Вся паче смысла

07 – Воскресный глас 2 (тропарь, Богородичен и кондак)

Тропарь

Егда́ снизше́л еси́ к сме́pти, Животе́ Безсме́pтный,/ тогда́ ад умеpтви́л еси́ блиста́нием Божества́:/ егда́ же и уме́pшия от пpеиспо́дних воскpеси́л еси́,/ вся Си́лы Небе́сныя взыва́ху:// Жизнода́вче, Хpисте́ Бо́же наш, сла́ва Тебе́.

Богородичен

Вся па́че смы́сла,/ вся пресла́вная Твоя́, Богоро́дице, та́инства,/ чистоте́ запеча́танной, и де́вству храни́му,/ Ма́ти позна́лася еси́ нело́жна,/ Бо́га ро́ждши и́стиннаго;// Того́ моли́ спасти́ся душа́м на́шим.

Кондак

Воскре́сл еси́ от гр́оба, Всеси́льне Спа́се,/ и ад ви́дев чу́до, ужасе́ся,/ и ме́ртвии воста́ша;/ тварь же ви́дящи сра́дуется Тебе́,/ и Ада́м свесели́тся,// и мир, Спа́се мой, воспева́ет Тя при́сно.

Назад к списку

Глас 2. Суббота.

Богордичен, глас 2.

Вся па́че смы́сла, / вся пресла́вная Твоя́, Богоро́дице, та́инства, / чистоте́ запеча́танной и де́вству храни́му, / Ма́ти позна́лася еси́ нело́жна, / Бо́га ро́ждши И́стиннаго. / Того́ моли́ спасти́ся душа́м на́шим.

Слава и ныне, глас тойже:

Ма́ти Свята́я неизрече́ннаго Све́та, / а́нгельскими Тя пе́сньми почита́юще, / благоче́стно велича́ем.

Канон Пресвятей Богородице

Егоже и от оклеветания, в печалех и напастех сущии да поют

Песнь 1

Ирмос: Во глубине́ постла́ иногда́, фараони́тское всево́инство преоруже́нная си́ла, вопло́щшееся же Сло́во всезло́бный грех потреби́ло есть: препросла́вленный Госпо́дь, сла́вно бо просла́вися.

Припев: Пресвята́я Богоро́дице, спаси́ нас.

Яже всем удо́бь послу́шная в ско́рби и в печа́ли помога́ющая, Богоро́дице Блага́я, благода́ть пода́ждь пе́ти Тя дерза́ющим, Влады́чице, скорбя́щих ра́досте.

Многобога́тную благода́ть стяжа́вши, Влады́чице, дерзнове́нною Твое́ю моли́твою, пресла́вно изми́ мя от напа́стей, убо́гаго раба́ Твоего́, скорбя́щих ра́досте.

Слава: От враг ви́димых и неви́димых изба́ви, мо́лимся, к Тебе́ прибега́ющих Богоро́дице, и разори́ всяк сове́т борю́щих нас.

И ныне: Отыми́ поноше́ние челове́ческое и клеветы́ наве́тник от мене́, Богоро́дице, молю́ Тя: да усе́рдно сла́влю Го́спода, Его́же пита́ла еси́.

Песнь 3

Ирмос: Утверди́ нас в Тебе́, Го́споди, дре́вом умерщве́й грех, и страх Твой всади́ в сердца́ нас пою́щих Тя.

Враго́в наве́ты разори́ су́етныя, Всепе́тая Богоро́дице: не оскуде́й моли́твами Твои́ми, снабдя́щи нас, восхваля́ющих Тя.

При́зри, Чи́стая, ми́лостивным Твои́м о́ком, и изба́ви мя вся́каго наве́та ви́димых и неви́димых враго́в, ослепи́вши зени́цы оче́с их.

Слава: Зло́е нападе́ние враго́в, я́ко огнь паля́щее, и́щущих всегда́ погуби́ти нас, Де́во, росо́ю моли́тв Твои́х угаси́.

И ныне: Неугаси́мая лампа́до, заря́ присносия́тельная, но́щию мя скорбе́й одержи́ма, просвети́ моли́твами Твои́ми, ро́ждшая Со́лнце сла́вы, Христа́.

Песнь 4

Ирмос: Услы́шах, Го́споди, глас Твой, его́же ре́кл еси́, глас вопию́щаго в пусты́ни, я́ко возгреме́л еси́ над вода́ми мно́гими, Твоему́ свиде́тельствуяй Сы́ну, весь быв соше́дшаго Ду́ха, возопи́: Ты еси́ Христо́с, Бо́жия му́дрость и си́ла.

