ко благу́ю За­сту́п­ни­цу ро́­да хри­сти­а́н­ска­го, со все́­ми угоди́вшими Бо́­гу. Ами́нь.

Кондак 1

Избранной Небесным Царем, превысшей и умных чинов, всеблагой Царице, рода христианскаго Заступнице и от всех зол и напастей скорому вспоможению, вси мы, грешнии и в безмерных бедах сущии раби Ея, со слезами и умилением сердца, принесем покаянные пения: Ты же, яко премилосердная Мати наша, сама духоносному молению настави нас и прияти сия воздыхания души нашея удостой: о Благодатная, помилуй нас и спаси, и пачесолнечною теплотою любве Твоея грехми умерщвленный наш дух оживи. Тьма неверия и в сне глубоце запустение жизни богоподобные объяша до конца предавшийся тлению род человеческий, и в неисходных пленицах падений греховных оковал все ны светоненавистник и древний убийца-диавол, князь мира сего. Но и врагами соделавшихся, не престала любити людей своих бла-гость Творца, нас спасающего, и Тобою, о Пренепорочная дщерь Давидова, обетовал Он изначала даровати погибшим Семя жены Христа Еммануила. Се и мы ныне, аще и ослепихом очеса наша маловерием и ужасаемся глубины неотмытных беззаконий своих, но от Тебе, о Мати Света, чаем спасения, и не ищуще самооправдания во гресех неисчетных, Тебе надеждою непозыблемою к себе зовем: о Благодатная. на помощь к нам поспеши, – Царице Небесная, из бездны падений нас исхити, о Благодатная, лучами света горняго всеобдержащий мрак жития нашего озари, – Дево Пречистая, сия-нием чистоты Твоея грехми потемневшие наша сердца освети, о Благодатная, бежати льщений лжи и греха Ты нас научи – Матерь Святейшая, любовь и верность правде в души наша вложи. О Благодатная, помилуй нас и спаси, и пачесолнечною теплотою любве Твоея грехми умерщвленный наш дух оживи .

Кондак 2

Оставивше двор отчий и, яко блудный сын, на страну далече отышедше, во мрак язычества, тину страстей и сень смертную впадоша вси сыны Сифовы, и ни царь и ни пророк, ни ангел и ни мудрец, но точию Божественный Сын Твой, о Благодатная Марие, возможе их к свету боговедения принести и вся силы, яже к животу и благочестию, даровати, да умиление, спасение обретши, Творцу и избавителю своему поем: Аллилуиа.

Икос 2

Шаташася всуе языцы и людие заблудшии поучахося тщетным, понеже забвено бысть чистое предание сынов Божиих, и сеть многобожия привлече осуетившиеся народы в кумирослужение лжи и истаявание вредоносных похотей и скверны угождения грехолюбивой плоти. Егда же предста Тебе, вещати дивная, воинств ангельских вождь – Гавриил, разгнася Светом Востока идольской лести ночная тьма, и начаток явися во Христе Иисусе всякия плоти конечнаго исцеления. Темже и мы умиленным сердцем, главизну спасения видяще, со Архангелом в благоговении Тебе взываем: о Благодатная, всегда с Тобою Бог и Господь, – Дево Богородице, спасение Той и нам в Тебе соделала, о Благодатная, коль благословен во истину пречистаго чрева Твоего Божественный Плод, – святая святых Святейшая, в Тебе вместися Невместимый и небом, не точию бренною землей, о Благодатная, колицее величие сотвори Тебе Царь и Господь, – Матерь Безневестная, любве безконечной и нам осияй животворящий свет. О, Благодатная, помилуй нас и спаси, и пачесолнечною теплотою любве Твоея грехми умерщвленный наш дух оживи.

Кондак 3

Новую тварь созидати и людей Своих во еже не земная, но горняя мудровати привести, сниде с небесе во юдоль земную Человеколюбец Господь, от Негоже и поднесь устрояется Царствие Божие на земли и претворяет собою, якоже квас добрый, да вскисает все многоразличное смешение человеческое. Мы же, единое стадо Христово возлюбивше и крепце во дворе Его присно сердцем утверждающеся, единодушно, и в падениях наших всяпобеждающему, Владыце жизни нашея поем: Аллилуиа.