Спасе́ния Тя мост, моли́тву неусы́пну, заступле́ние тве́рдо мо́лим: умилосе́рдися и виждь на́шу нестерпи́мую печа́ль, боле́зни, ско́рби, стра́сти, и благопреме́нно посети́, Ма́ти Бо́жия, ра́дость ско́рую подаю́щи.

Не неприча́стни есмы́, Влады́чице, Твоего́ заступле́ния в ско́рбех: те́мже и ны́не нам помози́ вско́ре, лю́те обурева́емым ру́ку простира́ющи, Чи́стая: бу́ди ми́лостива боле́знем на́шим, Ма́ти Бо́жия, ра́дость ско́рую подаю́щи.

Слава: Не упова́ша, Влады́чице, на Тя беззако́ннующии, но упова́ша на язы́к велере́чив, на язы́к челове́чь, при́сно зави́стно излия́вшийся, непра́ведно пролия́ти кровь и́скренняго, рыка́юще: Ты же, Чи́стая, че́люсти их сокруши́.

И ныне: Смири́, Влады́чице, враго́в вознесе́нную вы́ю велере́чующих, сове́ты и злонра́вия, и сердца́ поуча́ющаяся злым на мя по вся дни: кре́пость же и побе́ду пода́ждь призыва́ющим Тя, Ма́ти Бо́жия, ра́дость ско́рую подаю́щи.

Песнь 5

Ирмос: Угль Иса́ии проявле́йся, Со́лнце из де́вственныя утро́бы возсия́, во тьме заблу́ждшим, Богоразу́мия просвеще́ние да́руя.

Моли́твеннице нело́жная, упова́ние христиа́н, обра́дованная, приими́ мольбы́ от нас, приле́жно призыва́ющих и моля́щихся Тебе́.

Исто́чник Тя жи́зни су́щи, Чи́стая, безсме́ртия источа́ющий во́ды, земноро́днии позна́вше, ублажа́ем.

Слава: Вооружи́ся на ны лука́вно враг, язы́ком, я́коже мече́м, погуби́ти хотя́: но Твое́ю, Богороди́тельнице, кре́постию предвари́.

И ныне: Пучи́ну, Чи́стая, заступле́нию кто изочте́т си́лы Твоея́? Те́мже нас су́щих в нужде́ ско́ро предвари́.

Песнь 6

Ирмос: В бе́здне грехо́вней валя́яся, неизсле́дную милосе́рдия Твоего́ призыва́ю бе́здну: от тли, Бо́же, мя возведи́.

Целому́дрия су́щи хода́таица, призыва́ющим Тя ны́не яви́ся и от вся́ких изба́ви напа́стей и бед, Богоневе́сто.

Злоде́йства вра́жия разори́ и клеветы́ непра́ведныя уста́ви, благослове́нная Пречи́стая, избавля́ющи непови́нныя от ско́рби.

Слава: Лю́тыми грехи́ окруже́ни и напа́стными беда́ми потопля́еми, под боже́ственный покро́в Твой прибега́ем, Ма́ти Христа́ Бо́га.

И ныне: Неискусому́жно ро́ждши Го́спода, яви́ся по Рождестве́ па́ки де́вствующи: О пресла́внаго чудесе́, в Тебе́ соде́ланнаго, Богоневе́сто!

Таже: Го́споди поми́луй, трижды. Слава, и ны́не

Седален, глас 2:

Моле́ние те́плое и стена́ необори́мая, ми́лости исто́чниче, ми́рови прибе́жище, приле́жно вопие́м Ти: Богоро́дице Влады́чице, предвари́ и от бед изба́ви нас, Еди́на вско́ре предста́тельствующая.

Песнь 7

Ирмос: Да пресла́вное Рождество́ Твое́, Христе́, е́же от Де́вы, прообрази́ши я́ве, неопали́мы в пещи́ о́троки сохрани́л еси́, пе́сньми пою́щия Тебе́: отце́в Бо́же, благослове́н еси́.

От благоутро́бия Твоего́, Де́во Чи́стая! реши́ши бо безме́рныя печа́ли и напа́сти призыва́ющим в ну́жде и обстоя́нии: те́мже и ны́не помози́, Благослове́нная, Тя восхваля́ющим.

Покажи́ ско́рое Твое́ заступле́ние, покажи́, я́ко мо́жеши, я́ко Ма́ти Бо́гу, призыва́ем Тя от се́рдца, со слеза́ми припа́дающе, скорбь укроти́ и боле́знь рабо́в Твои́х вско́ре.

Слава: Уста́ челове́ком я́ко львом лю́тым, гро́ба тяжча́йше отверзо́шася, го́рько поглоти́ти мя: но Ты, Богоро́дице, яви́ся наде́жда ненаде́ющимся и низложи́ кре́пость их, Благослове́нная.