Икос 3

Горний Иерусалим всегда осияя и всеоживляющей Благодатию Святаго Духа утешая прославленных Своих, яви Господь и в мире земном жизнь и силу Царствия Своего, и уже не юдолию плача и слез, но мира всеутоляющаго и радости нескомчаемыя, ея же никтоже не может отъяти, предстоит всем верным небошественный путь странствия нашего во временном сем бытии. На него же взирающе, и мы недостойнии и ленивии, к сему блаженству при-звании, но изменою безверия и пустотою миролюбления себе из него извергшии, от Тебе, о Богомати, помощи и спасения себе чаем и слезами раскаяния и сердечного обращения от гибели сия вопием: о Благодатная, Ты нас исцели, – Мати милосердная, прощение Божие нам испроси, о Благодатная, к жизни в Сыне Твоем возврати. Небесный Покрове наш, током благодати, сущей в Тебе, изсохшее сердце в нас ороси, о Благодатная, не любити мира и злых, яже в мире, нас научи, – Дево Пречистая, влечения сердца нашего к чистой любви Христовой устреми. О, Благодатная, помилуй нас и спаси, и пачесолнечною теплотою любве Твоея грехми умерщвленной наш дух оживи.

Кондак 4

Небошественнаго пути златыя правила имуще и мало избранных, в сих подвизающихся, повсюду присно видяще, в Тебе, на высшую степень богоподобия восшедшей, образ небесной мудрости и в Бозе вечнаго созидания обретаем и Тобою преизлиха утешаемся, ибо наипаче пред всеми слагала еси в чистейшем сердце Твоем вся словеса деяний и учений Воплотившейся премудрости – Сына Твоего: от-нюдуже приискренне о всех сих умилящиеся и дивная духа в Тебе созерцающе, толико прославльшемуся во святых Своих, похвально вси воспеваем: Аллилуиа.

Икос 4

Внутрь нас, якоже речет Господь, – в сердце человека, его просветлении, новой жизни и горе устремлениях, есть Царствие Божие, еже именуется правда и мир и радость о Дусе Святе, и красотою благоустроения души во избранных Божиих огнезрачне сияет нам. И сие совестию ведуще и духом ищуще, делы же студными и окаянством беззаконий своих вспять – во страну самоистуканных страстей – от-торгающеся, Тебе, во избранных избранную, восполнити и утолити наше обнищание просим и скорбными воздыханиями сердца сыновне умоляем сице, о Благо-стная, приблизитеся к Тебе помози, – сил Повелительнице, о Бозе возмогати нас укрепи, о Благодатная, сею благодатию, в Тебе преизбыточествующею, оскудевающая сердца наша напой, – во блазе Помощнице цветы доброделания в пустынныя наши души всади, о Благодатная, достигати Царствия Сына Твоего подвигни нас и усоверши, – непорочности Вечне, духовные блага ценити и искати научи: О, Благодатная, помилуй нас и спаси, и пачесолнечною теплотою любве Твоея грехми умерщвленный наш дух оживи.

Кондак 5

Яко пшеница добрая на ниве, вырастает и красы плодит и зреет незримо на сердце человека Царствие Божие, и сторицею выращает Отец щедрот семя словес Его, аще почвою доброю, углубленною и потом усердия возделанною приемлет сие сердце наше. И сия вся добре ведуще и радостне созерцающе прославляем Единаго Виновника всяческого доброделания – Тебе, Отца светов, от Негоже исходит всякое даяние благо и всяк дар совершен: Аллилуиа.

Икос 5

“Блаженни слышащии слово Божие и хранящии его”, ибо ни в сем веце, ни в будущем не отнимется от них сия благая часть, и соблюдше ю в добром и чистом сердце своем, всегда приносят они в терпении обильный плод свой, радуяся. Ибо и братом, и сестрой, и даже материею Своею удостоил наименовать их Господь, аще исполнят они волю Отца Его, Иже на небесех. Воистину, сице еще и духом и всею жизнию соделалася Ты, о Пресвятая Дево, Материю Господа Твоего, Егоже Пречистая Плоть исткася от Твоих честных кровей: ибо паче всех соблюла еси Божественное слово Его и к небесем со славою восшла еси, сотворши волю Отца Небеснаго. Мы же вси, умом и сердцем сведуще сия солнцем блистающия доброты Твоя, и радостию прославляюще во Успении Твоем к небеси возвышение рода человеческаго, благоговейными усты согласно поем божественныя величия Твоея: о Благодатная, яко Мати Владыки, восцарившаяся на небеси, – Венче, Превысший всякого создания, и нас, скорбных и убогих, не оставляющая на земли: о Благодатная, на камени исполнения заповедей нас утверди, – Возлюбленная Богом и лики ангельскими, и наша замкнувшиеся и в могилу себялюбия погребльшияся сердца от-верзи к любви, о Благодатная, из душной темницы гордыни, уныния и плотских похотей вся ны изведи, – Царице Небесная, к Божию роду и нас, страстъми оземляневших, сопричти и подними. О, Благодатная, помилуй нас и спаси, и пачесолнечною теплотою любве Твоея грехми умерщвленный наш дух оживи.

Кондак 6

“Иже несть со Мною, на Мя есть, и иже не со Мною собирает, – расточает”, рече Своим верным Ипостасная Премудрость, Христос Господь, презирая в глубине веков всепроницающим Оком Своим и сего дне, объюродевших без Христа мудрецов, на песце зиждемая строения. Ихже шатания видяще и в познании правды христианского благочестия паче утверждающеся, проникновенным сердцем и усты воспеваем мы Единому краеугольному Каменю небесных и земных созиданий, Владыце Христу: Аллилуиа.

Икос 6

Путь и жизнь и истину прият род человеческий во Христе, и победа, ею же Он победи мир, соделася достоянием всех верных Его – добрых делателей зде виноградника Божия. Ибо не точию залог блаженства века грядущаго Владыка дарует им, но в доброй совести каждаго во благо устрояется всяческое и земное делание их, и в правде созидается взаимное служение братий, любовию и миром побеждающее вражду и разделения в людех, наипаче же от рабства и тьмы заблуждений свободит сей верный раб земное житие свое. Обаче – увы нам, в лености и небрежении и слепоте безумно иждивающим, неисчетною ценою дарованное, премирное сокровище светозарныя веры Христовой! Ибо и плен, и узы, и ослепления свои – в свободы место возлюбили самопрельщенне все мы, свет заповедей Царя своего забыв до конца и самохотне предавшеся соблазнам и обманам многим в сии лукавые дни, яко и вся добрая, отцы преданная, правила паче расточате, в небрежении своем без Христа и света веры устрояя свою жизнь. Сего ради Тебе, яко стену веры и жизни христианския, никоими же злыми рушиму, добре ведущии и Единую Надежду себе имущии, из бездны отчаяния умоляем и вопием: о Благодатная, Сама сущи во истине, ко истине и нас приведи, – Милостивая изнемогшим Помощнице, победителями греха молящихся Тебе сотвори, о Благодатная, еже видети и ненавидети злой плен свой наш ум озари, – мудрости горней сокровище, красная жизни вечная очесам сердца яви, о Благодатная, соблазнов прельщение от нас отжени, – правды Христовой Свет немерцающий, развевати, яко пыль плевельную. Лукавые ухищрения вся ны умудри. О, Благодатная, помилуй нас и спаси, и пачесолнечною теплотою любви Твоея грехми умерщ-вленный наш дух оживи.

Кондак 7

Дево Пренепорочная, Жизнь миру родившая, приобщитися и нас, недостойных, сея истинныя Жизни в Сыне Твоем призови и лику избранных Его сопричти, и якоже Сама от дольных земли к горним восшедшая, и наши одебелевшие взоры горе устреми и духовныя зрети научи, во глубинах души нашея всецелую преданность Богу, яко Отцу любви, возбуди, да приискренне славословим Его, вкупе, во имя Его, сошедшеся: Аллилуиа.