И ныне: Да у́зрят врази́ и постыдя́тся, да разуме́ют и ви́дят Твою́, е́же по нам сопроти́в борю́щую си́лу, и в про́пасть преиспо́днюю низложи́ их, Благослове́нная, наде́ждо ненаде́ющихся.

Песнь 8

Ирмос: Пещь иногда́ о́гненная в Вавило́не де́йства разделя́ше, Бо́жиим веле́нием халде́и опаля́ющая, ве́рныя же ороша́ющая, пою́щия: благослови́те, вся дела́ Госпо́дня, Го́спода.

Прибе́жище на́ше и ми́ру ра́дование, Богороди́тельнице, умилосе́рдитися потщи́ся, и спе́шно благода́ть Твою́ пода́ждь нам оскорбле́нным, и заступи́, Блага́я, Твоя́ рабы́.

Сове́т су́етен совеща́ша лю́те на ны безбо́жных со́нмища, я́коже пре́жде Ахитофе́л. Но вопи́ем: Твои́ми моли́твами сей разори́, низло́жши сих кре́пость, Богоро́дице.

Слава: Призыва́ющих Тя, Богоро́дице, от души́ нело́жно, во всяко́й ско́рби и в боле́знех разли́чных, и беда́х лю́тых, спе́шно услы́ши, Влады́чице, сих избавля́ющи при́сно моли́твами Твои́ми.

И ныне: Да и́мя Твое́, Богоро́дице, на земли́ славосло́вится, Иже из Тебе́ возсия́в, гре́шником держа́вную наде́жду и сте́ну Тя дарова́: Тобо́ю бо вся́кое дыха́ние к Бо́гу притека́ет.

Песнь 9

Ирмос: Недоуме́ет всяк язы́к благохвали́ти по достоя́нию, изумева́ет же ум и преми́рный пе́ти Тя, Богоро́дице: оба́че Блага́я су́щи, ве́ру приими́, я́ко любо́вь ве́си боже́ственную на́шу, Ты бо христиа́н еси́ предста́тельница, Тя велича́ем.

Да загради́тся всяк язы́к, лука́вым поуча́яйся: да молча́т устна́ льсти́вая и уста́ непра́ведно глаго́лющая на пра́веднаго беззако́ние, горды́нею и за́вистию вражде́бною вку́пе, Богоро́дицы моли́твою, и святы́х Христо́вых.

Иже в моли́твах бо́друю, Чи́стую Богоро́дицу призыва́ем вси боле́знию и ско́рбию одержи́ми, взыва́юще: Влады́чице Чи́стая, ско́ро изба́ви от одержа́щих боле́зней рабы́ Твоя́ при́сно, я́ко по Бо́зе засту́пницы ины́я не и́мамы.

Слава: Отча́явшихся ве́лие прибе́жище, обурева́емых ти́хое приста́нище Ты еси́, Богоро́дице. Те́мже и мы притека́ем, взыва́юще: да не постыди́мся, Ма́ти и́стиннаго Живота́, но да благодаря́ще усе́рдно Тя велича́ем.

И ныне: Приими́, Отрокови́це Пречи́стая, боже́ственную песнь, воздава́ющи благода́ть на Тя наде́ющимся, и мир испроси́ Це́рквам при́сно посла́ти, да христиа́нский всяк язы́к Тя велича́ет.

Молитва ко Пресвятой Богородице

Ца­ри́це моя́ пребла­га́я, Наде́ждо моя́ Бо­го­ро́­ди­це, Прия́телище си́рых, и стра́нных Предста́тельнице, скорбя́щих Ра́досте, оби́димых Покрови́тельнице! Зри́ши мою́ беду́, зри́ши мою́ скорбь, помози́ ми я́ко не́мощну, окорми́ мя я́ко стра́нна. Оби́ду мою́ ве́си, разреши́ ту, я́ко во́лиши: я́ко не и́мам ины́я по́мощи ра́зве Тебе́, ни ины́я Предста́тельницы, ни бла­ги́я Уте́шительницы, то́кмо Тебе́, о Бо­гома́­ти; я́ко да сохрани́ши мя и покры́еши во ве́ки веко́в. Ами́нь.

Молитва Богородице в Субботу:

Радуйся, Дево Богородице, пристанище и предстательство убогия души моея, надежда сладкая спасения моего! Радуйся, радость от Ангела приемшая в благовещении имеющаго воплотитися от Тебе Бога Слова! Радуйся, всех Зиждителя в Твоих ложеснах носившая! Радуйся, Бога плотию рождшая, миру Спасителя! Радуйся, в рождестве девство нетленно сохранившая! Радуйся, от волхвов дары приемшая и поклонение их от Тебе Рождшемуся видевшая, и пастырей преславная о Нем словеса слышавшая и в сердце Твоем слагавшая! Радуйся, Отрока Иисуса, Сына Твоего и Бога, во храме, среди законоучителей, обретшая радостно! Радуйся, болезни лютыя во страдании крестном, распятии и смерти Сына Твоего, пресладкаго Иисуса, испытавшая, воскресением же Его тридневным обрадованная светло! Радуйся, вознесение Сына Твоего и Бога со ученики Его во славе небесней видевшая! Радуйся, от него ниспосланнаго Духа Святаго, в горнице Сионстей в виде огненных языков нисшедшаго, со ученики Господни приемшая! Радуйся, на земле Особый Молитвенный Покров Пресвятой Богородицы ангельски пожившая! Радуйся, чистотою и святынею вся ангельския чины и всех святых лики превосходящая! Радуйся, возвеличенная славою, пришествием к Тебе Сына Твоего и Бога! Радуйся, Того святым рукам душу Твою радостно предавшая! Радуйся, славно превознесенная Твоим на небеса с телом восшествием! Радуйся, по преставлении Твоем боговидцем апостолом в третий день явившаяся! Радуйся, на небесех от Отца и Сына и Духа Святаго диадемою вечнаго царствия увенчанная! Радуйся, от всех небесных сил приснопеваемая! Радуйся, близ престола Пресвятыя Троицы, на престоле славы возседящая! Радуйся, Бога с человеки примирения виновнице! Радуйся, небесными и земными господствующая Царице! Радуйся, яко ничтоже невозможно есть Твоему ходатайству! Радуйся, яко вси верно, к Тебе притекающий спасаются! Радуйся, яко Тобою скорбящий утешение, болящий исцеление, бедствующий благовременную помощь получают! Молю убо Тя, обрадованная Владычице, потреби и во мне печаль греховную и даждь ми радость спасения, даждь ми слезы утешительныя, умиление всегдашнее, покаяние истинное и исправление совершенное. Не возгнушайся мене, Владычице, но прийми милостиво сии гласы радостныя, мною, убогим, Тебе приносимыя, и предстани ми в помощь во время безпомощия моего, в час страшный оный, егда разлучитися и мать душа моя от окаяннаго моего тела; тогда, молю, предстани ми в помощь и избави мя, повиннаго во гресех, наказания за них вечнаго, да не явлюся радование бесом и пища геенне огненней. Ей, Владычице моя, не попусти узрети души моей страшнаго и грознаго прещения и истязания демонскаго, грешником уготованнаго, но предвари и спаси мя, раба Твоего, в час оный ужасный, да славлю Тя во веки, едина надежде моя и Ходатаице спасения моего. Аминь.

Сохранить в WordСохранить в PDF

Глас  1-й

Тропарь:  Ка́мени  запеча́тану  от  иуде́й  и  во́ином  стрегу́щим  Пречи́стое  Те́ло  Твое́,  воскре́сл  еси́  тридне́вный,  Спа́се,  да́руяй  ми́рови  жизнь.  Сего́  ра́ди  си́лы  Небе́сныя  вопия́ху  Ти,  Жизнода́вче:  сла́ва  воскресе́нию  Твое́му́,  Христе́,  сла́ва  Ца́рствию  Твое́му,  сла́ва  смотре́нию  Твое́му,  Еди́не  Человеколю́бче.

Богородичен:  Гаврии́лу  веща́вшу  Тебе́,  Де́во,  ра́дуйся,  со  гла́сом  воплоща́шеся  всех  Влады́ка  в  Тебе́,  святе́м  Киво́те,  я́коже  рече́  пра́ведный  Дави́д,  яви́лася  еси́  ши́ршая  небе́с,  поноси́вши  Зижди́теля  Твоего́.  Сла́ва  Все́льшемуся  в  Тя;  сла́ва  Проше́дшему  из  Тебе́;  слава  Свободи́вшему  нас  рождество́м  Твои́м.

Кондак:  Воскре́сл  еси́  я́ко  Бог  из  гро́ба  во  сла́ве,  и  мир  совоскреси́л  еси́,  и  естество́  челове́ческое  я́ко  Бо́га  воспева́ет  Тя,  и  смерть  исчезе́;  Ада́м  же  лику́ет,  Влады́ко,  Е́ва,  ны́не  от  уз  избавля́ема,  ра́дуется,  зову́щи:  Ты  еси́,  Иже  всем  подая́,  Христе́,  воскресе́ние.