Икос 7

Коль светла и благотишна, коль сладка и радостна жизнь богоизбранных во Христе, коль дивные знамения силы и любви являет в покое их сердца Сладчайший Спаситель наш, Господь Иисус! Тако и во всех тяготах и обременении и скорби душевной к Себе зовет нас Его бесконечная Любовь, – да возьмем Его иго на себя и да образ кротости и смирения Спаса своего в сердце своем воспримем мы. И благо Его иго, и бремя Его поистине легко, всякую тугу сердечную облегчая во утешение нам и отрадой мира неотъемлемого преобразуя сию скорбную жизнь. Обаче всех сих благих и развращенных и стропотных греха лишившихся, тлю же похотей и зависти, и злобы, и уныния, и иная вся плевельная в сердце сгяжавшии, прегорце во всех сих осуждаем себе и стяняше, в покаянии нелицемерном к Тебе единей очи свои возводим и сыновне зовем: о Благодатная, прости нас, прости, – дверь милосердия нам отверзше, люди своя воззови, о Благодатная, благое иго Христово желати нас научи, Небесный образе смирения, сие с кротостию и в наше сердце вложи, о Благодатная, мир в наши души, мир и с ближними нам ниспосли, – мира и любви Владычице, все житие страждущего народа Твоего умири и в покаяние возраждающее приведи. О, Благодатная, помилуй нас и спаси, и паче солнечною теплотою любве Твоея грехми умерщвленный наш дух озари.

Кондак 8

Бисер многоценный и почесть наивысшаго в мире сем знания даровася нам Отцем светов и Источником щедрот, яко сынам Святыя Его, Единыя Православныя Церкве, яже есть столп и утверждение истины. Мы же, аще по достоянию ценити сего не навыкше и деяньми сквернаго грехолюбия всечастно сим изменяюще, – обаче о таковом царском звании своем умиленным благодарением Призвавшему нас – Владыце неба и земли – поем: Аллилуиа.

Икос 8

“О роде неверный и развращенный. Доколе Я с вами, доколе терплю вас”, – возгласил и в долготерпении Своем Господь, – о тех, иже в безверии и притворстве, еще же в лености и пустоте сердца и в сквернах греховных, приступали к нему, и тьма суще, к Свету Чистейшему приобщали себя. Но се и мы, аще и христиане именуемии, такожде мучим и распинаем Спасшего нас, ибо злобою многою и ожесточением, и изменами неверия, и язвами всесожигающих страстей по вся дни уязвляем Его, и не могуще от хладности и небрежения, и от лени своея, в покаяние и исправление приити, паче и паче движем на себя праведный гнев Судии. Ты же, Единое Упование наше, благода-тию вся могущи, – можеши и сия неисцельные недуги уврачевати нам и праведне на ны движимый гнев Божий Твоим предстательством и молитвами утолити и отвести. Сего ради всем усердием, всею любовию своею и из глубины сердца воздыханьми к Тебе припадаем и вопием: о Благодатная, помози нам, о помоги, – Матерь Милосердная, из мерзкой тины грехов изыми, о Благодатная, елеем любве Твоей одеревеневшее сердце наше смягчи, – всех нас возлюбившая, лучами доброт Твоих оледенение лености нашей и самохотных вожделений в нашей душе растопи, о Благодатная, в веру, в жизнь духа призови нас и введи – Дево Пречистая, сердцем коснутися святости и любви Христовой нас подыми. О, Благодатная, помилуй нас и прости, и пачесолнечною теплотою любве Твоея грехми умерщвленный наш дух оживи.

Кондак 9

Сотвори Тебе величие Сильный, яко возлюбленной Матери Божественного Сына Своего, яко Святейшей из святых, Честнейшей Херувим и Славнейшей без сравнения Серафим. Обаче и Тебе путем крестным идти к славе указала Отчая Любовь, егда устами Симеона предтече, яко оружие пройдет сквозь матернски скорбящее сердце Твое. Мы же, яко во спасение наше все сие будет, ведущи, и безмерности Божественной благости к нам грешным постигнути не могущии, благодарне песнь хваления возносим Ему: Аллилуиа.