Глас  2-й

Тропарь:  Егда́  снизше́л  еси́  к  сме́рти,  Животе́  безсме́ртный,  тогда́  ад  умертви́л  еси́  блиста́нием  Божества́;  егда́  же  и  уме́ршия  от  преиспо́дних  воскреси́л  еси́,  вся  си́лы  Небе́сныя  взыва́ху:  Жизнода́вче  Христе́  Бо́же  наш,  сла́ва  Тебе́.

Богородичен:  Вся  па́че  смы́сла,  вся  пресла́вная  Твоя́,  Богоро́дице,  та́инства,  чистоте́  запеча́танной  и  де́вству  храни́му,  Ма́ти  позна́лася  еси́  нело́жна,  Бо́га  ро́ждши  И́стиннаго.  Того́  моли́  спасти́ся  душа́м  на́шим.

Кондак:  Воскре́сл  еси́  от  гро́ба,  всеси́льне  Спа́се,  и  ад,  ви́дев  чу́до,  ужасе́ся,  и  ме́ртвии  воста́ша.  Тварь  же  ви́дящи  сра́дуется  Тебе́,  и  Ада́м  свесели́тся,  и  мир,  Спа́се  мой,  воспева́ет  Тя  при́сно.

Глас  3-й

Тропарь:  Да  веселя́тся  небе́сная,  да  ра́дуются  земна́я,  я́ко  сотвори́  держа́ву  мы́шцею  Свое́ю  Госпо́дь,  попра́  сме́ртию  смерть,  пе́рвенец  ме́ртвых  бысть;  из  чре́ва  а́дова  изба́ви  нас  и  подаде́  ми́рови  ве́лию  ми́лость.

Богородичен:  Тя,  хода́тайствовавшую  спасе́ние  ро́да  на́шего,  воспева́ем,  Богоро́дице  Де́во:  пло́тию  бо,  от  Тебе́  восприя́тою,  Сын  Твой  и  Бог  наш,  Кресто́м  восприи́м  страсть,  изба́ви  нас  от  тли,  я́ко  Человеколю́бец.

Кондак:  Воскре́сл  еси́  днесь  из  гро́ба,  Ще́дре,  и  нас  возве́л  еси́  от  врат  сме́ртных;  днесь  Ада́м  лику́ет  и  ра́дуется  Е́ва,  вку́пе  же  и  проро́цы  с  патриа́рхи  воспева́ют  непреста́нно  Боже́ственную  держа́ву  вла́сти  Твоея́.

Глас  4-й

Тропарь:  Све́тлую  воскресе́ния  пр́оповедь  от  А́нгела  уве́девша  Госпо́дни  учени́цы  и  пра́деднее  осужде́ние  отве́ргша,  апо́столом  хваля́щася  глаго́лаху:  испрове́ржеся  смерть,  воскре́се  Христо́с  Бог,  да́руяй  ми́рови  ве́лию  ми́лость.

  Богородичен:  Е́же  от  ве́ка  утае́нное  и  А́нгелом  несве́домое  та́инство,  Тобо́ю,  Богоро́дице,  су́щим  на  земли́  яви́ся  Бог,  в  несли́тнем  соедине́нии  воплоща́емь,  и  Крест  во́лею  нас  ра́ди  восприи́м,  и́мже  воскреси́в  первозда́ннаго,  спасе́  от  сме́рти  ду́ши  на́ша.

Кондак:  Спас  и  Изба́витель  мой,  из  гро́ба  я́ко  Бог  воскреси́  от  уз  земноро́дныя  и  врата́  а́дова  сокруши́,  и  я́ко  Влады́ка  воскре́се  тридне́вен.

Глас  5-й

Тропарь:  Собезнача́льное  Сло́во  Отцу́  и  Ду́хови,  от  Де́вы  ро́ждшееся  на  спасе́ние  на́ше,  воспои́м  ве́рнии  и  поклони́мся,  я́ко  благоволи́  пло́тию  взы́ти  на  Крест,  и  смерть  претерпе́ти,  и  воскреси́ти  уме́ршия  сла́вным  Воскресе́нием  Свои́м.

Богородичен:  Ра́дуйся,  две́ре  Госпо́дня  непроходи́мая;  ра́дуйся,  стено́  и  покро́ве  притека́ющих  к  Тебе́;  ра́дуйся,  необурева́емое  приста́нище  и  Неискусобра́чная,  ро́ждшая  пло́тию  Творца́  Твоего́  и  Бо́га,  моля́щи  не  оскудева́й  о  воспева́ющих  и  кла́няющихся  Рождеству́  Твоему́.

Кондак:  Ко  а́ду,  Спа́се  мой,  соше́л  еси́,  и  врата́  сокруши́вый  я́ко  Всеси́лен,  уме́рших  я́ко  Созда́тель  совоскреси́л  еси́,  и  сме́рти  жа́ло  сокруши́л  еси́,  и  Ада́м  от  кля́твы  изба́влен  бысть,  Человеколю́бче.  Те́мже  вси  зове́м:  спаси́  нас,  Го́споди.