Икос 9

Огненную цепь лютых мучений, и наипаче позорнаго пригвождения ко кресту, претерпе пред очима Твоима Божественный Сын, до конца покорною Отцу волею испив чашу, все грехи мира омывающих, страданий Своих. И то зряще и сердцем с Сыном распинающися, до конца испила и Ты чашу сию, изболевшим сердцем Своим усыновив Себе во Христе всех страждущих и озлобляемых, кои изнемогают под бременем жизненнаго креста своего. Сего ради и мы во всех печалях и тесных обстояниях своих, к Тебе, яко Матери состраждущей всем скорбным и угнетенным, прибегаем и в горестях и напастях дней сих, Тебе с надеждою крепкою зовем: о Благодатная, Ты нас заступи, – Любовию пламенеющая, болезни лютыя многовоздыхающия души моея утоли, о Благодатная, терпением в скорбях наших усоверши, – Благословенная Богородице, силу поборати искушения в нас утверди, о Благодатная, от злых обстояний нас свободи, – Матерь Всеблагая, Твою силу – всепобеждающую и врагов правды разящую – народу маловерному ныне яви. О, Благодатная, помилуй нас и спаси, и пачесолнечною теплотою любве Твоея грехми умерщвленный наш дух оживи.

Кондак 10

Искони видеша народи христианстии Твое, о Крепкая Охрано бедствущих и погубляемых, неусыпное о них попечение, ея же ради вины и прославиша Тя вси и из рода в род свидетельствоваша о дивных чудесах, всюду поборающей о верных и на всякую усердную мольбу поспешающей, всесильной помощи Твоей, и тако благодарственне пели и поют из края в край о Тебе песнь хвалебную Богу: Аллилуиа.

Икос 10

Велие чудо сотвори Господь Твоего ради, о Матерь Божия, всемощнаго об отцех наших ходатайства. Егда бо великий ненавистник рода христианского и лютый мучитель Темираксак хвалишеся всю Российскую землю положити в запустение и искоренити христианскую веру, к Тебе возопиша людие Твои о спа-сении и в покаянии и слезах многих притекоша к святей Владимирстей иконе Твоей. И бежа тогда нечестивый, ибо в сонме святых узре той Тебе, яко Царицу, во славе неизреченной, молниезрачными лучами паче солнца осияваемую и ему отъити от предел нашея страны грозно претящу, о верных же Своих, руками простертыма, к Сыну Своему молящуюся. Мы же, верою несомненною великое море чудес Твоих вспоминающе, и все чаяние свое на Тя возложше, от моря злых устремлений, и в нас самих и окрест нас ополчившихся, и ныне оградити народ наш умоляем и в рыданиях многих поем: о Благодатная, на ны належащую грозу отжени, – Мати Благая, покрывши любовию, разслабление наше удали и прости, о Благодатная, силу и лепоту Православия миру яви, – веры Хранительнице, и нас убогих достойными ея сотвори, о Благодатная, солнца превысшую славу Твою нашему сердцу открый, – Ты, Матерь Света, тьму належащую с наших очес разжени. О, Благодатная, помилуй нас и спаси, и пачесолнечною теплотою любве Твоея грехми умерщвленный наш дух оживи.

Кондак 11

Многажды и отцы наши ослабеваху в добром христианском житии своем, и темнотою и невежеством, пороки и неправдами, такожде и братоненавидением и обидами слабому, в тину студодеяния себе погружаху. Обаче, и падающе глубоце, не к инем кумирам, но к Единому Богу – Спасителю своему прибегаху, и горняя возлюбив, покаянием же слезным к Тебе, Заступнице Усердной, очи свои возводяще, не преставаху пред святыми Твоими иконами пети: Аллилуиа.