Глас  6-й

Тропарь:  А́нгельския  си́лы  на  гро́бе  Твое́м  и  стрегу́щия  омертве́ша,  и  стоя́ше  Мари́я  во  гро́бе,  и́щущи  Пречи́стаго  Те́ла  Твоего́.  Плени́л  еси́  ад,  не  искуси́вся  от  него́;  сре́тил  еси́  Де́ву,  да́руяй  живо́т.  Воскресы́й  из  ме́ртвых,  Го́споди,  сла́ва  Тебе́.

  Богородичен:  Благослове́нную  нареки́й  Твою́  Ма́терь,  прише́л  еси́  на  страсть  во́льным  хоте́нием,  возсия́в  на  Кресте́,  взыска́ти  хотя́  Ада́ма,  глаго́ля  А́нгелом:  сра́дуйтеся  Мне,  я́ко  обре́теся  поги́бшая  дра́хма.  Вся  му́дре  устро́ивый,  Бо́же  наш,  сла́ва  Тебе́.

Кондак:  Живонача́льною  дла́нию,  уме́ршия  от  мра́чных  удо́лий  Жизнода́вец  воскреси́в  всех  Христо́с  Бог,  воскресе́ние  подаде́  челове́ческому  ро́ду:  есть  бо  всех  Спаси́тель,  Воскресе́ние  и  Живо́т,  и  Бог  всех.

Глас  7-й

Тропарь:  Разруши́л  еси́  Кресто́м  Твои́м  смерть,  отве́рзл  еси́  разбо́йнику  рай,  мироно́сицам  плач  преложи́л  еси́  и  апо́столом  пропове́дати  повеле́л  еси́,  я́ко  воскре́сл  еси́,  Христе́  Бо́же,  да́руяй  ми́рови  ве́лию  ми́лость.

Богородичен:  Я́ко  на́шего  воскресе́ния  сокро́вище,  на  Тя  наде́ющияся,  Всепе́тая,  от  ро́ва  и  глубины́  прегреше́ний  возведи́:  Ты  бо  пови́нныя  греху́  спасла́  еси́,  ро́ждшая  Спасе́ние  на́ше,  Я́же  пре́жде  рождества́  Де́ва,  и  в  рождестве́  Де́ва,  и  по  рождестве́  па́ки  пребыва́еши  Де́ва.

Кондак:  Не  ктому́  держа́ва  сме́ртная  возмо́жет  держа́ти  челове́ки:  Христо́с  бо  сни́де,  сокруша́я  и  разоря́я  си́лы  ея́.  Связу́емь  быва́ет  ад,  проро́цы  согла́сно  ра́дуются:  предста́,  глаго́люще,  Спас  су́щим  в  ве́ре,  изыди́те  ве́рнии  в  воскресе́ние.

Глас  8-й

Тропарь:  С  высоты́  снизше́л  еси́,  Благоутро́бне,  погребе́ние  прия́л  еси́  тридне́вное,  да  нас  свободи́ши  страсте́й,  Животе́  и  Воскресе́ние  на́ше,  Го́споди,  сла́ва  Тебе́.

  Богородичен:  И́же  нас  ра́ди  рожде́йся  от  Де́вы  и  распя́тие  претерпе́в,  Благи́й,  испрове́ргий  сме́ртию  смерть  и  воскресе́ние  явле́й  я́ко  Бог,  не  пре́зри,  я́же  созда́л  еси́  руко́ю  Твое́ю;  яви́  человеколю́бие  Твое́,  Ми́лостиве,  приими́  ро́ждшую  Тя  Богоро́дицу,  моля́щуюся  за  ны,  и  спаси́,  Спа́се  наш,  лю́ди  отча́янныя.

Кондак:  Воскре́с  из  гро́ба,  уме́ршия  воздви́гл  еси́,  и  Ада́ма  воскреси́л  еси́,  и  Е́ва  лику́ет  во  Твое́м  воскресе́нии,  и  мирсти́и  концы́  торжеству́ют,  е́же  из  ме́ртвых  воста́нием  Твои́м,  Многоми́лостиве.

Русская вера, 2017

Великую духовную пользу получит христианин, если будет молиться каноны святым, память которых Св. Церковь вспоминает в текущий день. Для тех верующих, у кого нет канонов тем или иным святым, можно молиться данный канон Пророку, подставляя в текст общего канона имя того пророка, кому молишься канон. Каноны тем или иным святым можно молиться независимо от того, вспоминает ли Святая Церковь их память в данный день или нет. Если усердно молиться святым, они всегда будут нам помощниками в достижении спасения.
 

——————————————————————

Общее начало и конец всем канонам →
Порядок чтения по уставу
——————————————————————
 

Тропарь, глас 2-й

Пророка Твоего Господи (имя рек), память празднующе, того ради молим Тя, спаси душа наша. (Дважды).

Слава, и ныне. Богородичен. Вся паче смысла, вся преславная Твоя Богородице таиньства. Чистотою запечатленна, и девьством хранима. Мати разумеся неложна, Бога рождьши истиннаго. Того моли спастися душам нашим.
 

КАНОН, глас 6-й
 

Песнь 1. Ирмос

Яко по суху ходив Израиль, по бездне стопами. Гонителя фараона видя потопляема, Богу победную песнь поя вопияше.

Запев: Святыи пророче (имя рек) моли Бога о нас (поклон).

Тебе ся молим пророче Божии, Божию Престолу предстоя, моли прилежно, просвещение нам даровати мудре, верою поющим честную твою память.

Запев. Сосуд божественыи явися, вместителен Божия Духа, просвещением и дарованием благочестным. Тем же сошедшеся вернии тебе ублажаем.

Слава. Спасителю Богу пророчески предстоя, дерзновенно молися, о иже верою богодухновенно память твою славящих.

И ныне. Богородичен. Светлыми лучами всю тварь осиявшее солнце, от святаго Ти чрева просвещает Владычице. Им же просвещьшеся Тя Богомати почитаем.

Катавасия: Избави от бед рабы своя, святыи пророче яко вси по Бозе к тебе прибегаем, ты бо молиши о нас Христа Бога нашего. Господи помилуй (трижды с поклонами).
 

Песнь 3. Ирмос

Несть свята яко же Ты Господи Боже мой, вознесыи рог верных си Блаже, и утверждь их на камени исповедания Ти.

Запев. Иже вся провидяи яко Бог, будущих разумение и бываемых ведение тебе ясно проявляя, и боголепно показал есть блаженне и всечестне.

Запев. Укрепив блаженне ум свой, благоверным дерзновением, Духу божественому подклонил еси себе, и бысть приятелище, иже оттуду божествеными духновении.

Слава. Вод тайных река от бездны истекающи, даровании духовных, пророчеством явлении, (имя рек), богогласе ты бысть.

И ныне. Богородичен. Се Тя вси роди ублажаем верою, яже безлетное Слово плотию в лето рождьши паче естества, и Девою паки пребывшую. Катавасия

Седален глас 6-й. Очистив от скверны премудре ум свой, и зерцало божественое соделал еси его, к лучам приятелище Божия Духа. И ныне ко источнику светозарному, радуяся пришел еси пророче (имя рек), преславныи.

Слава и ныне. Богородичен. Преславную Христову Матерь. И святых ангел святейшу, немолчно воспоем сердцем и устнами, Богородицу Тя исповедающе, яко воистину рождьшую нам Бога воплощенна, и молящуся непрестанно о душах наших.
 

Песнь 4. Ирмос

Христос мне сила Бог и Господь, честная Церкви боголепно зовет вопиющи, от совести чисты о Господе празднующи.

Запев. Иже всем нам Господь, явися по Твоему пророчеству блаженне, всех призывая к разуму Его, и от работы всю тварь избавил есть.

Запев. Благодатию просвещаемь прорекл еси глаголя, под ярем един нодклонитися, совершеную носящим веру, и Господеви служащим.

Слава. Пророк сыи, присно зарями светодательнаго блистания просвещаемь, просвети ны блаженне, любовию поющыя тя.

И ныне. Богородичен. Марие пречистая, страстей смущение разума моего, и искушении молву разжени, безстрастия источника рождьшая Мати Дево. Катавасия.
 

Песнь 5. Ирмос

Божиим светом Ти Блаже, утренюющих Ти душы любовию просвети молюся, Тя ведети Слово Божие истиннаго Бога, от мрака греховнаго изимающа.

Запев. От неправды к добродетели, и от страстей пленения мя блаженне возврати, твоими молитвами пророче преславныи, и к свету благочестивых деянии направи.

Запев. Украсив добродетелными лепотами ум свой, управление показал еси к лучам Божия Духа, от Него же пророчества благодатию обогатися.

Слава. Пророк божественыи быв, чисто житие имея, и приятелище бысть Святаго Духа. Тем зрети сподобися невидимо разумеваемаго.

И ныне. Богородичен. Возглашают пророческая речения Пречистая, многими образы рожества Твоего. Их же ныне мы сбытие видяще, сущую Богородицу Тя исповедаем. Катавасия.
 