Икос 11

Разоряшеся некогда страна Русская лихолетием, егда смуты и безначалие, татьбы и обманы, убийства и кровопролития, и злоба многая обуяша люди православные, и измалодушествовалися вси, себе погубляюще, еще и тяжкому врагов иноверных и жестоких нашествию предаде я Господь. И кто же бы спас тогда изнемогших и яко листвия разсыпавшихся, и уже в бездну отчаяния пришедших отцев наших, аще не Ты, о Всеблагая, умилосердилась о них, Еяже предстательством, яко же поведа святый угодник Божий и молит-венник за ны, Сергий, суд об отечестве нашем на милость преложил Владыка Христос. Та вся вспоминающе и большая сих зол во дни наша видяще, и яко в волнах морских погибающии, и мы Тебе громце зовем: о Благодатная, злобе врагов лютых одолеть нас немощных не попусти, – мира Владычице, вспять козни губительныя их обрати, о Благодатная, Судию Праведнаго о нас умоли, – Кротости Величие, тишину мира и любви в народе Твоем утверди. О, Благодатная, помилуй нас и спаси, и па-чесолнечною теплотою любве Твоея грехми умерщвленный наш дух оживи.

Кондак 12

Излияся благодать, во апостоле языков сущая, на вся верующая, яко и на недужныя наносиша от пота тела его главотяжи и убрусцы, и тии исцеляхуся от недуг своих, такожде гонимии силою Божиею, бежаху и духи нечистии из них. Изливаеши и Ты, Преизбыточествующая благодатию, сию от полноты Твоея во святые иконы Твоя, яже избираеши в знамения от Твоея любве помощи верным, надеющимся на Тя, да поем, радостию торжествующе о сих явлениях силы Твоей, вси Прославльшему яко Царицу, Тебе: Аллилуиа.

Икос 12

Многое множество милости Своея явила еси, Богородице, православным людем Твоим, наипаче же во святых написаниях Пречистаго Лика Твоего. Ибо и сия дивная знамения во множестве явишася в наши дни, ихже не знаша отцы наши и ни единый народ на земли, яко единою точию благодатною силою Твоею, яве же и совершение начим иным, обновишася и светло сияют святые иконы Твои. И то зряще и по достоянию воспети сия величия недоумевающе, благоговейно преклоняются и умиляются сердцем вси верные люди Твои. Сего ради и мы ныне, у Тебе единыя утешения ищуще, и благодарным сердцем дивныя дела любве Твоея свидетельствующе, аще и хладно есть в вере житие наше и пусто от разленения греховнаго сердце наше, прилежно у Тебе просити благаго пришествия Твоего подвизаемся, и в вышняя Твоя сердце подъемлюще, едиными усты и единым сердцем Тебе вопием: о Благодатная, к доброму житию по вере Христовой наш дух про-буди, – жизнь нам Родившая, от закоснения нас сохрани, о Благодатная, в надежде незыблемой Ты нас утверди, – Дево Владычице, Твоими верными вся ны соблюди, о Благодатная, сия страны дольняя Покровом Твоим осени, – о всех болезнущи, во благо устроити нашу горькую жизнь научи. О, Благодатная, по-милуй нас и спаси, и пачесолнечною теплотою любве Твоея грехми умерщвленный, наш дух оживи.

Кондак 13

О, Преблагословенная Мати, пред Еяже любовию точию льна курение и самое сильное желание наше. Умилосердися на ны, Твоя многогрешныя рабы, прости и помилуй вся ны Твоею любовию молим Тя, помози, даруй избавление от отяготевших толико лет лютых зол и бед верному народу Твоему, сынами неверия порабощенному и растлеваемому. Твое избавление пошли – врачующее и наши недуги душевные, да на благое и верное житие по благому закону Сына Твоего приидем мы и да сердцем исцельшиися, и о свете веры нашея святые радующеся, сыновне из рода в род благодарною любовию и умилением воспеваем Всеблагому Отцу своему: Аллилуиа.

(Этот кондак читается трижды, затем икос 1 и кондак 1)

Оценка 3.3 проголосовавших: 33
ПОДЕЛИТЬСЯ

ОСТАВЬТЕ ОТВЕТ

Please enter your comment!
Please enter your name here