Песнь 6. Ирмос

Житейскаго моря воздвизаема зря, напастей бурею, в тихо пристанище притек вопию Ти, возведи от тли живот мой Многомилостиве.

Запев. Приемля славне духовныя светлости, явствено яко зерцало пророче божествено, лучи мирови восиял еси, яко сущая являя будущая.

Запев. Твой прииде Царь, радуися Сионе и красуйся. Видяи бо мир просветил есть, зарями Своего Божества, и бесовскую лесть разрушил есть.

Слава. Силою духовною зряше пророче будущих. Образы приемля Божия явления, яко зерцалом божественаго Всесвятаго Духа.

И ныне. Богородичен. Плотьстей толстоте примесився, иже от Отца единородныи во Твоем чреве, изыде един от обою кроме тления, сохранив невредно чистое девьство Твое Пречистая. Катавасия.

Слава, и ныне. Кондак, глас 4-й. Очистившися Духом светозарное твое сердце, пророчествия бысть светлое приятелище. Предглаголеши бо яко настоящая, далече сущая. Сего ради тя молим блаженне (имя рек), славне, Христа Бога моли, непрестанно о всех нас.

Икос. Пророчествия благодатию обогащься, будущих разуму боголепно научился еси Духом, (имя рек) богодухновенне. И предглаголеши всем Христово пришествие, и языком пребогате божественое призвание. Тем же честную твою память празднуем. И любовию поем тя, и верно ублажаем, взывающе ти славне, моли Христа Бога непрестанно о всех нас.
 

Песнь 7. Ирмос

Хладодателну убо пещь сотвори ангел, преподобным детем, халдеи же опали велением Божиим. Мучителя увеща вопити, благословен Бог отец наших.

Запев. Восияла есть память твоя славне мирови яко солнце, благодатию сияющи пророчества твоего, согласно поющым верно, благословен Бог отец наших.

Запев. Тучнейшии облак ты явися, дождь богоразумия восиял еси нам, от спасенаго блаженне Источника, Им же просвещаемся поюще, благословен Бог отец наших.

Слава. От Господа просвещени пророцы, прорицают будущих разум богомудрено взывают Слово, еже искони быти. Ему же поем, благословен Бог отец наших.

И ныне. Богородичен. Слово еже бытие древле всем подавая. Божиею волею взыскати восхотев человека Чистая, во Твое чрево вселися благословеная, яже Бога плотию рождьшая. Катавасия.
 

Песнь 8. Ирмос

Из пламене святым росу источи, а праведнаго жертву и воды попали. Вся бо твориши Христе елико хощеши. Тем Тя превозносим Господа во веки.

Запев. Возложен весь Вседержителю, промышления образом тайно научився, строительное языком сказуя. Тем тя поем пророче богогласе.

Запев. Молебную песнь принеси Господеви, о поющих тя богоблаженне. И страстей разруши молву, да тя поем пророче богоглаголиве.

Слава. Яко огнь во тме седящим всем явися, божественым светом богомудрено озаряя, поющыя верно Господа во веки.

И ныне. Богородичен. Жизнодавца рождьши Бога и Господа, смертное губительство неодержимое, утишила еси Пречистая, сие умертвивши. Тем Тя поем во вся веки. Катавасия.
 

Песнь 9. Ирмос

Бога человеком невозможно видети, Нань же не смеют чини ангельстии зрети. Тобою бо Пречистая явися нам Слово воплощенно. Его же величающе, с небесными воиньствы и Тебе величаем.

Запев с поклоном. В землю кротких ты вселился еси, идеже ангельскии видиши светлости, пророче премудре (имя рек), угодниче Христов. Кроток быв сияя благодатию. Тем сшедшеся вернии тебе ублажаем.

Запев. Твоих проречении преславне, явствено зряще сбывшееся схождение, данней ти благодати дивимся. И смысла твоего чистоте, и душевному боговидению чюдимся.

Слава. Идеже ангельстии чини, и пророк лицы и патриарх, и святых светлости, пророче (имя рек), вселився. И ныне с ними ликуя радостно, о нас молися ко Господу, спастися верою хвалящим тя.

И ныне. Богородичен. Яко же Ты, никто же Обрадованная бысть в родех первых, Богомати всенепорочная. Ты бо едина паче всех, изряднейшю имела еси святыню и чистоту. Тем же прияла еси Бога в Тя воплощаема. Катавасия.

Отпуст: Господи Исусе Христе, Сыне Божии, молитв ради пречистыя Твоея Матере, и святаго пророка (имя рек), и всех ради святых, помилуй и спаси нас, яко Благ и Человеколюбец. Аминь. Господи помилуй (трижды). Исходные поклоны.

Обзор книги